Suma ben o wani leisi a tijdschrift disi?
1. Te wi e leisi A Waktitoren nanga na Ontwaakt!, dan san wi musu prakseri èn fu san ede?
1 A Waktitoren nanga na Ontwaakt! skrifi gi ala sma na grontapu. Dati meki den artikel e taki fu furu difrenti tori. Te wisrefi e leisi wan artikel na ini wi eigi tijdschrift, dan wi musu prakseri sortu sma o wani leisi den sortu artikel dati, èn wi musu meki muiti fu prati en gi a sma dati.
2. Sortu artikel na ini den tijdschrift fu wi kan hari a prakseri fu den sma di wi e miti?
2 A nyun Waktitoren e taki fu wan Bijbel tori di yu nanga sma na wrokope ben taki fu en? Wan artikel de fu na osofamiri libi di kan yepi a famiri fu yu? Wan sma di yu sabi abi na prakseri fu go na wan kondre di na Ontwaakt! ben taki fu en? Yu kan gebroiki wan fu den tijdschrift na ini wan spesrutu bisnis kontren noso gi spesrutu lantikantoro na ini yu birti? Fu eksempre, wan tijdschrift di e poti prakseri na den problema fu owru sma, kan prati na den presi pe den e sorgu owru sma. Skowtu o feni den tijdschrift moi di e taki fu ogridu.
3. Gi wan eksempre di e sori o prenspari a de fu pristeri den spesrutu tijdschrift na den sma di wi denki taki den o wani leisi den.
3 San kan de a bakapisi: Baka di wan trowpaar na ini Zuid-Afrika kisi na Ontwaakt! fu oktober 2011 „Kinderen opvoeden tot verstandige volwassenen”, den bèl moro leki 25 skoro na ini a kontren fu a gemeente fu den. Tutenti na tu skoro teki tijdschrift èn prati den gi den pikin. Wan tra trowpaar na ini a kondre ben du a srefi sani èn den prati den tijdschrift na den skoro na ini den kontren. Wan tu fu den leriman na wan skoro bosroiti srefi fu gebroiki a tijdschrift ibri wiki na den lès fu den. A trowpaar fruteri a kring-opziener na ondrofenitori. Dan a kring-opziener gi den gemeente na ini en kring deki-ati fu go preiki na den skoro na ini a kontren fu den. Sma seni aksi a bijkantoro so furu fu den spesrutu tijdschrift disi, taki den ben musu print den tijdschrift disi baka!
4. Fu san ede wi wani prati den tijdschrift so furu leki wi man?
4 Den tijdschrift fu wi e taki fu san ede son sani e pasa na ini a ten disi èn san wi kan leri fu dati. Den e poti prakseri tu na Bijbel nanga a Kownukondre fu Gado. Den na den wan-enkri tijdschrift na grontapu di e „fruteri taki frulusu o kon” (Yes. 52:7). Dati meki wi wani prati so furu tijdschrift leki wi man. Wan bun fasi fu du dati na te wi e aksi wisrefi: ’Suma ben o wani leisi a tijdschrift disi?’