Gebroiki ibri okasi fu preiki a Kownukondre boskopu!
1. San wi kan leri fu David?
1 Kownu David no ben meki a situwâsi fu en tapu en fu du wan sani. Fu eksempre, a ben wani bow wan tempel gi Yehovah. Ma di Yehovah taigi en taki dati no ben o man, dan David sreka sani so taki Salomo ben kan bow a tempel (1 Kow. 8:17-19; 1 Kron. 29:3-9). Na presi fu tan prakseri san a no ben man du, David ben luku san a ben man du. Fa wi kan teki na eksempre fu David te wi e suku okasi fu preiki a Kownukondre boskopu?
2. Fu san ede a bun fu luku a situwâsi wi?
2 Du san yu man: Furu sma tyari kenki kon na ini den libi fu man tron yepipionier noso gewoon pionier (Mat. 6:22). Yu kan du dati tu? Efu yu e begi fu a tori disi èn yu e luku a situwâsi fu yu bun, dan a kan taki yu o si dati ’moi okasi de fu du furu wroko’. Efu dati de so, no draidrai fu gebroiki den okasi dati!—1 Kor. 16:8, 9.
3. Efu wi no man pionier, dan sortu okasi wi kan gebroiki fu preiki?
3 Ma san yu kan du efu yu no man pionier? No frigiti taki tra okasi de tu. A kan taki yu e miti sma na wrokope di no de Kotoigi. Fu san ede yu no e suku wan bun okasi fu preiki gi den? Efu yu abi problema nanga a gosontu fu yu, dan kande yu kan preiki gi den sma di e gi yu datrayepi. No frigiti taki wi abi wan seti gi den preikiman di no man du so furu moro fu di den owru noso fu di den siki hebi. Efu den preikiman disi preiki 15 miniti, dan den mag skrifi dati tapu den preikiwroko raportu. Te yu o skrifi omeni yuru yu preiki, no frigiti fu skrifi a ten di yu preiki gi sma na difrenti okasi èn skrifi omeni buku nanga traktaat yu prati. Skrifi tu omeni papira yu prati fu gi sma wan kari gi a Memrefesa nanga a kongres. Te yu o teri den syatu pisi ten di yu preiki gi sma, dan yu o fruwondru fu si o furu a e tron.
4. Sortu deki-ati wi e kisi?
4 Awinsi fa a situwâsi fu wi de, meki wi gebroiki ibri okasi fu preiki a bun nyunsu. Te wi du dati, dan wi o firi koloku fu di wi sabi taki wi e du ala san wi man fu horibaka gi a Kownukondre.—Mark. 14:8; Luk. 21:2-4.