Wi abi moi nyun traktaat!
1. Sortu nyun sani wi kisi gi a preikiwroko?
1 Na a ’Gado Wortu e taki san tru!’ Distrikt Kongres 2013, wi kisi feifi nyun traktaat. Boiti dati, wi kisi Kownukondre Nyunsu nr. 38. A traktaat dati nen „Sma di dede o man libi baka trutru?” Ala den siksi traktaat disi seti na wan tra fasi leki fa wi ben gwenti. Fu san ede den seti na a fasi disi? Fa wi kan gebroiki den traktaat disi bun te wi e preiki oso fu oso?
2. Fu san ede den traktaat seti na wan tra fasi?
2 Fu san ede den traktaat seti na wan tra fasi: Fu man abi bun bakapisi na ini a preikiwroko wi musu du den fo sani disi: (1) Fu man bigin wan takimakandra, dan aksi a sma fa a e denki fu wan tori. (2) Taki fu wan Bijbeltekst. (3) Gi a sma wan sani fu leisi. (4) Poti wan aksi di yu o piki wan tra leisi èn seti sani fu go baka na a sma. A fasi fa den traktaat seti e yepi wi fu du den fo sani disi.
3. Fa wi kan gebroiki den nyun traktaat na ini a preikiwroko?
3 Fa fu gebroiki den: (1) Taki na ososma odi èn sori en na aksi nanga den dri piki di de na fesisei fu a traktaat èn aksi en san a ben o piki. (2) Opo a traktaat èn taki fu a pisi „San Bijbel e taki”. Èn baka dati, opo yu Bijbel èn leisi a tekst efu dati kan. Efu na ososma abi ten, dan taki fu a pisi „Fa dati kan yepi wi?” (3) Gi a sma a traktaat èn gi en deki-ati fu leisi a heri traktaat na wan tra ten. (4) Fosi yu gowe, sori en na aksi na bakasei fu a traktaat na a pisi di nen „Prakseri fu a sani disi”. Seti sani fu sori en wan tra leisi fa Bijbel e piki na aksi disi.
4. Fa wi kan gebroiki den nyun traktaat te wi de na wan gobaka?
4 A makriki tu fu tyari gobaka. Yu kan gebroiki den Bijbeltekst di skrifi na bakasei fu a traktaat fu piki na aksi di yu ben poti a lasti leisi di yu ben taki nanga a sma. Fosi yu gowe, dan sori en a prenki fu a Bun nyunsu-brochure di de na tapu a traktaat. Baka dati yu kan sori na ososma a brochure nanga a les pe a kan leri moro fu a tori disi. Gi na ososma a brochure. Efu a teki en, dan seti sani fu go baka na en fu taki fu a brochure. Na wan Bijbelstudie yu bigin kaba! Na presi fu a brochure yu kan gi a sma wan tra traktaat. Yu kan seti sani fu go baka na en fu taki fu a traktaat.
5. Fa den traktaat e yepi wi na ini a preikiwroko?
5 Wi e gebroiki traktaat moro leki 130 yari kaba na ini a preikiwroko. Aladi den no bigi a srefi èn den seti na wan tra fasi, toku wi ben man gebroiki den heri bun fu preiki gi sma. Meki wi gebroiki den nyun traktaat disi bun fu meki ala sma kisi sabi fu Bijbel.—Odo 15:7a.