Pionier

Wan moro bun fasi fa wi kan gebroiki wi krakti, na te wi poti marki fu du moro na ini a diniwroko (1Kor 9:26). Te wi e poti marki, dan dati o yepi wi fu gebroiki wi ten bun na ini a syatu pisi ten di tan abra, fosi a grontapu disi kisi pori (Ef 5:15, 16). Un kan taki na a Osofamiri Anbegi fu sortu marki unu wani doro na ini a nyun dienstyari di e kon? A studie-buku disi abi artikel di e taki fu difrenti sani di yu kan begi èn denki fu den. Den sani disi kan yepi yu.​—Yak 1:5.

Yu heri osofamiri kan horibaka gi awinsi wán sma na ini a oso, so taki a kan tron wan gewoon pionier? Efu yu no de seiker efu yu o man doro den yuru, dan yu kan taki nanga wan pionier di de na ini a srefi situwâsi leki yu (Odo 15:22). Kande yu kan interview wan pionier te unu e hori na Osofamiri Anbegi. Baka dati un kan meki wan tu schema. Efu yu ben e pionier fosi, dan luku fa a situwâsi fu yu de now fu sabi efu yu o man pionier baka.

Wan tu sma na ini yu osofamiri kan tron yepipionier gi wán mun noso moro langa? Efu yu no abi furu krakti, dan kande yu o man go na ini a yepipionier te yu e preiki pikinso ibri dei. Efu yu no abi furu ten fu preiki mindriwiki, fu di yu e wroko heri wiki noso fu di yu e go na skoro, dan kande yu kan go na ini a yepipionier na ini wan mun di abi wan fesa-dei noso feifi satra nanga sonde. Skrifi tapu wan kalender o ten yu wani bigin nanga a yepipionier-wroko èn meki wan schema.​—Odo 21:5.

LUKU A FELEM ABI DEKI-ATI . . . PIONIER. BAKA DATI PIKI NA AKSI DISI:

• Fa Yehovah sorgu gi sisa Aamand? San disi e leri wi?