Wi na Kotoigi ala ten
1. San wi kan leri fu a tori pe Yesus e gi kotoigi na a uma na a peti?
1 Yesus ben e waka furu yuru langa. A ben weri èn watra ben kiri en. Di den disipel fu en gowe fu go bai nyanyan, dan a go sidon fu rostu na wan peti dorosei fu wan Samaria foto. Yesus no ben de na ini Samaria fu preiki. Na pasa a ben e pasa nomo fu go na Galilea, pe a ben o go doro nanga en diniwroko. Toku a teki na okasi dati fu gi kotoigi na wan uma di ben e teki watra (Yoh. 4:5-14). Fu san ede a du dati? Ala ten Yesus ben de „a getrow èn tru kotoigi” fu Yehovah (Openb. 3:14). Wi e teki na eksempre fu Yesus, te wi e sori ala ten taki wi na Kotoigi fu Yehovah.—1 Petr. 2:21.
2. Fa wi kan sreka wisrefi fu gi kotoigi te wi kisi na okasi?
2 De srekasreka: Wi kan de srekasreka fu gi kotoigi te wi kisi na okasi, te wi e tyari publikâsi nanga wi. Furu preikiman abi traktaat na den èn den e prati dati gi sma di e wroko na wenkri, na pompu station, èn gi sma di den e miti (Preik. 11:6). Wan sisa di e rèis furu leisi, e sorgu taki ala ten a abi wan pikin Bijbel nanga wan Bijbel leri-buku na ini en tas, èn a e pruberi fu bigin wan takimakandra nanga den sma di e sidon na en sei.
3. Fa wi kan bigin wan takimakandra?
3 Bigin wan takimakandra: Wi no abi fu bigin taki wantewante fu Bijbel te wi e gi kotoigi na okasi di wi kisi. Di Yesus bigin a takimakandra nanga na uma, dan a no taigi en wantewante taki en na a Mesias. A ben aksi na uma nomo fu gi en pikinso watra fu dringi, èn dati ben hari a prakseri fu na uma (Yoh. 4:7-9). Wan sisa kon si taki a ben man bigin wan takimakandra fu di a ben du wan srefi sortu sani, te sma e aksi en fa a ben hori wan spesrutu fesadei. Na presi fu taki dati a no e hori a fesa dati, fu di en na wan Yehovah Kotoigi, a e taki: „Misrefi teki a bosroiti fu no hori a fesa dati.” Nofo tron a sma di poti na aksi wani sabi fu san ede, èn dati e gi a sisa na okasi fu gi kotoigi.
4. Fu san ede Mateyus 28:18-20 e gi yu deki-ati?
4 Yesus ben du a diniwroko fu en fayafaya na grontapu. Ma aladi a klari a diniwroko dati, toku a e poti prakseri ete na a preikiwroko èn a wani taki a wroko disi e du neleki fa en ben du dati (Mat. 28:18-20). Fu dati ede, neleki wi Eksempre, Yesus, wi na Kotoigi di de klariklari fu fruteri sma fu a howpu fu wi awinsi na sortu ten.—Hebr. 10:23.