Wi musu gi den siri watra fu meki den gro
1. San musu kisi watra fu kan gro?
1 Siri di prani na ini wan dyari musu kisi watra fu gro. Na so a de tu nanga siri fu a bun nyunsu di wi e prani na ini na ati fu sma di e libi na ini a kontren fu wi (1 Kor. 3:6). Efu wi wani taki den siri meki rutu, gro èn kon bigi, dan wi musu go baka na sma èn wi musu gebroiki Gado Wortu fu gi den watra na agersifasi.
2. San wi kan du fu tyari gobaka na sma?
2 Poti wan aksi: Te yu e sreka yusrefi fu pristeri a bun nyunsu, dan yu kan luku sortu aksi yu o poti gi na ososma di o hari en prakseri èn di yu kan piki te yu go baka. Yu kan poti so wan aksi na a kaba fu a fosi takimakandra èn seti sani bun fu go baka na a sma. Furu sma lobi fu gebroiki wan tori fu a Bijbel leri-buku di e gi den na okasi fu sori fa wan Bijbelstudie e hori.
3. Sortu sani yu kan skrifi a fosi leisi di yu taki nanga a sma?
3 Skrifi san yu ben taki: Te yu kaba taki nanga a sma èn yu e gowe, dan teki ten fu skrifi ala den sani di yu ben taki nanga en. Skrifi a nen fu a sma nanga na adres fu en. A bun tu fu skrifi a dei nanga a yuru di yu taki nanga en, fu sortu sani unu ben taki, èn sortu publikâsi yu ben libi kande na baka gi en. A sma ben taki dati a de na ini wan kerki? A abi wan osofamiri? A ben taki fu den sani di a lobi èn fu den sani di e gi en broko-ede? Den sortu sani disi o yepi yu fu taki fu tori di prenspari gi a sma te yu o go baka na en. Skrifi sosrefi o ten yu taki dati yu o go baka na en èn sortu aksi yu o piki.
4. Fu san ede wi musu horidoro te wi e gobaka na sma di wani sabi moro?
4 Horidoro: Satan o tan meki muiti fu „puru a wortu” di prani na ini wan sma ati (Mark. 4:14, 15). Fu dati ede, no lasi-ati te a muilek fu miti a sma na oso baka. Kande yu kan seni wan brifi gi en noso libi wan boskopu na a doro? Wan pionier ben bigin studeri nanga wan uma leti na en mofodoro, ma bakaten a no ben man miti na uma moro na oso. Fu dati ede a seni wan brifi gi en. Di a sisa miti na uma na oso te fu kaba, dan na uma ben taki fa a ben naki en ati taki a sisa ben sori taki a e broko en ede trutru nanga en. Te wi e gi watra na den siri fu a bun nyunsu, dan dati kan gi wi prisiri te wi e si fa den e sproiti, fa den e gro kon bigi, èn fa den e ’gi froktu, dritenti tron so furu, siksitenti tron so furu, nanga wán hondro tron so furu’.—Mark. 4:20.