Fa fu du wi diniwroko moro bun​—Skrifi sani fu a sma di ben arki

„Tan poti prakseri na yusrefi èn na den sani di yu e leri sma” (1 Tim. 4:16). A rai disi di na apostel Paulus ben gi Timoteyus e sori taki wi musu meki muiti fu go na fesi, awinsi wi abi ondrofeni noso wi no abi. Fu man du dati, wan nyun artikel o kon na ini Wi Kownukondre diniwroko di nen „Fa fu du wi diniwroko moro bun”. Ibri artikel o taki fu wan prenspari sani di wi musu du fu man du wi diniwroko moro bun. Ala sma e kisi a deki-ati fu gebroiki den rai disi a heri mun. Te a mun kaba, wi o man taki na a Diniwroko Konmakandra sortu wini wi kisi di wi du muiti fu gebroiki den rai dati. A mun disi wi o kisi deki-ati fu skrifi sani fu den sma di ben wani arki.

Fu san ede a prenspari: Fu man du wi diniwroko bun, dan wi no musu preiki nomo. Wi musu go baka na den sma di ben arki èn wi musu gi den leri, neleki wan sma di e gi watra na den siri di a prani so taki den kan gro (Mat. 28:19, 20; 1 Kor. 3:6-9). Fu man du disi, wi musu feni a sma baka, wi musu taki fu den sani di a wani sabi, èn wi musu taki moro fara fu a tori di wi ben taki nanga en kaba. Fu dati ede te wi feni wan sma di ben arki, a de prenspari fu skrifi sani fu en.