Aksi di opo kon
◼ Fa ala sma kan yepi fu sorgu taki wi man tan teki leri na den gemeente konmakandra? (Deut. 31:12)
Fu di wi abi bigi lespeki gi Yehovah èn gi den gemeente konmakandra di a sreka gi wi, meki wi alamala e kisi a deki-ati fu doro fruku na den konmakandra èn fu de srekasreka fu kisi leri fu en. A bun te wi e sidon na fesisei fu a zaal, so taki wi e libi den sidonpresi na bakasei gi den sma di abi yongu pikin èn gi den wan di e kon lati wanwan leisi. Bifo a konmakandra bigin, wi musu sorgu taki sani soleki cellulair seti na so wan fasi taki a no e puru a prakseri fu den arkiman. Te ala sma e sori taki den abi lespeki gi den konmakandra, dan furu sani no o de di o puru trawan prakseri na a konmakandra.—Preik. 5:1; Fil. 2:4.
Te nyun sma e bigin kon na den konmakandra, dan wan sma na ini a gemeente di sabi en kan sidon na en sei. Disi o de wan bigi yepi gi en, spesrutu te a abi yongu pikin di musu leri ete fu sidon pî. Fu go na den konmakandra kan de wan nyun sani gi na osofamiri. Efu dati de so, dan den ben o wani sidon kande na bakasei pe den no o puru trawan prakseri so makriki te den musu go na dorosei fu sorgu gi san den pikin fu den abi fanowdu (Odo 22:6, 15). A no de fanowdu taki osofamiri di abi yongu pikin, e sidon na ini wan aparti kamra pe den pikin kan denki taki den kan meki babari te den wani. Nofo tron a moro bun te papa nanga mama e gi den pikin trangaleri noso e sorgu gi san den pikin abi fanowdu na dorosei fu a zaal. Baka dati den kan kon sidon baka na ini a zaal nanga den pikin.
Den zaalwaktiman e sorgu taki ala sani e waka na wan fasi di fiti na a oso fu anbegi. Den e kon fruku fu yepi osofamiri nanga den wan di e kon lati wanwan leisi, fu feni wan bun sidonpresi. Den zaalwaktiman e hori a firi fu trawan na prakseri èn den e luku bun sortu sidonpresi den e gi sma, sondro fu puru a prakseri fu trawan. Den e luku bun san den e du te sani e pasa di e puru a prakseri fu trawan. Te wan pikin e tyari ensrefi na so wan fasi taki a e puru a prakseri fu trawan, dan na wan switi fasi den zaalwaktiman e gi yepi.
Ala sma di de na den konmakandra pe wi e anbegi Gado, kan sorgu taki wi leri fu Yehovah nanga den sani di a o du fu tyari wan nyun grontapu kon pe vrede nanga retidu o de.—Hebr. 10:24, 25.