¡Sorgu Taki Yu Go Baka!
1 „¡Dati ben de wan bun takimakandra! Mi sa musu memre fu tyari wan gobaka drape.” ¿Oiti yu taki den wortu disi, dan baka ten frigiti pe a sma e libi? Efu a de so, dan yu sabi taki a wan-enkri fasi fa yu kan sorgu taki yu tyari wan gobaka, na fu skrifi dati poti na tapu papira.
2 Skrifi Ala Sani Poti na Tapu Papira: Te yu abi a takimakandra di yu ben abi nanga wan sma di sori belangstelling krin na prakseri ete, dan yu musu teki wan momenti fu skrifi ala bodoi di abi fu du nanga a sma. Skrifi a nen fu a sma èn den sani di sa meki yu kon sabi en baka. Skrifi en adres, ma no rai san dati ben kan de — luku fu de seiker taki san yu skrifi, yoisti. Skrifi a tori di yu ben taki fu en, iniwan Bijbel tekst di yu ben leisi, èn sortu buku yu ben prati.
3 Efu yu ben libi wan aksi gi a sma di yu sa piki te yu go baka, dan skrifi en poti na tapu papira. ¿Yu ben kon sabi wan sani fu a sma, en osofamiri, noso en relisi? Efu a de so, dan meki wan notisi fu disi. Te yu sa go baka wan tra lesi, dan a taki di yu e taki fu den sani disi, sa sori taki yu abi belangstelling gi a sma. Te fu kaba, skrifi a dei nanga a ten fu na fosi fisiti èn o ten yu ben taki fu go baka. Te yu skrifi den sani bun, dan yu sa man memre den krin, èn kande a no sa de makriki fu frigiti a pramisi di yu ben meki fu go baka.—1 Tim. 1:12.
4 Now di a raportu fu yu abi ala sani na tapu, poti en makandra nanga den tra sani fu yu preikiwroko — bukutas, Bijbel, Redeneren-buku (Taki go taki kon-buku), nanga tra buku — so taki yu kan gebroiki en te a de fanowdu. A de moro bun fu skrifi den adres pe sma no ben de na oso na tapu oso-fu-oso raportu di no de den oso-fu-oso raportu di yu e gebroiki fu skrifi den nen fu den gobaka fu yu. ¡A no de fu taki dati, awansi omeni muiti yu e du fu skrifi den gobaka, a de moro prenspari fu sorgu taki yu e go baka!
5 Prakseri a Sma: Te yu e sreka yusrefi gi a preikiwroko, leisi ete wan tron den sani di yu ben skrifi fu a gobaka. Poti prakseri na ibri sma èn sortu sani ben o de moro bun fu gebroiki te yu o tyari a tra gobaka. Prakseri fa yu kan wiki a belangstelling fu a sma gi wan bijbelstudie. Te yu e sreka yusrefi na so wan fasi, a kan yepi fu du moro furu na ini a preikiwroko leki wan bedinari fu a bun nyunsu, en fu dati ede a prisiri di yu abi sa gro.—Odo 21:5a.
6 So bun, a tra lesi te yu miti wan sma di abi belangstelling, no denki taki yu sa man memre a gobaka makriki. ¡Na presi fu dati skrifi en poti na tapu papira, leisi ete wan tron san yu skrifi, tan prakseri a sma, èn sorgu dan taki yu go baka!