Fa wi kan sreka wisrefi fu bigin wan takimakandra na wan bun fasi?
1. Fu san ede a prenspari fu bigin wan takimakandra na wan bun fasi?
1 Te yu smeri a switi smeri fu wan nyanyan, dan dati e gi yu angri fu nyan en. Sosrefi te wi e bigin wan takimakandra na wan bun fasi, dan dati e gi wi na okasi fu abi wan bun Bijbel takimakandra. Den tori di wi e taki na a bigin kan langa noso syatu. Ma ala ten wi musu sreka bun na fesi, neleki te wi o bori wan switi nyanyan. Te wi e du dati, dan den sani di wi o taki o abi bun bakapisi (Odo 15:28). San wi musu du so taki den sani di wi e taki na a bigin kan abi bun bakapisi?
2. Fa wi kan sreka so taki den sani di wi e taki na a bigin kan hari a prakseri fu wan ososma?
2 Taki fu sani di na ososma lobi: Den sani di wi e taki na a bigin musu meki na ososma wani arki go doro. Efu wi no e du dati, dan a o wani tapu a takimakandra. Sobun te yu e sreka yusrefi, dan prakseri sortu tori den sma na ini a birti lobi. Den sma na ini a birti wani wan moro bun tirimakti, wan koloku osofamiri libi, noso den e broko den ede nanga den furu ogri di e pasa? Sma gwenti taki fa den e denki, sobun sreka wan aksi di o meki sma taki fa den e denki fu wan tori. Kande yu kan gebroiki wan fu den eksempre na ini Wi Kownukondre Diniwroko di e sori fa fu pristeri den tijdschrift. Yu kan fiti wan fu den eksempre disi na a kontren fu yu. A ben o bun son leisi fu oefen fa fu bigin wan takimakandra, te yu e hori yu Osofamiri Anbegi.
3. Fa wi kan hori a kulturu nanga a kerki fu a sma na prakseri te wi e bigin wan takimakandra?
3 Luku a kulturu nanga a kerki fu a sma: Na son presi sma wani taki wi musu taki wantewante fu san ede wi kon na den. Ma na tra presi sma kan feni taki yu no abi maniri efu yu no e aksi fosi fa a de nanga na ososma èn efu yu no fruteri wan sani fu yusrefi. Na ini son kontren pe sma abi wan Kresten bribi, den no abi trobi efu wantewante wi e gebroiki wi Bijbel na a bigin fu a takimakandra (Tori 2:14-17). Ma na tra presi sma no abi wan Kresten bribi noso den no de fu wan kerki srefi. Dan a ben o moro bun fu taki fu Bijbel te yu o go baka na a sma, na presi fu du dati a fosi leisi te yu miti en.—Tori 17:22-31.
4. Sortu sani wi musu hori na prakseri te wi e bigin wan takimakandra nanga wan sma?
4 Den sani di wi e taki na a bigin: Sreka bun san yu o taki na a bigin. A ben o moro bun fu taki sani syatu èn na wan makriki fasi. A prenspari tu fu sabi fa wi e taki nanga sma na a bigin. De nanga prisiri. Lafu switi nanga a sma so taki a kan si taki yu e broko yu ede nanga en. Te wi e gebroiki den rai disi, dan den sani di wi e taigi den sma na a bigin fu a takimakandra o gi den deki-ati fu nyan na „a tafra fu Yehovah”.—1 Kor. 10:21.