Abi a gwenti fu kon biten
1. Sortu bun eksempre Yehovah e gi wi?
1 Yehovah no lati noiti. A e ’yepi den futuboi fu en na a yoisti ten’ (Hebr. 4:16). A e gi wi leri tu „na a reti ten” (Mat. 24:45). Fu dati ede wi kan de seiker taki a bigi dei fu en „no o kon lati” (Hab. 2:3). Wi e kisi furu wini fu di Yehovah no lati noiti! (Ps. 70:5) Ma fu di wi na sondusma èn wi abi furu fu du, meki a kan muilek srefisrefi gi wi fu kon biten. Fu san ede wi musu abi a gwenti fu kon biten?
2. Fu san ede a e gi Yehovah glori te wi abi a gwenti fu de biten?
2 Na ini den lasti dei disi furu sma lobi densrefi nomo èn den no man dwengi densrefi. Dati meki den no abi a gwenti fu kon biten (2 Tim. 3:1-3). Sobun, te Kresten abi a gwenti fu de biten na wroko, te den meki mofo fu miti wan sma, èn te den de biten na den konmakandra, dan tra sma e si dati èn disi e gi Yehovah glori (1 Petr. 2:12). A de so taki wi abi a gwenti fu de biten na wi grontapuwroko, ma wi gwenti kon lati te a abi fu du nanga na anbegi fu wi? Te wi e doro biten na den gemeente konmakandra, sobun fosi a singi nanga begi, dan wi e sori taki wi wani de leki wi hemel Tata di no de wan Gado fu bruya.—1 Kor. 14:33, 40.
3. Fu san ede wi kan taki dati wi e hori trawan na prakseri te wi abi a gwenti fu de biten?
3 Te wi abi a gwenti fu de biten, dan wi e sori taki wi e hori tra sma na prakseri (Fil. 2:3, 4). Fu eksempre, te wi de biten na den gemeente konmakandra èn sosrefi na den preikiwroko konmakandra, dan wi no o puru a prakseri fu den tra brada nanga sisa. Ma te wi abi a gwenti fu kon lati, dan dati kan gi sma a firi taki den sani di wi musu du, prenspari moro di fu den. Te wi abi a gwenti fu de biten, dan wi e sori taki tra sma kan frutrow wi èn taki wi no lesi. Furu sma e warderi en te wi abi den fasi disi.
4. Efu wi abi a gwenti fu kon lati, dan san wi kan du fu kenki dati?
4 Efu yu abi a gwenti fu kon lati, dan prakseri fa dati du kon. Meki wan bun schema so taki yu kan du sani na a yoisti ten (Preik. 3:1; Fil. 1:10). Aksi Yehovah meki a yepi yu (1 Yoh. 5:14). Te wi abi a gwenti fu de biten, dan wi e sori taki wi e frustan den tu moro bigi wet, èn dati na fu lobi Gado èn fu lobi tra sma.—Mat. 22:37-39.