Kefalek faya weer na heri grontapu na ini a drei ten fu 2023—San Bijbel e taki?

Na heri grontapu libisma e kisi fu du nanga bun faya weer di noiti ete ben de èn den e miti tu nanga rampu di a kefalek faya weer disi e tyari kon. Luku den nyunsu di e kon now:

„Ini den 174 yari di sma marki den temperatuur na heri grontapu, fosi tron a weer ben faya so na ini a mun yuni.”—National Oceanic and Atmospheric Administration, U.S. Department of Commerce, 13 yuli 2023.
„Italiakondre, Spanyorokondre, Fransikondre nanga Polen e kisi fu du nanga bun faya weer. Na den eilanti fu Sicilia nanga Sardinia sma e ferwakti taki a weer kan faya so wan 48°C. Noiti ete a weer ben faya so na ini Europa.”—European Space Agency, 13 yuli 2023.
„O moro grontapu e kon waran, o moro wi kan ferwakti furu, nanga hebi alen di o sungu presi.”—Stefan Uhlenbrook, edeman fu hydrologie, watra nanga cryosfeer na a World Meteorological Organization, 17 yuli 2023.

Yu e broko yu ede te yu e si o furu rampu e psa na grontapu? Luku san Bijbel e taki fu a prenspari tori disi.

Rampu de wan pisi fu Bijbel profeititori?

Iya. Bun faya weer nanga tra fasi fu takru weer na sani di Bijbel ben taki dati ben o psa na ini a ten fu wi. Fu eksempre, Yesus ben taki na fesi taki wi ben o si „kefalek ogri sani” (Lukas 21:11). Fu di grontapu e kon moro waran dei fu dei, meki furu sma e frede taki libisma o pori grontapu krinkrin.

A grontapu o kisi pori?

Nono. Gado meki grontapu fu libisma tan fu têgo na en tapu (Psalm 115:16; Preikiman 1:4). Ensrefi pramisi taki a o „pori den wan di e pori grontapu.”—Openbaring 11:18.

Bijbel e sori taki Gado man èn taki a o kibri grontapu gi bigi rampu.

„[Gado] e meki a bigi winti saka, so taki den skwala fu se no rigeri moro” (Psalm 107:29). Gado abi makti abra a heri universum. A man sreka den sani ini a natuur di e tyari rampu kon èn di e meki libisma pina.
„Yu poti prakseri na grontapu èn yu e blesi en. Yu meki grontapu kon gudu” (Psalm 65:9). Gado o sorgu taki grontapu tron wan paradijs.

Efu yu wani sabi moro fu a pramisi ini Bijbel di e taki fu wan nyun grontapu, dan leisi na artikel „Suma o kibri grontapu?”