Yepi sma fu arki Gado
1. Sortu nyun brochure wi ben kisi na a „Meki Gado Kownukondre kon!” Distrikt Kongres, èn fu san ede den brochure disi na bun wrokosani?
1 Na a „Meki Gado Kownukondre kon!” Distrikt Kongres wi ben kisi tu nyun brochure, Arki Gado èn libi fu têgo nanga wan moro makrikiwan di nen Arki Gado. Fu di furu sani no skrifi na ini, meki wi ben man vertaal den esi èn moro makriki. Di a brochure Arki Gado èn libi fu têgo ben kon na doro na ini Ingrisitongo, dan primisi ben gi kaba fu vertaal en na ini ete 431 tongo.
2. Suma sa man gebroiki den brochure disi bun?
2 Suma sa man gebroiki den brochure disi bun? Luku den situwâsi disi di e pasa furu na heri grontapu:
• Wan preikiman abi wan takimakandra nanga wan ososma a fosi leisi noso na wan gobaka, èn a preikiman si taki na ososma no man leisi noso taki a no man leisi bun.
• Wan preikiman e preiki gi sma di e taki wan tongo pe wi no vertaal publikâsi noso pe wi vertaal wan tu publikâsi nomo na ini. Noso moro furu sma na ini a kontren man taki a tongo fu den, ma den no man leisi sani na ini a tongo.
• Wan preikiman e gebroiki dofusma-tongo fu preiki gi wan dofusma na ini en kontren.
• Wan papa noso mama wani leri en yongu pikin di no man leisi ete, sani fu Bijbel.
3. San yu e si na den bladzijde fu na Arki Gado brochure?
3 Fa den brochure disi seti: Arki Gado no abi furu sani di skrifi na ini. Moro furu na wán zin nomo èn wan Bijbeltekst skrifi na ondrosei fu ibri bladzijde, fu poti krakti na tapu den edepenti. Fu san ede? Kon meki wi taki dati wan sma wani gi yu wan brochure di skrifi na ini wan tongo di yu no man leisi fu di yu no sabi den letter di den e gebroiki na ini a brochure. Yu ben o wani a brochure, srefi efu a abi moi prenki? Moro furu sma no ben o wani a brochure. Na so a de tu taki sma di no man leisi, no wani abi buku pe sani skrifi na ini. Fu dati ede, na ibri bladzijde moi prenki de. Den peiri di de na den prenki e sori fu sortu prenki yu musu taki.
4. San yu e si na den bladzijde fu na Arki Gado èn libi fu têgo brochure?
4 Arki Gado èn libi fu têgo brochure abi den srefi prenki leki na Arki Gado brochure. A meki fu studeri nanga sma di no man leisi bun noso di e leri leisi. Preikiman kan gebroiki a brochure disi tu te den e studeri nanga wan sma na ini na Arki Gado brochure. Ibri les abi tu bladzijde èn wan aksi de na a kruktu-anusei na tapusei fu a bladzijde. A piki de fu feni na tapu den bladzijde disi. Sani skrifi tu na den prenki èn sosrefi Bijbeltekst. Na ondrosei fu furu fu den bladzijde, wan faki de pe moro sani skrifi na ini èn sosrefi Bijbeltekst di yu kan taki fu den, efu a studenti o man frustan den.
5. O ten wi kan pristeri den brochure disi èn fa wi kan pristeri den?
5 Fa fu gebroiki den brochure: Yu kan pristeri iniwan fu den brochure disi awinsi o ten yu wani èn efu yu feni taki a ben o bun, srefi efu wi no e pristeri brochure a mun dati. (Luku a faki „Fa yu kan pristeri den”.) Yu kan pristeri en gi wan gobaka. Yu kan taigi a sma di wani sabi moro, taki yu wani sori en wan sani, èn dan yu kan gi en wan brochure.
6. Fa wi o hori wan Bijbelstudie nanga den brochure disi?
6 Fu di na Arki Gado brochure no abi aksi na ini, meki yu no sa abi wan aksi-nanga-piki takimakandra soleki fa wi gwenti du nanga a Bijbel leri-buku. Furu sma lobi te sma e fruteri tori. Sobun, gebroiki den prenki fu fruteri den tori disi di skrifi na ini Bijbel. Fruteri san den prenki e sori. Du en nanga prisiri. Aksi a studenti fu fruteri san a si èn san a e prakseri. Leisi den tekst di skrifi na ondrosei fu a bladzijde, èn taki nanga a studenti fu sori en san den tekst wani taki. Poti aksi gi en so taki a kan taki tu, èn fu de seiker taki a frustan a tori. Efu a e gebroiki na Arki Gado èn libi fu têgo brochure, dan leisi den sani di skrifi na ibri prenki èn sosrefi den Bijbeltekst, te yu e taki fu den prenki.
7. Fa wi kan yepi wi Bijbel studenti fu go na fesi?
7 Yepi a studenti fu go na fesi: Wi howpu taki a takimakandra di yu abi nanga a studenti o meki a wani sabi fa fu leisi so taki ensrefi kan kon leri sabi sani fu Yehovah (Mat. 5:3; Yoh. 17:3). Fu dati ede, efu yu e taki nanga sma fu na Arki Gado brochure, dan bakaten yu kan aksi a studenti fu leri en fu leisi, èn yu kan bigin studeri na Arki Gado èn libi fu têgo brochure. Te yu kaba studeri den brochure disi nanga a studenti, dan a no klari ete fu teki dopu. Yu musu bigin nanga a Bijbel leri-buku noso wan tra bun buku di sa yepi en fu frustan Bijbel moro bun.
8. Fu san ede yu de nanga tangi taki yu kisi den nyun wrokosani disi gi a diniwroko?
8 Efu sma wani libi fu têgo, dan den musu arki A Moro Heiwan fu hemel nanga grontapu (Yes. 55:3). Yehovah wani taki „ala sortu sma,” sosrefi den wan di no man leisi, musu leri fa fu arki en (1 Tim. 2:3, 4). Wi breiti srefisrefi nanga den nyun wrokosani disi di wi kan gebroiki fu leri sma fa den musu arki Gado!
[Faki na tapu bladzijde 3]
Fa yu kan pristeri den
Sori na ososma bladzijde 2 nanga 3, èn taki: „Yu ben o wani libi na ini so wan grontapu? [Gi a sma na okasi fu piki.] Bijbel e pramisi wi [noso a santa buku disi e pramisi wi] taki heri esi Gado o meki grontapu tron wan heri moi presi pe freide de èn pe nowan sma o pôti èn siki. Luku san wi musu du fu libi na ini a grontapu dati. [Leisi Yesaya 55:3, di skrifi na tapusei fu bladzijde 3.] A tekst disi e taigi wi fu „kon” na Gado èn fu „arki” en. Ma fa wi kan arki Gado?” Go na bladzijde 4 nanga 5 èn taki nanga en fu a piki. Efu a no abi ten, dan libi a brochure gi en èn seti sani fu go baka na en èn fu taki fu a piki.