Sma e pori grontapu​—San Bijbel e taki?

„A weer e kenki so esi, taki efu wi no e luku bun, dan dyonsro wan bigi rampu o pasa na heri grontapu. Bigi foto e sungu. Na omeni kondre a weer faya srefisrefi. Na furu presi bigi winti e pori ala sani. Na ala sei sma e pina fu di den no man feni watra. Furu meti nanga bon lasi gowe. Den sani disi a no anansitori, na sani di e pasa trutru. Sabiman e taki dati efu wi no e tapu nanga den sani di wi e du fu man kisi sani soleki stroom, dan heri grontapu o pori te fu kaba.”​—Wan lezing fu António Guterres, edeman fu den Verenigde Naties. A ben taki fu a raportu di a VN-klimaatpanel tyari kon na doro tapu 4 april 2022.

„Sabiman warskow taki na ini den yari di e kon bijna ala den 423 bigi park  [na Amerkankondre] o pori fu di a weer e kon moro faya. Te wi e luku den sani disi di kan pasa, dan den gersi den sani di wi e leisi furu tron na ini Bijbel: faya nanga brudu, bigi pisi ijs di e smèlter gwe, a watra na ini den se e kon moro hei èn a weer e kon moro faya.”​—„Flooding Chaos in Yellowstone, a Sign of Crises to Come,” The New York Times, 15 yuni 2022.

Wan fasi de fu lusu den problema disi na grontapu? Efu wan lusu de, dan suma o du en? Luku san Bijbel e taki.

Bijbel ben taki kaba taki libisma ben o pori grontapu

Bijbel taki dati Gado o „pori den wan di e pori grontapu” (Openbaring 11:18). A Bijbel vers disi e leri wi dri sani:

1. 1. Den sani di libisma e du o pori furu sani na grontapu.

2. 2. Wan ten o kon taki libisma no o man pori grontapu moro.

3. 3. A no libisma, ma na Gado o lusu den problema disi na grontapu.

Wi kan de seiker taki a grontapu fu wi o kon bun baka

Bijbel taki dati „grontapu e tan fu ala ten” (Preikiman 1:4). Sma o libi na grontapu fu ala ten.

• „Na den reti-ati sma o kisi grontapu èn fu têgo den o tan libi drape.”​—Psalm 37:29.

Ala sani na grontapu o kon bun baka.

• „A sabana nanga den presi sondro watra o bari fu prisiri. Iya, a drei sabana o breiti srefisrefi èn a o lai bromki.”​—Yesaya 35:1.