Na heri grontapu sma e sutu trawan kiri nanga gon​—San Bijbel e taki?

Na ini yuli 2022, wi si taki na furu presi na grontapu sma sutu someni trawan kiri nanga gon.

• „A kondre Yapan èn tra kondre na heri grontapu skreki di wan sma kiri Shinzo Abe, wan pôpi politiekman fu Yapan [di ben de minister president fosi], aladi ogri no e pasa so furu ini a kondre disi èn den wet fu lanti e tapu sma fu man bai gon zomaar.”​—10 yuli 2022, The Japan Times.

• „Sma na Denemarken skreki di wan man sutu dri sma kiri na ini wan bigi mall fu Kopenhagen.”​—4 yuli 2022, Reuters.

• „Na Zuid-Afrika 15 sma kon lasi libi baka di sma bigin sutu nanga gon na ini wan bar na Soweto.”​—10 yuli 2022, The Guardian.

• „Moro leki 220 sma na Amerkankondre lasi libi di sma sutu den kiri nanga gon ini a weekend fu 4 yuli, wan bigi fesadei fu a kondre.”​—5 yuli 2022, CBS News.

Yu denki taki ala den ogri disi o kon na wan kaba wan dei? San Bijbel e taki?

Ogri o kon na wan kaba

Bijbel e kari a ten fu wi „den lasti dei”, wan ten pe sma ben o de nanga bigi atibron èn den ben o du ogri-ati sani nanga trawan (2 Timoteyus 3:1, 3). Den ogri sani disi di e pasa e meki sma frede (Lukas 21:11). Ma Bijbel e pramisi taki wan ten o kon pe ogri no o de moro èn „sma o tan na ini oso pe den e firi bun. Den no o bruya, èn nowan sma o kon muilek den na a presi pe den e tan” (Yesaya 32:18). Fa ogri o kon na wan kaba?

Gado o sorgu taki nowan ogri sma no de moro èn a o puru ala fetisani na pasi

• „Gado o figi den ogri sma puru na grontapu.”​—Odo 2:22.

• „Na ala sei fu grontapu [Gado] e meki feti kon na wan kaba. Den bo a e broko na tu èn den lansri a e koti pisipisi. Den fetiwagi a e bron na ini faya.”​—Psalm 46:9.

Gado o puru a rutu fu ala ogri fu di a o leri sma fu libi na ini freide

• „Den no o du nowan ogri èn den no o pori nowan sani na mi santa bergi, fu di heri grontapu o furu nanga a sabi fu Yehovah, neleki fa a se furu nanga watra.”​—Yesaya 11:9.

• Nownow kaba Gado e leri sma na heri grontapu fu tapu nanga ogri, fu stop gebroiki fetisani èn „fu naki den feti-owru kon tron plugu èn den lansri kon tron grasinefi”.​—Mika 4:3.

Efu yu wani sabi moro fu a ten pe nowan sma na grontapu no abi fu frede moro leki fa Bijbel e pramisi, dan leisi na artikel disi „Nooit meer angst​—Is dat mogelijk?”

Efu yu wani sabi sortu lusu de gi ala ogri, dan leisi na artikel „Eindelijk vrede op aarde!”