Aksi di opo kon

◼ O ten wi o bosroiti fu gi wan sma publikâsi?

A moro prenspari sani na taki wi musu luku efu a sma wani sabi moro. Efu a sma e sori taki a wani sabi moro trutru, dan wi kan gi en tu tijdschrift, wan brochure, wan buku, noso wan tra publikâsi di wi e pristeri. Wi o du dati srefi efu wi e si taki a sma no abi moni noso a abi pikinso moni nomo fu gi leki bijdrage gi a wroko di e du na heri grontapu (Yob 34:19; Openb. 22:17). Ma wi no o gi sma den warti publikâsi fu wi efu den no abi warderi gi dati.​—Mat. 7:6.

Fa wi kan si taki wan ososma wani sabi moro? Te a wani taki nanga wi. Te a sma e arki te wi e taki, te a e piki den aksi di wi e poti, èn te a e taki fa a e denki fu wan tori, dan a e sori taki a wani sabi moro. Te a sma e leisi makandra nanga wi na ini Bijbel, dan dati e sori taki a abi lespeki gi Gado Wortu. Nofo tron a ben o bun fu aksi en efu a wani leisi a publikâsi di wi e pristeri. Preikiman musu abi a koni fu man si efu a sma wani sabi moro. Fu eksempre, te wi e du stratiwroko, dan a no ben o fiti fu langa tijdschrift, brochure, noso buku gi iniwan sma di e waka pasa wi. Efu wi no man si efu a sma wani sabi moro trutru, dan a ben o moro bun fu gi en wan traktaat.

A no fu di wan preikiman man gi furu bijdrage meki a musu teki furu publikâsi na a buku tafra. Ma a musu teki soso san a abi fanowdu na ini en diniwroko. Den bijdrage a no fu pai gi den publikâsi, ma na fu horibaka gi ala den sani di abi fu du nanga a preikiwroko fu wi di e du na heri grontapu. Wi no o gi san tan abra fu wi moni, ma awansi wi gudu noso pôti wi o gi ala san wi man fu horibaka gi a Kownukondre (Mark. 12:41-44; 2 Kor. 9:7). Disi o meki tu taki wi o teki soso den publikâsi di wi abi fanowdu, fu di na so fasi wi no o frumorsu den publikâsi di meki nanga a bijdrage di sma e gi.

[Prenspari pisi na tapu bladzijde 2]

Preikiman musu abi a koni fu man si efu a sma wani sabi moro