Joe proeberi foe gi kotoigi na bakadina kaba?
1 Wi alamala abi prisiri te wi abi wan wroko di abi boen bakapisi. Na a tra sei, te wi no man si boen bakapisi, dan a wroko kan froeferi wi èn kan kon de wan sani di no e gi satisfaksi. Wroko di abi wan marki nanga reide, warti gi wi èn na wan blesi. (Teki gersi Preikiman 3:10-13.) Wi kan fiti a srefi gronprakseri disi na a preikiwroko foe wi. Wi sabi foe ondrofeni taki te wi e go oso foe oso èn man taki nanga sma foe bijbel, dan wi e go baka na oso nanga wan kowroe-ati na jejefasi. Wi e firi taki troetroe wi doe wan sani.
2 Na ini son kontren a kon moeilek srefisrefi foe feni sma na oso tapoe spesroetoe joeroe foe a dei. Bericht e sori taki, na foeroe presi moro leki 50 procent foe sma no de na oso te wi e go na den na mamanten. Foeroe gemeente soekoe foe loesoe a problema disi foe di den e seti sani foe gi kotoigi na bakadina, èn den kisi boen bakapisi. Preikiman e froeteri taki te den go na tapoe wan tra joeroe foe a dei, moro sma de na oso èn foeroe tron a sori leki sma gwenti foe de moro relax èn wani foe arki moro na a Kownoekondre boskopoe. Joe proeberi foe gi kotoigi na bakadina kaba na ini joe gebied? — Teki gersi Markus 1:32-34.
3 Owroeman orga a gi foe kotoigi na bakadina: Na ini son kontren preikiman horibaka boen gi velddienst konmakandra na bakadina. Owroeman kan poti prakseri tapoe jongoe preikiman di komoto na skoro na bakadina èn na bigiwan di tapoe nanga den grontapoe wroko moro lati tapoe a dei. Son preikiman, di no man foe de na ini a velddienst na a kaba foe a wiki, e feni taki a gi foe kotoigi na bakadina mindri wiki, na wan praktis sani gi den foe abi wan doronomo prati na ini a preikiwroko.
4 Difrenti aktiviteit de di joe kan doe te joe e gi kotoigi na bakadina. Joe kan gi kotoigi oso foe oso nanga den tijdschrift noso gebroiki den poeblikâsi di wi e pristeri a moen dati. Bakadina na wan moi ten foe go na sma di no ben de na oso di den preikiman ben go na den na mamanten noso na a kaba foe a wiki. So srefi, wan boen gebied ben sa kan de foe gi kotoigi na strati, èn na so wan fasi e gi joe na okasi foe miti sma di komoto na wroko. Foeroe preikiman e feni taki foe gi kotoigi na bakadina na a moro boen ten foe tjari gobaka na den wan di sori belangstelling.
5 De fersektiki èn koni: Na ini son kontren, a ben kan tjari problema foe wroko te leki lati neti. A ben sa de wan koni sani foe waka toe na toe noso na ini groepoe, te mofoneti e doro. Te joe naki tapoe a doro, tanapoe pe sma kan si joe èn taki krinkrin soema na joe. Gebroiki a koni foe si sani krin. Te joe si taki joe go na tapoe wan ten di no fiti, leki te na osofamiri e njan noso e rostoe troetroe, dan aksi foe kon baka wan tra ten. Foeroe tron, a moro boen foe gi kotoigi na bakadina joeroe, na presi foe go latilati, kande te den ososma no e froewakti fisiti moro.
6 Den bakadina fiti spesroetoe foe gi kotoigi. Te wi e doe ’santa diniwroko dei nanga neti’ gi Gado, dan seiker Jehovah sa blesi den moeiti foe wi. — Openb. 7:15.