Na heri grontapu a weer e kon faya pasa marki​—San Bijbel e taki?

Ini yuli 2022 nyunsu sori taki na heri grontapu a weer ben kon faya pasa marki:

• „China e warskow taki na ini sowan 70 foto a weer o kon faya pasa marki, èn disi o de a di fu tu leisi na ini a mun disi.”​—25 yuli 2022, CNN Wire Service.

• „Na heri Europa busi e bron fu di dei fu dei a weer e kon faya pasa marki.”​—17 yuli 2022,  The Guardian.

• „Na ini heri Amerkankondre a weer kon faya srefisrefi tapu sonde. Na ini someni foto na a syoro na owstusei, na ini son foto na zuidsei èn na mindrisei fu a kondre wi si taki a weer kon faya pasa marki.”​—24 yuli 2022, The New York Times.

San disi wani taki? Yu denki taki na ini a ten di e kon sma no o man libi moro na grontapu? San Bijbel e taki?

Bijbel ben taki na fesi taki a weer ben o kon faya pasa marki?

Iya. Bijbel ben taki kaba dati a weer ben o kon fayafaya pasa marki na ini a ten fu wi. Fu eksempre, Yesus ben taki dati wi ben o si „kefalek ogri sani” e pasa èn wi ben o „si bigi sani fu hemel” (Lukas 21:11). Fu di a weer na heri grontapu e kon faya dei fu dei, meki furu sma frede taki libisma o pori grontapu te fu kaba.

Yu denki taki libisma no o man libi moro na grontapu?

Nôno. Di Gado meki grontapu, a ben wani taki libisma libi na en tapu fu ala ten (Psalm 115:16; Preikiman 1:4). Dati meki a no o gi libisma na okasi fu pori a grontapu, ma soleki fa a pramisi, dan a o „pori den wan di e pori grontapu”.​—Openbaring 11:18.

Luku tu profeititori di e sori sortu tra sani Gado pramisi wi:

• „A sabana nanga den presi sondro watra o bari fu prisiri. Iya, a drei sabana o breiti srefisrefi èn a o lai bromki” (Yesaya 35:1). Gado no o meki grontapu kon tron wan drei sabana pe nowan sma o man libi, ma a o sorgu taki a heri grontapu o tron wan presi pe sma o man libi baka.

• „Yu poti prakseri na grontapu èn yu e blesi en. Yu meki grontapu kon gudu” (Psalm 65:9). Gado o blesi grontapu so taki a o tron wan paradijs.

Efu yu wani sabi san Bijbel profeititori e taki fu a fasi fa a weer ben o kenki, dan leisi na artikel di nen „Welke gevolgen heeft klimaatverandering voor onze toekomst? Wat de Bijbel zegt.”

Fu kon sabi san Bijbel e pramisi te a abi fu du nanga a fasi fa grontapu o kon bun baka, dan leisi na artikel di nen „Suma o kibri grontapu?”