Wi o prati a traktaat Kownukondre nyunsu nr. 38 na ini november!
1. San sma wani sabi te wan sma dede èn fa wi o piki den aksi fu den na ini november?
1 Dede na wan feanti fu ala sma, awansi fu sortu kerki den de (1 Kor. 15:26). Furu sma e aksi densrefi pe den dedewan de èn efu den o si den wan dei baka. Fu dati ede den gemeente na heri grontapu o prati a Kownukondre nyunsu nr. 38 di nen Sma di dede o man libi baka trutru? Wi o du dati wan heri mun langa, èn wi o bigin 1 november. Baka te wi kaba prati a Kownukondre nyunsu nr. 38 traktaat, dan wi kan tan gebroiki en na ini a diniwroko.
2. Fa a Kownukondre nyunsu nr. 38 seti?
2 Fa a traktaat seti: Kownukondre nyunsu nr. 38 meki na so wan fasi taki yu kan fow en so taki na fesisei fu a traktaat yu kan si a nen nanga den aksi: „Yu ben o piki . . . iya? no? kande?” Te a sma di kisi a Kownukondre nyunsu-traktaat opo en dan a o si fa Bijbel e piki na aksi di de sosrefi a nen fu a traktaat èn san a pramisi fu Bijbel kan du gi en. Ensrefi o si fu san ede a kan bribi na ini Bijbel. Wan moi aksi de na bakasei fu a Kownukondre nyunsu-traktaat di a kan prakseri fu en èn tapu a traktaat wan aksi poti efu a wani leri moro.
3. Fa wi o prati Kownukondre nyunsu nr. 38?
3 Fa wi o prati a traktaat: Wi o prati a traktaat na a srefi fasi leki fa wi e prati a kari gi a Memrefesa nanga a kari gi a distrikt kongres. Soleki fa a brifi fu 1 april 2013 taki, dan den owruman o sreka sani fu wroko a kontren fu den. Den gemeente di no abi furu kontren fu wroko kan yepi den tra gemeente di abi wan bigi kontren èn di de na ini a birti. No frigiti taki te yu e teki yu Kownukondre nyunsu nr. 38, dan yu musu teki soso san yu abi fanowdu gi wán wiki. Te yu kaba du na oso-fu-oso preikiwroko fu prati den traktaat, dan yu kan prati den traktaat gi den sma di yu e miti na pasi. Efu unu kaba prati ala den traktaat fosi a mun tapu, dan yu kan pristeri den publikâsi fu a mun dati. A fosi satra fu a mun wi o du a spesrutu wroko disi, na presi fu bigin Bijbelstudie. Satra nanga sonde wi kan prati den tijdschrift fu wi efu a de fanowdu. Yu e seti sani fu du a spesrutu wroko disi fayafaya?