„Yehovah na mi Herder”
„Yehovah na mi Herder. Noti sa mankeri mi.” — PSALM 23:1.
1, 2. San David ben du so èn omeni psalm a ben meki?
TYARI kon pikinso na ini yu prakseri na tafereel di e kon now: Filistijnsrudati tanapu abrasei fu na legre fu Israël, Goliath, wan Filistijn reus, e tyalansi den fu wan feti. Wan yonguman, soso nanga wan slenger èn wantu ston, e lon go tapu en. Wan ston di marki bun e psa go na ini na edekrabasi fu na reus èn e kiri en. Suma ben de na yonguman? David, wan herder, di ben kisi na fruwondru wini disi nanga yepi fu Yehovah Gado. — 1 Samuël kapiter 17.
2 Baka wan pisten na yongu man disi ben tron kownu fu Israël, wan positie di a ben hori fotenti yari langa. A ben de wan koni harpu preiman èn ben meki furu singi ondro tiri fu santa yeye krakti fu Gado. David ben skrifi ooktu moro leki seibitenti moi Psalm di ben de wan fonten fu furu dek’ati nanga tiri gi Yehovah pipel na ini a ten disi. Na wan di sma sabi moro bun na Psalm 23. Fu san-ede yu no ben sa opo yu bijbel èn luku na tekst te wi e go luku na Psalm disi vers fu vers?
Yehovah wan lobi Herder
3. (a) Na sortu okasi David ben poti en libi na ini kefar? (b) Na sortu fasi Yehovah na wi Herder?
3 „Yehovah na mi Herder” (Psalm 23:1). Leki wan herder nanga ondrofeni David ben sabi fa a ben mu tiri den skapu, gi den nyanyan èn kibri den. Na so na wan bepaalde okasi a ben kibri en skapu tapu wan dek’atifasi teige wan lew èn na wan tra okasi teige wan beer (1 Samuël 17:34-36). Den skapu fu David ben abi wan fertrow sondro fu poti wan kondisi na ini den herder. Ma ini na matifasi fu en nanga Yehovah ensrefi ben de wan skapu. Fudi David ben firi ensrefi seiker na ini Yehovah lobi sorgu, meki a ben kan taki: „Yehovah na mi Herder.” Yu e ondrofeni na firi disi fu de na ondro na tiri fu na Bigi Herder, Yehovah Gado? En e tiri èn e gi nyanyan èn e kibri seiker den anbegiman fu en di yu kan teki gersi nanga skapu na ini a ten disi. Boiti fu dati getrow èn lobi ondroherder leki owruman di Gado poti ini den gemeente fu Yehovah Kotoigi e wroko tranga fu sorgu den skapu. — 1 Petrus 5:1-4.
4. Fa wi situatie de na ini a ten disi te yu sa teki en gersi nanga di fu den Israëlsma na ini na sabana?
4 „Noti sa mankeri mi.” Go denki dipi fu den wortu disi. Yu no abi wan korostu firi fu bedarifasi èn fertrow fu Yehovah lobi sorgu ede? Yu e memre fa a ben go nanga den Israëlsma na ini den fotenti yari di den ben waka lontu na ini na sabana? Gado ben sorgu gi ala den fundamenti fanowdu fu den? Tide na dei a de precies so. Yehovah getrow dienstknegti no e mankeri noti. Furu kan agri nanga den wortu fu David di skrifi ondro santa yeye: „Wan dei mi ben de wan yongu man, èn ooktu mi ben kon owru, èn toku ete mi no ben si wan regtvaardikiwan libi a wan sei krinkrin, èn ooktu dati en bakapikin e suku brede” (Psalm 37:25). Nownow yeye nyanyan psa marki e gi nanga yepi fu na „getrow èn koni srafu” (Mattéus 4:4; 24:45-47). Na sei difrenti komakandra ala wiki wi abi na bijbel èn den tijdschrift Na Wachttoren èn Ontwaakt! èn furu tra buku ooktu. Srefi ini kondre pe na wroko fu Yehovah Kotoigi tapu na a sei fu lanti, den e kisi geregeld voorraad fu yeye nyanyan. Yehovah skapu no e mankeri notnoti!
5. Fu san-ede Yehovah skapu de now nanga vrede èn ontspannen, èn nanga sortu bakapisi?
5 „Na ini sabana fu grasi a e meki mi didon” (Psalm 23:2). Yu ben abi bigi sabana fu grasi lontu den furu foto ini na owru Israël. Soleki wan lobi herder na ini a ten dati ben tyari en skapu go na tumsi moi èn bun weigron, na so Yehovah na ini a ten disi e sorgu gi en skapu. Na psalmsingiman ben taki: „Wi de na pipel fu en sabana” (Psalm 79:13; 95:7). A e go bun nanga letterlek skapu te den de tevrede èn na a ten fu hati son fu a dei kan rostu. Yehovah skapu na ini a ten disi de nanga vrede èn ontspannen fudi den abi fertrow na ini lepi herder opziener ini gemeente èn kring di kisi opleiding. Na bakapisi de dati den yeye ipi meti e kon moro furu. Furu sma di den ben behandel fosten takru fu na sei fu den falsi herder fu Babylon na Bigiwan, de now koloku èn tevrede leki skapu fu Yehovah.
6. Fa ’Yehovah e tyari wi go na a rostupresi di lai nanga watra’?
6 „A e tyari mi go na rostupresi di lai nanga watra.” Na ini Israël fu dringi watra wan herder ben mu tyari den ipi fu en go na wan peti ofu liba. Ma watra nofotron na ini na dreiten ben muilek fu feni. Na ini a ten disi ’Yehovah e tyari wi go na rostupresi’ di lai nanga watra fudi a e sorgu na ini waarheidwatra psa marki (Teki gersi nanga Ezechiël 34:13, 14.) Èn na profeiti Yesaya e meki wi yere na kari disi di de wan span wan: „Hé drape, ala den di e dreiwatra! Kon na a watra” (Yesaya 55:1). Te den skapu eteki den yeye watra disi na ini den, den e kisi kibri teige den faya krutu di sa kon tapu den „di no e sabi Gado èn tapu den di no e gi yesi na a bun nyunsu”. — 2 Thessalonika 1:8; Openbaring 7:16, 17.
7. Oten den yeye kowru-ati di komoto fu Yehovah de spesrutu bun, èn ondro sortu omstandigheid bijbeltekst di leri na ede kan sori taki den de tumsi bun?
7 „A e gi mi sili kowru-ati” (Psalm 23:3). Te wi weri, de na ini muilekheid, lasi-ati ofu kakafutu gi seryusu gensi, Yehovah e gi mi kowru-ati nanga yepi fu en Wortu. Fu dat’ede a bun leki kristen fu meki en wan gwenti fu leisi ibridei wan pisi fu a bijbel. Yu e du disi? Son sma e feni en bun fu leri bepaalde tekst na ede, soleki Exodus 34:6, 7 ofu Odo 3:5, 6. Fu san-ede disi de bun? We, efu wan muilekheid sori ensrefi èn yu no abi wan bijbel na yu, dan den trowstu bijbelgedachte wantronwantron kan tranga yu. Furu brada di den ben krutu fu kisi fristrafu ini straf’oso ofu kampu fu na faste bosroiti fu den fu na bun fu regtvaardiki gronprakseri, spesrutu ben kisi kowru-ati nanga tranga nanga den tekst di den ben leri na ede èn di den ben kan memre. Iya,na Wortu fu Gado kan ’prisiri na ati’ ’èn meki den ai kon brenki’! — Psalm 19:7-10.
8. A de wan makriki sani fu waka „den pasi fu regtvaardikifasi”, ma san sowan libifasi e tyari kon?
8 „A e tyari mi na ini den pasi fu regtvaardikifasi.” Den pasi fu regtvaardikifasi de muilek fu waka, ma den e tyari yu go na libi. Soleki Yesus ben taki: „Naw na doro de èn smara na pasi di e tyari yu go na libi” (Mattéus 7:14). Na apostel Paulus ben tyari net so wan prakseri kon na ondro wortu di a ben ferteri den disipel na ini Lystra, Ikónium nanga Antiochië: „Wi mu psa furu benawtu go na ini na kownukondre fu Gado.” Èn Paulus ben sabi trutru fu san a ben taki. Syatu a fesi den ben ston en na ini Lystra èn den ben libi en na baka denki dati a ben dede. — Tori fu den Apostel 14:19-22.
9. (a) Fa Gado e e tyari wi ini den pasi fu regtvaardkifasi? (b) Fa Psalm 19:14 kan yepi wi? (c) Sortu tekst kan yepi fu tan farawe fu den trapu fu onwettig seks?
9 Yehovah e tyari wi na ini den pasi fu regtvaardikifasi fudi a e gi wi nanga yepi fu en Wortu èn organisatie richtlijn èn instructie. Ma morofuru fu den sma e waka na bradi opo pasi „di e tyari sma go na pori” (Mattéus 7:13). Seks doti libi di e gro kon moro furu èn na plaag fu AIDS di e grabu es’esi lontu en e poti krakti na tapu na fanowdu fu kristensma fu tan farawe fu takru demakandra (1 Korinte 15:33). Wi mu sorgu ooktu fu no meki wi prakseri waka go na doti sani (Psalm 19:14). Meki alaten wi teki na tumsi moi rai poti ini wi libi di na Wortu fu Gado e gi ini a tori fu seks èn sasi fu wi kan tan farawe fu den furu trapu fu hurudu. — 1 Korinte 7:2-5; Efese 5:5; 1 Thessalonika 4:3-8.
10. (a) Sortu frantwortu Yehovah Kotoigi abi ini a tori fu na nen fu Gado? (b) Fu san-ede grontapusma e feni fowtu nofotron tapu wi? (c) Ondro sortu omstandigheid Yehovah sa yepi wi?
10 „Fu en nen ede.” Yehovah Kotoigl e tyari na hebi frantwortu fu gi grani na Gado nen èn fu no tyari syen kon a tapu (Mattéus 6:9; Exodus 6:3; Ezechiël 38:23). Furu grontapu sma es’esi de du sori finga na tapu Yehovah pipel. Efu disi de fu wi standpunt gi bijbelgronprakseri soleki neutraliteit ofu na santafasi fu brudu, dan wi konsensi de soifri. Ma efu a ben sa de fu ogridu ede fu wi sei, dan wi ben sa afrontu Yehovah (Yesaya 2:4 Tori fu den Apostel 15:28, 29; 1 Petrus 4:15, 16). Meki fu dat’ede wi no wani si ogri na ai (Psalm 97:10). Efu wi mu ondrofeni ferfolgu, dan Yehovah sa yepi wi alaten èn kibri wi fu en nen ede.
Yehovah e kibri en skapu
11. San den e bedoel nanga ’na lagi presi fu dipi skaduw’ èn na san a kan memre wi fu Yesus?
11 „Awinsi mi e waka na ini na lagipresi fu dipi skaduw, mi no e frede nowan ogri” (Psalm 23:4). Na vertaling fu Isaac Leeser e taki: „Iya, awinsi mi e waka psa na lagipresi fu skaduw fu dede, mi no sa frede nowan ogri.” Disi kan kari na prakseri kon fu den dipi olo ofu lagipresi di na a westsei fu na Dede Se e waka go na ondrosei kon miti den bergi fu Yuda. Wan lagipresi, ofu wan ravijn, pe ogri meti e kibri na ini den skaduw ofu sombra, de wan kefarlek presi gi skapu. David ben waka na ini en libi psa bun furu kefarlek lagipresi, pe dede ben e piri tifi gi en. Ma fudi Gado ben e tyari en, meki a ben abi fertrow èn a no ben gi ensrefi abra na frede psa marki. Net sowan sortu fertrow wi mu abi na ini Yehovah. Na sori disi na tapu „dipi skaduw” kan memre wi na a profeititori fu Yesaya: „Fu na sei fu den di e libi na ini a kondre fu dipi skaduw — leti ben skijn a tapu den.” Mattéus sori na a profeititori disi èn e tyari en kon na tapu Yesus Kristus nanga den wortu: „A pipel di ben sidon na ini dungru, ben si wan bigi leti, èn na tapu den di sidon na ini wan kontren fu skaduw fu dede, leti ben opo kon. Fa? Nanga den preiki activiteit di Yesus ben hori. — Yesaya 9:2; Mattéus 4:13-16.
12. (a) Fa Yehovah Kotoigi ben fiti densrefi na ini furu kondre na den ferfolgu, èn nanga sortu bakapisi? (b) Fa Petrus ben gi dek’ati na den fosten kristen di ben kisi ferfolgu?
12 David ’no ben frede nowan ogri’. Asrefi de tru nanga Yehovah dienstknegti na ini disiten, awinsi den no de populair ini na ogri grontapu disi di Satan e tiri (1 Yohannes 5:19). Furu sma trutru no wani si den na ai èn na ini son kondre den e ferfolgu den hebi. Ma den e tan preiki na ini den kondre disi na bun nyunsu fu a Kownukondre aladi den no e du disi so na fesi ala sma leki den ben sa du normaal. Den sabi dati Yehovah de nanga den èn sa kibri den (Psalm 27:1). Sani e go tumsi moi a fesi na ini furu kondre pe a Kownukondre-wroko mu du na kibrifasi. Ini den sortu kondre disi Yehovah Kotoigi e agri nanga den wortu fu a Psalm: „Yehovah de na mi sei, mi no sa frede. San wan grontapu sma kan du mi?” (Psalm 118:6). Den Kotoigi disi de na ini wan positie di wi kan teki gersi nanga di fu fosi kristen di Petrus ben skrifi den dek’ati wortu disi go gi den: „Awinsi yu ben sa nyan pina fu rogtvaardikifasi ede, yu de koloku. Ma no frede a sani fu a frede fu den èn no kon ini bruya tu.” — 1 Petrus 3:14.
13. (a) Sortu moi kenki e kon na ini Psalm 23:4 èn fu san-ede? (b) Fa kristensma kan wini den frede fu den?
13 „Bika yu de nanga mi.” Luku dati ini den wortu disi wan tumsi moi sani e psa. Na psalmsingiman di ben abi Gado yeye, komoto fu na di fu dri sma go abra na tapu di fu tu sma. Na presi fu taki fu Yehovah leki „en”, David e gebroiki now na voornaamwoord „yu”. Fu san-ede? Fudi disi de wan moro fertrowfasi. Kefar e tyari wi kon moro krosbei na wi lobi Tata, Yehovah. Wi abi wan moro fertrow banti nanga en. Nanga yepi fu begi èn tranga begi wi kan kari en fu kibri wi èn wini so den frede fu wi. Teki gersi nanga Zefanya 3:12.
14. (a) Sortu yepisani herder na ini David ten ben gebroiki, èn fa den ben gebroiki en? (b) Fa kristen herder na ini a ten disi e kibri na ipi?
14 „Yu tiki nanga yu staf den dati e trowstu mi.” Na Hebrew wortu sye’vet, di vertaal nanga „tiki”, kan abi ooktu fu du nanga na kron herderstaf. Na tiki èn na staf kan gebroiki fu teki presi ofu sori tapu makti. Den yepisani disi seiker ben sa de fu yagi meti di ben luru soleki wolfu nanga sneki. Na kron herder staf ben sa kan gebroiki ooktu fu gi skapu wan safri pusu ini na bun richting ofu srefi fu tyari wan skapu kon baka efu a ben gersi dati a ben go tumsi krosbei fu wan presi pe a ben kan fadon èn kisi mankeri. Na ini a ten disi Yehovah e sorgu na ini getrow herder, owruman ini den gemeente di e verdedig na ipi miti teige den sortu yeye sma di e luru na yeyefasi soleki sma di fadon komoto na bribi. Ooktu a kan de fanowdu dati den owruman gi rai na den sma di e de nanga mi-no-kefasi ini na fisiti fu komakandra ofu e drifi komoto fu wan kristen waka nanga libi.
Wan bigi fesa nyanyan a mindri fu feyanti
15. (a) Sortu kenki fu eksempre di wani taki wan sani e kon now na ini Psalm 23:5? (b) Sortu tru tori e sori dati Yehovah pipel e kisi nyanyan bun na yeyefasi, èn disi de kontrari fu suma?
15 „Yu e seti wan tafra a fesi mi na fesi fu den sma di e sorl feantifasi gi mi.” (Psalm 23:5). Dyaso wi abi wan kenki na ini na eksempre di wani taki furu, fu wan herder go na wan sma di e teki wan sma na en oso. Leki wan sma di e gi bun furu na den sma di e fisiti en na so Yehovah pasa marki e gi yeye nyanyan nanga yepi fu na salfu-klasse (Mattéus 24:45). Aladi wi e libi ini wan feyanti grontapu, toku wi kisi bun nyanyan. Na Wachttoren e tyari kon a doro ini moro leki wan hondro tongo sodati sma ini den kontren di panya fara fu makandra soleki Zuid-Afrika, Groenland, den Solomon Islands nanga India alamala kan kisi yeye nyanyan. Boiti fu dati, den sowan 55.000 gemeente na a heri grontapu abi publiki takiman nanga leriman di kisi bun opleiding èn den abi ooktu prima komakandrapresi, pe yu abi a mindri hondrohondro nyun Kownukondre zaal. Moro leki 3.000.000 osobijbelstudie e hori fu yepi sma di yu kan teki gersi nanga skapu. Na a tra sei angri de na porsi fu den sma di de na ini Babylon na Bigiwan, na grontapu makti fu falsi fasi fu anbegi. — Yesaya 65:13.
16. (a) San wan seiker Fariseiman ben libi a baka fu du gi Yesus, kontrari wan sondu uma? (b) Sortu oli Yehovah e gi en loyaal dienstknegti na ini a ten disi?
16 „Nanga oli yu ben wrifi mi ede.” Na ini na owru Israël wan sma di lobi teki sma na oso ben sorgu fu oli fu wrifi na ede fu den sma di kon na en oso. A de wan moi sani dati Yesus na wan bepaalde okasi ben de na a oso fu wan Fariseiman di no ben wrifi en ede nanga oli èn no ben sorgu fu watra fu wasi en futu. Ma wan sondu uma ben wasi en futu nanga den watra-ai fu en èn ben salfu en nanga wan spesrutu switi smeri oli (Lukas 7:36-38, 44-46). Ma Yehovah de wan sma di lobi fu teki tra sma na oso srefsrefi! Gi en loyaal dienstknegti a e gi na yeye (oli) fu bigi prisiri” (Yesaya 61:1-3). Iya, Yehovah pipel seiker abi bigi prisiri na ini a ten disi.
17. (a) San wan ’beker di furu bun’ wani taki? (b) Fa Yehovah e gi wan ’beker di furu bun’ gi en dienstknegti na ini a ten disi?
17 „Mi beker furu bun.” Wan tra vertaling de: „Mi beker furu te ai lon abra” (Moffatt). Disi e sori na tapu bogobogo na yeyefasi. Aladi den no e sori dya na tapu tumsi hebi dringi, toku den wortu disi e meki na prakseri kon fu wan beker fu tumsi bun win. Na dringi disi abi eigifasi fu dresi sma, soleki e kon na krin ini na rai fu Paulus gi Timóteus: „No dringi moro langa watra, ma gebroiki pikinkso win fu yu maag ede, èn fu a furu siki fu yu” (1 Timóteus 5:22). Na yeyefasi win e prisiri wi ati (Psalm 104:15). Wi lobi Tata, Yehovah e gi sondro fu gridi wan yeye fesa fu bun sani gi en loyaal dienstknegti makandra nanga wan ’beker di furu bun’ fu prisiri.
18. (a) Suma e ondrofeni Yehovah bunfasi èn lobi bunatifasi, èn fa Psalm 103:17, 18 e meki wi si disi? (b) Sortu glori ferwakti de ini a ten di e kon gi den sma di de getrow na Yehovah?
18 „Fu tru, soso bunfasi nanga lobi switifasi sa waka ala den dei fu mi libi na mi baka” (Psalm 23:6). Bunfasi na wan pisi fu na froktu fu Yehovah santa yeye (Galacia 5:22, 23). A bunfasi fu Gado èn lobi bunatifasi den sma e ondrofeni di e waka en pasi (Psalm 103:17, 18). Nanga wan tranga bribi na ini Yehovah en pipel kan kakafutu gi ibri tesi di den feni tapu den pasi. Den de alaten na sani fu en blesi èn lobi sorgu. En getrowfasi te na a kaba sa wani taki tego libi na ini na nyun grontapu. Fa a de wan wondru ferwakti a wi fesi!
19. (a) San a wani taki fu libi „na ini na oso fu Yehovah”? (b) San Yehovah organisatie ben opo fu meki na ini a ten disi na tru anbegi go na fesi, èn fu san-ede dusundusun sma di gi densrefi abra e si en wan grani fu dini drape? (c) Suma moro teki na faste bosroiti fu dini Yehovah fu alaten?
19 „Èn mi sa libi seiker na ini na oso fu Yehovah te fu alaten.” Na ini David ten Yehovah santa presi ben de na tabernakel, bika na tempel no ben bow ete. Fudi na psalm singiman ben abi wan man ini prakseri di lobi fu teki sma na ini en oso, dan a ben wani taki ’fu libi na ini Yehovah oso’ fu abi wan bun matifasi nanga Yehovah leki wan sma di e teki yu na oso (Psalm 15:1-5). Na ini a ten disi wi kan si na oso dati leki Yehovah santa tempel, a seti fu en fu soifri anbegi. Kownu Salomo ben abi na grani fu bow na fosi tempel na skinfasi, di ben kisi moi sani nanga gowtu èn di ben bow fu gi Yehovah grani. Fa a ben de wan bigi grani fu dini drape! Aladi so wan tempel no de moro, toku Gado abi santa organisatie fu gi en grani èn fu meki na soifri anbegi go na fesi. Leki wan fasi fu du disi, Yehovah organisatie ben opo na ini bun furu kondre Betheloso. „Bethel” wan taki „oso fu Gado”, èn dusundusun sma di gi densrefi abra e dini ini den theokratas presi disi. Sonwan fu den man nanga uma disi tapu a fasi disi ben dini „te ini alaten”, fudi a moro bigi pisi fu den libi den ben psa ini Betheldienst. Milyunmilyun trawan, di no de memre fu wan Bethelfamiri na asrefi fasi teki a faste bosroiti fu dini Yehovah ala ten.
20. (a) Fu san-ede Psalm 23 de wan aparti pisi fu na bijbel di abi waarde èn san na psalm disi e yepi wi fu kweki? (b) Sortu grani e wakti Yehovah getrow dienst knegti?
20 Na di fu 23 Psalm de leki wan moi diri ston di slijp èn di abi furu pisi di e koti faya. Na Psalm disi e hei na glori nen fu wi lobi hemel Tata, Yehovah, èn e tyari kon a krin fa a e tyari en skapu, e kibri den èn e sorgu gi den. Leki wan bakapisi fu dati en pipel de koloku èn e kisi bun nyanyan na yeyefasi èn e gro es’esi, soleki ini kondre pe hebi gens de. Psalm 23 e yepi wi ooktu fu kweki wan waran fertrow banti nanga wi Mekiman. Èn te wi e luku na a stari hemel, soleki David ben du disi furutron te a ben hori ai na tapu en ipi meti, na so wi de nanga tangi dati na Mekiman fu na bun bigi universum disi di e gi wi frede e sorgu leki wan lobi Herder gi wi. Na wan lobifasi a e pristeri wi ooktu tego libi ini na nyun grontapu efu wi kibri wi soifri retifasi na fesi en. Fa a sa de wan kefarlek bigi sani fu miti dan den sortu getrow dienstknegti fu Gado disi di opo baka soleki David! Èn fa a de wan grani fu dini Yehovah, na Bigi Herder te fu tego alaten!
San yu ben sa piki?
◻ Fa Yehovah e buwijsi taki de de wi lobi Herder?
◻ Nanga yepi fu san ’Gado e tyari wi ini den pasi fu regtvaardikifasi’?
◻ Fa Yehovah e kibri en skapu?
◻ Na sortu fasi Gado ben seti wan tafra gi wi a mindri fu wi feyanti?