Tan na ai gi tesi

1-2. (a) Sortu warskow Yesus ben gi den disipel fu en? (b) Fu san ede den disipel gwe libi Yesus? (Luku den prenki.)

„A TRU taki na ati wani, ma a skin swaki” (Mat. 26:41b). Yesus ben taki a sani disi fu di a ben e ferstan taki wi abi sondu. Ma a ben taki a sani disi tu fu gi wi a warskow disi: No denki taki ala ten yu o tranga nofo fu du san bun. Wan tu yuru fosi Yesus ben taki den wortu dati, den disipel fu en ben pramisi en taki den no ben o gwe libi en noiti (Mat. 26:35). Den ben wani du san bun. Ma den no ben sabi taki te den ben o kisi tesi, dan kande a no ben o makelek gi den fu du san bun. Dati meki Yesus warskow den: „Un tan na ai èn begi doronomo, so taki unu no sondu te unu kisi tesi.”​—Mat. 26:41a.

² A sari taki den disipel no tan na ai. Di den srudati grabu Yesus, dan den disipel tan na en sei noso den gwe libi en? Fu di den no ben tan na ai, meki den du precies san den ben taki dati den no ben o du. Den gwe libi Yesus.​—Mat. 26:56.

3. (a) Efu wi wani tan gi yesi na Yehovah, dan fu san ede wi no musu denki taki ala ten wi o tranga nofo fu du san bun? (b) San wi o luku na ini na artikel disi?

³ Wi no musu denki taki ala ten wi o tranga nofo fu du san bun. A tru taki wi no wani du nowan enkri sani di Yehovah no feni bun. Ma wi na sondu sma èn a kan psa makelek taki wi du wan sondu (Rom. 5:12; 7:21-23). Sondro taki wi e ferwakti dati, wi kan kisi tesi fu du wan sani di no bun. Efu wi wani tan gi yesi na Yehovah nanga en Manpkin, dan wi musu gi yesi na a rai di Yesus e gi wi fu tan na ai gi tesi di kan meki taki wi du sondu. Na artikel disi kan yepi wi fu du dati. Wi o luku fosi nanga sortu sani wi musu luku bun. Baka dati, wi o luku fa wi kan kakafutu gi tesi. Leki lasti, wi o luku fa wi kan tan na ai.

SABI SAN NA DEN SWAKIFASI FU YU

4-5. Fu san ede a prenspari taki wi e wai pasi srefi gi pkinpkin sondu?

⁴ Srefi pkinpkin sondu kan pori a matifasi di wi abi nanga Yehovah. Boiti dati, den kan meki wi du moro seryusu sondu.

⁵ Wi alamala e kisi tesi fu du wan sani di no bun. Ma wi alamala abi wi eigi swakifasi. Sobun, san de wan tesi gi wi, no abi fu de wan tesi gi trawan. Fu eksempre, kande wan sma di trow wani abi seks nanga wan sma di no de en trowpatna, noso kande wan sma di no trow wan abi seks nanga wan trawan aladi den no trow. Kande wan tra sma musu kakafutu gi a tesi di a e kisi fu du wan sani di no krin. Kande a musu hori ensrefi fu no prei nanga en syen presi noso fu luku porno. Ma a kan tu taki wan tra sma e atibron esi, kande a abi heimemre, noso kande a no abi a dek’ati fu du san bun fu di a e frede san trawan o denki. Soleki Yakobus ben taki, dan „ibri sma e kisi tesi fu di en eigi lostu e hari en èn e kori en”.​—Yak. 1:14.

6. Fa wi no musu denki?

⁶ Yu sabi san na den swakifasi fu yu? A no bun te wi e du neleki wi no abi swakifasi noso te wi e denki taki wi tranga nofo fu kakafutu gi sondu (1 Yoh. 1:8). No fergiti, Paulus ben taki dati srefi den wan di de „lepi Kresten” kan du wan sondu te den no e tan na ai gi tesi (Gal. 6:1). Dati meki wi musu de eerlijk nanga wisrefi taki wi abi swakifasi èn wi musu sabi san na den swakifasi fu wi.​—2 Kor. 13:5.

7. San wi musu tan hori na prakseri? Gi wan eksempre.

⁷ Te wi kon sabi san na den swakifasi fu wi, dan san wi musu du? Wi musu du ala san wi man fu kakafutu gi den tesi di wi o kisi. Luku na eksempre disi: Na ini Bijbel ten, a moro swaki pisi fu a skotu fu wan foto, ben de den portu. Dati meki furu waktiman ben musu de na den portu fu man kibri a foto. Na so a de tu taki wi musu tan hori den swakifasi fu wi na prakseri, fu di dati o yepi wi fu kakafutu moro bun gi tesi.​—1 Kor. 9:27.

FA WI KAN KAKAFUTU GI TESI

8-9. San a yonguman na ini Odo kapitel 7 ben musu du fu man wai pasi gi wan seryusu sondu? (Odo 7:8, 9, 13, 14, 21)

⁸ Fa wi kan kakafutu gi tesi nanga sondu? Luku san wi kan leri fu a yonguman di kari na ini Odo kapitel 7. A ben du wan seryusu sondu fu di a ben abi seks nanga wan uma di ben gwenti abi seks nanga furu man. Vers 22 e taki dati „fosi yu denki” a yonguman hari go baka na uma disi. Ma soleki fa den vers na fesi e sori, dan a ben teki wan tu don besroiti di meki taki te fu kba a no ben man kakafutu moro gi sondu.

⁹ Sortu sani a yonguman ben du fosi a du wan seryusu sondu? A fosi sani, na taki di son ben e dongo kba, „a ben e waka na strati, dan a doro krosbei fu na uku fu a pasi pe na uma e tan”. (Leisi Odo 7:8, 9.) Èn di a si na uma, a no drai gwe. Na presi fu dati a meki na uma bosi en èn a arki di a ferteri en fu den freide-ofrandi di a ben tyari. Kande na uma ben taki den sani dati fu di a no ben wani taki a yonguman si en leki wan takru sma. (Leisi Odo 7:13, 14, 21.) Efu a yonguman no ben teki den don besroiti disi, dan a ben o man kakafutu gi a tesi èn a no ben o du wan sondu.

10. Fa wan sma na ini a ten disi kan meki a srefi fowtu di a yonguman ben meki?

¹⁰ A tori disi e sori san kan psa nanga ibriwan fu den anbegiman fu Yehovah. Kande wan brada noso wan sisa du wan seryusu sondu, èn bakaten a e taki dati ala sani psa wantronso. Noso kande a e taki: „Mi no ben ferwakti taki a sani disi ben o psa”. Ma efu a de eerlijk, dan a o si taki a teki wan tu don besroiti di meki taki a du a sondu. Kande a ben abi mati di no lobi Yehovah. Noso kande a luku felem di no fiti èn a go tapu website noso na presi di no bun gi wan Kresten. Kande a tapu fu begi, fu leisi Bijbel, fu go na den konmakandra, noso fu teki prati na a preikiwroko. Neleki a yonguman na ini Odo, a du wan sondu fu di a ben teki furu don besroiti.

11. San wi musu du fu sorgu taki wi no e sondu?

¹¹ San wi e leri fu a tori disi? Boiti taki wi no musu sondu, wi musu luku bun tu taki wi no e du don sani di kan meki taki wi sondu. Na disi Salomo ben tyari kon na krin baka di a ferteri san ben psa nanga a yonguman di ben go na a huru-uma. A ben taki fu na uma: „No go pe a e go” (Odo 7:25). A ben taki srefi: „Tan fara fu na uma disi. No go krosbei fu a mofodoro fu en oso” (Odo 5:3, 8). Iya, wi e kakafutu gi sondu te wi e tan fara fu situwâsi di kan meki taki wi du sondu.a Disi wani taki dati aladi a no fowtu taki wan Kresten e du wan spesrutu sani, tòg wi no o du a sani dati efu wi sabi taki a kan tron wan tesi gi wi fu du sondu.​—Mat. 5:29, 30.

12. Sortu besroiti Yob ben teki èn fa dati yepi en fu kakafutu gi tesi? (Yob 31:1)

¹² Efu wi wani wai pasi gi situwâsi di kan meki taki wi sondu, dan wi musu teki a besroiti fu tan na ai. Na dati Yob du. A „meki wan ferbontu nanga [en] ai” fu no luku tra uma nanga a prakseri fu du hurudu nanga den. (Leisi Yob 31:1.) Te a ben o du san a besroiti, dan dati ben o yepi en fu no kon na ini situwâsi di ben kan meki taki a du hurudu. Wi kan teki a besroiti tu fu wai pasi gi iniwan sani di kan tron wan tesi gi wi.

13. Fu san ede wi musu luku bun nanga san wi e prakseri? (Luku den prenki.)

¹³ Wi musu luku bun tu nanga san wi e prakseri (Eks. 20:17). Son sma e bribi taki a no fowtu fu tan prakseri wan sani di no bun, solanga den no e du a sani dati. Ma a no bun fu denki so. Te wan sma e tan prakseri wan sani di no bun, dan a o angri moro fu du a sani dati. Now a sani disi kon tron wan tesi gi en èn a e meki en moro muilek gi ensrefi fu kakafutu gi a tesi dati. A no de fu taki dati wi kan kisi takru prakseri son leisi. Ma te dati psa, dan a prenspari taki wi e puru den prakseri dati wantewante èn wi musu prakseri bun sani na presi fu dati. Te wi e du dati, dan wi no e gi pasi taki wan takru prakseri e tron wan tranga lostu. Na so wi o man kakafutu gi tesi di kan meki taki wi du wan seryusu sondu.​—Fil. 4:8; Kol. 3:2; Yak. 1:13-15.

14. San moro kan yepi wi fu kakafutu gi tesi?

¹⁴ San moro kan yepi wi fu kakafutu gi tesi? Wi musu bribi taki wi o kisi wini ala ten te wi e gi yesi na den wet fu Yehovah. Son leisi a kan taki den sani di wi e prakseri èn den sani di wi wani, a no sani di Yehovah feni bun èn kande a no makelek gi wi fu du san Yehovah e aksi fu wi. Ma te wi e du tranga muiti fu du san Yehovah wani, dan wi o de koloku trutru.

15. Efu wi e leri fu „lobi san bun”, dan fa dati o yepi wi fu kakafutu gi tesi?

¹⁵ Wi musu kon abi na angri fu du san bun. Efu wi e leri fu ’no lobi ogri kwetkweti, ma fu lobi san bun’, dan dati o yepi wi fu du san bun èn fu wai pasi gi situwâsi di kan meki wi du sondu (Amos 5:15). Te wi e angri fu du san bun, dan dati o yepi wi tu fu kakafutu gi tesi te wi kon na ini wan situwâsi di wi no ben ferwakti.

16. Te wi e du sani di e tranga lobi di wi abi gi Yehovah, dan fa dati e yepi wi fu tan na ai? (Luku den prenki.)

¹⁶ Fa wi kan leri fu „lobi san bun”? Wi musu tan du sani di e tranga a lobi di wi abi gi Yehovah. Te wi de na den Kresten konmakandra èn te wi de na ini a preikiwroko, dan wi e tranga na angri di wi abi fu du san Yehovah feni bun èn na so wi no e kisi tesi fu du san no bun (Mat. 28:19, 20; Hebr. 10:24, 25). Te wi e leisi èn e studeri Gado Wortu, èn te wi e denki dipi fu den sani di wi leisi, dan wi o kon lobi san bun èn wi no o wani abi noti fu du nanga ogri (Yos. 1:8; Ps. 1:2, 3; 119:97, 101). Hori na prakseri san Yesus ben taigi den disipel fu en: „Begi doronomo, so taki unu no sondu te unu kisi tesi” (Mat. 26:41). Te wi e meki ten fu begi wi hemel Tata, dan wi e gi en na okasi fu yepi wi èn wi o tan du san a feni bun.​—Yak. 4:8.

FA WI KAN TAN NA AI

17. Sortu swakifasi ben tan wan tesi gi Petrus?

¹⁷ Kande wi kan wini wan tu fu den swakifasi fu wi. Ma kande wi e si tu taki wi musu tan kakafutu wan heri pisi ten gi tra swakifasi. Luku na eksempre fu na apostel Petrus. Fu di a ben e frede, meki a taki dri leisi taki a no ben sabi Yesus (Mat. 26:69-75). Ma bakaten a ben gersi leki Petrus ben wini a swakifasi dati, fu di a no ben e frede fu opo taki gi Yesus na fesi a Sanhedrin (Tori 5:27-29). Ma wan tu yari baka dati, a tapu fu nyan makandra nanga den Kresten di no ben de Dyu, „fu di a ben frede den sma di besnèi” (Gal. 2:11, 12). A swakifasi fu Petrus ben opo kon baka. Kande a no ben wini a swakifasi dati noiti.

18. San kan psa nanga son swakifasi di wi abi?

¹⁸ Wan srefi sortu situwâsi kan miti wi. Fa so? Neleki fa a ben de nanga Petrus, a kan taki wi musu tan kakafutu gi wan swakifasi, aladi wi ben denki taki wi ben wini a swakifasi dati kba. Wan brada e taki: „Mi kakafutu gi porno tin yari langa èn mi ben e bribi taki mi no ben abi a problema dati moro. Ma a swakifasi dati ben de leki wan ogri meti di ben e kibri e wakti teleki a ben kan feni a yoisti okasi fu beti mi baka.” Wi breiti taki a brada fu wi tan kakafutu gi a swakifasi fu en. A kon si taki a ben o abi fu kakafutu ibri dei gi a takru gwenti disi. Kande a o abi fu du dati solanga a e libi na ini na ogri grontapu disi. Now a e du ala san a man fu sorgu taki a e tan fara fu porno, èn en wefi nanga den owruman de wan bigi yepi gi en.

19. Fa wi kan kakafutu gi wan swakifasi di wi no wini ete?

¹⁹ Fa wi kan sorgu taki wan swakifasi di wi no wini ete no e meki taki wi du sondu? Wi musu gi yesi na a rai di Yesus ben gi. A ben taki: „Tan na ai.” Srefi te yu e firi leki yu tranga nofo, tòg yu musu tan wai pasi gi situwâsi di kan tron wan tesi gi yu (1 Kor. 10:12). Tan du den sani di yepi yu kba fu kakafutu gi a swakifasi. Odo 28:14 e taki: „A sma di ala ten e luku bun san a e du o de koloku.”​—2 Petr. 3:14.

WI O KISI WINI TE WI E TAN NA AI

20-21. (a) Sortu wini wi o kisi te wi e tan kakafutu gi tesi? (b) Te wi e du ala san wi man fu kakafutu gi tesi, dan san Yehovah o du gi wi? (2 Korentesma 4:7)

²⁰ Wi kan de seiker taki wi o kisi wini te wi e kakafutu gi tesi. Te wi du wan sondu, dan a kan taki wi e „nyan bun fu [dati] fu wan pisi ten nomo”, ma te wi e libi soleki fa Yehovah wani, dan wi o de moro koloku (Hebr. 11:25; Ps. 19:8). Dati de so fu di Gado meki wi fu libi soleki fa en wani (Gen. 1:27). Sobun, te wi e libi na wan fasi di Yehovah feni bun, dan wi o abi wan krin konsensi èn wan dei wi o man libi fu têgo.​—1 Tim. 6:12; 2 Tim. 1:3; Yud. 20, 21.

²¹ A tru taki „a skin swaki”. Ma disi no wani taki dati wi no man kakafutu gi den swakifasi fu wi. Yehovah de klarklari fu gi wi a krakti di wi abi fanowdu. (Leisi 2 Korentesma 4:7.) A bun fu hori na prakseri taki a krakti di bigi psa marki e kmoto fu Gado. Ma wi srefi musu du ala san wi man fu kakafutu gi tesi. Efu wi e du ala san wi man, dan wi kan de seiker taki Yehovah o gi wi moro krakti te wi e begi en fu yepi wi (1 Kor. 10:13). Iya, Yehovah kan yepi wi fu kakafutu gi tesi.