Teki a bun eksempre fu den profeiti—Sefanya
1. Fa sani ben de na ini Yuda na ini a ten fu a profeiti Sefanya? Fa Sefanya de wan bun eksempre gi wi?
1 A ben de na a ten fu a yari 659 fosi Krestes, èn den sma na ini Yuda ben e anbegi a gado Bâal. No so langa pasa sma ben kiri na ogri-ati Kownu Amon, èn now a yongu Kownu Yosia ben e tiri (2 Kron. 33:21–34:1). Na a ten dati Yehovah seni Sefanya fu taigi a pipel taki a o strafu den. Aladi a kan taki Sefanya ben de fu a kownu famiri fu Yuda, toku a no ben frede fu taigi den tiriman fu Yuda krin taki Yehovah krutu den (Sef. 1:1; 3:1-4). Wi musu abi deki-ati tu neleki Sefanya èn wi no musu meki famiriman tapu wi fu anbegi Yehovah (Mat. 10:34-37). Sortu boskopu Sefanya ben tyari èn san ben de den bakapisi?
2. San wi musu du efu wi wani kisi kibri na a dei fu Yehovah en atibron?
2 Suku Yehovah: Na Yehovah wawan o man kibri sma na a dei fu en atibron. Dati meki Sefanya begi a pipel fu Yuda fu suku Yehovah, fu suku retidu, èn fu suku safri-ati na ini a ten di ben tan abra (Sef. 2:2, 3). Na so a de tu na ini a ten disi. Neleki Sefanya wi e gi sma deki-ati fu suku Yehovah. Ma wi srefi musu abi a fasti bosroiti tu fu no ’drai baka noiti gi Yehovah’ (Sef. 1:6). Na presi fu dati wi e suku Yehovah fu di wi e studeri en Wortu finifini èn fu di wi e begi en fu sori wi a reti pasi. Wi e suku retidu fu di wi e wai pasi gi sani di no fiti. Te wi abi sakafasi èn te wi de gaw fu gi yesi na den rai fu Yehovah en organisâsi, dan wi e sori taki wi na safri-ati sma.
3. Fu san ede wi no musu lasi-ati te wi e du a preikiwroko?
3 Bun bakapisi: A krutuboskopu fu Sefanya naki na ati fu wan tu sma na ini Yuda. A moi fu si tu taki a naki na ati fu a yongu Kownu Yosia, di bigin suku Yehovah di a ben de wan pikin boi ete. Bakaten Yosia du ala san a man fu puru afkodrei na ini a kondre (2 Kron. 34:2-5). Na ini a ten disi a kan pasa taki son siri e fadon seipasi, tapu ston-gron, èn na mindri makabon. Ma sonwan fu den siri e fadon tu na tapu bun gron èn den e gi nyanyan (Mat. 13:18-23). Wi abi a frutrow taki Yehovah o tan blesi wi te wi e tan du muiti fu panya a boskopu fu a Kownukondre.—Ps. 126:6.
4. Fu san ede wi musu ’tan fruwakti Yehovah’?
4 Son sma na ini Yuda ben e denki taki Yehovah ben o libi sani leki fa den de. Ma Yehovah taigi den alamala krin taki a bigi dei fu en ben de krosibei (Sef. 1:12, 14). Soso den sma di ben suku kibri na en ben o tan na libi (Sef. 3:12, 17). Meki wi ’tan fruwakti Yehovah’ èn meki wi prisiri fu dini wi makti Gado makandra nanga tra anbegiman!—Sef. 3:8, 9.