Joe e tak-go-tak-kon a tapoe wan boenfasi nanga jepi foe den boekoe?
„Paulus ben go leki fa a ben gwenti drape na den, èn dri sabbat baka makandra a ben tak-go-tak-kon nanga den nanga jepi foe den Boekoe.” — TORI FOE DEN APOSTEL 17:2.
1. Foe san ede a bijbel de wan diri boekoe gi wi?
O DIRI a Wortoe foe Gado de! A e gi piki na tapoe toemsi prenspari aksi di no wan tra boekoe abi a piki foe en. San a bijbel e gi, no de soso wan foe den foeroe prakseri di e go foe a libi; a de a waarheid. Na ini en Wortoe Jehovah e ferteri wi san a e aksi foe wi, èn ala den sabi di ai aksi wi de foe a tanboen foe wi. — Psalm 19:7-11; Jesaja 48:17.
2. (a) Fa wi kan sori tra sma di wi e préki gi san de na fonten foe na boskopoe foe wi? (b) Te wi loekoe sortoe aksi wi e kisi dek’ati?
2 Foe di Jehovah Kotoigi abi na overtoigi dati na bijbel komoto troetroe foe Gado èn dati san tanapoe na ini abi na krakti foe wroko boen tapoe libisma, meki den e rikomanderi san tanapoe na ini tranga na tra sma (Hebrewsma 4:12). Te den e teki prati na a publiki diniwroko, dan den wani dati den sma ferstan dati na boskopoe di den e préki no kon foe densrefi, ma kon foe Gado égi Wortoe. Foe dat’meki den e gebroiki langalanga na bijbel èn e lési disi gi tra sma efoe dati kan. Joe e gebroiki a bijbel ooktoe so? Joe kan tak-go-tak-kon nanga opregti sma nanga jepi foe den Boekoe tapoe sowan fasi dati den kan kisi jepi foe ferstan èn teki san den e leri na ini? — 1 Timóteus 2:15.
3, 4. (a) Fa krakti ben poti na ini a ten foe Jeremia dati a de prenspari foe taki foe Gado égi wortoe? (b) Wi wani tjari den sma di wi e gi leri go na soema, èn tapoe san wi wani poti a prakseri foe den?
3 Dati a de prenspari foe ferteri sma san Gado e taki, na presi foe tjari go na ini den prakseri san wi persoonlek e denki, ben tjari kon krin na fesi ini den dé foe na proféti Jeremia. Na pisten dati foe na historia ben wani taki wan sani na profétifasi gi den dé foe wi. A moro bigi pisi foe den proféti na ini Jeruzalem na ini a ten dati ben e taki wortoe di den ben e prakseri dati den sma ben sa wani foe jere den so te, ma den no ben meki loyaal na wortoe foe Jehovah bekenti. Na foe den Jeremia ben taki: „Na visioen foe den égi ati den e taki — no foe na mofo foe Jehovah.” Èn a ben taki moro fara na wan krakti fasi: „Meki a sma di na égi wortoe foe mi de na en taki mi wortoe ini waarheid.” — Jeremia 23:16-28.
4 Jeremia ’ben taki a wortoe foe Jehovah’ séker ’ini waarheid’. Ooktoe wi moe firi wisrefi ferprekti foe hori wisrefi soifri na den Boekoe te wi e leri tra sma. Wi no wani taki sma tron discipel foe wi. Wi wani dati den de anbegiman foe Jehovah, dati den go waka na ini den foetoemarki foe Jezus Kristus, èn dati den abi warderi gi na organisaatsi di Jehovah e gebroiki foe tjari en dienstknegti na ini a ten disi. — Teki gersi nanga 1 Korinte 1:11-13; 3:5-7.
5. Fa Johannes 7:16-18 e gi tiri (a) gi owroeman? (b) gi wi alamala te wi e teki prati na a velddienst?
5 Jezus srefi ben taki: „San mi e leri, no de foe mi, a de foe en di ben seni mi. Efoe wan sma wani foe doe en wani, dan a sa sabi foe a leri disi efoe a komoto foe Gado, ofoe dati mi e taki foe misrefi. A sma di e taki foe ensrefi, e soekoe en égi glori” (Johannes 7:16-18). Srefi na volmaakti Manpikin foe Gado ben loekoe boen foe taki foe ensrefi. Omoro wi moe doe disi dan! A de foe dat’ede nanga reti wan fanowdoe marki, dati owroeman nanga a koni foe den foe leri sma ’ori stéfi na a getrow wortoe’! (Titus 1:9) Fa a rai fiti foe dat’ede di e gi na ini 2 Timóteus 4:2: „Préki a wortoe”! Dati de a markitiki di na inisé a gemeente èn dorosé na ini na veiddienst wi moe hori tranga.
6. Boiti foe lési vers ini bijbel san wi doe moro ete? Gi eksempre foe disi.
6 Ma disi no wani taki dati wi moe lési eenvoudig nomo vers foe a bijbel sondro foe taki moro fara wan sani foe den. Efoe den sma wani foe ferstan dorodoro san den tekst wani taki, dan a de prenspari dati den si fa foe gebroiki den. Dati ben de ooktoe so toe na ini na geval foe na Ethiopia eunuch foe soema Tori foe den Apostel 8:26-38 e taki foe en. Na man ben lési na profétitori foe Jesaja, ma a no ben ferstan san a ben wani taki. Ma di a ben kisi piki tapoe den aksi foe en kaba, di a graboe san den sani di a ben lési ben wani taki èn ben ferstan dati den ben moe poti persoonlek na ini en égi libi a ben tron wan kristen. Wi moe gi sma di e soekoe waarheid na ini a ten disi a srefi jepi disi èn moe loekoe alaten boen dati wi gebroiki na wortoe foe waarheid joisti.
Fa Jezus ben gebroiki den Boekoe
7. Na eksempre foe soema spesroetoe boen foe jepi wi foe kon moro koni na ini a tak go tak kon nanga jepi foe den Boekoe?
7 Jezus Kristus ben gi a moro boen eksempre na ini na gebroiki foe den Boekoe na tapoe wan joisti fasi (Mattéus 7:28, 29; Johannes 7:45, 46). Te wi e ondrosoekoe finifini na fasi fa a ben leri sma, dan wi kan kisi jepi foe kon moro koni na ini na tak-go-tak-kon nanga jepi foe den Boekoe. Go loekoe pikinso na den eksempre di e kon now:
8. Fa Jezus ben doe nanga na afersi disi, èn foe san ede?
8 Na ini Lukas kapitel 10, vers 2-28, wi e lési foe „wan séker man di ben sabi a wet boen” èn di ben aksi wan sani foe kan tesi Jezus: „Leriman, te mi doe san, mi sa kisi tégo libi?” Fa joe ben sa piki na aksi dati? San Jezus ben doe? Makriki a ben kan gi wan piki langalanga, ma a ben ferstan dati a man ben abi wan faste méne foe na afersi kaba. Foe dat’ede Jezus ben aksi en fa en ben sa piki na aksi, nanga den wortoe: „San skrifi na ini na Wet? Fa joe e lési?” Na man ben piki: „’Joe moe lobi Jehovah, joe Gado, nanga heri joe ati nanga heri joe sili èn nanga heri joe krakti èn nanga heri joe ferstan’, èn: ’joe naaste leki joesrefi’”. Jezus ben taki tapoe dati: „Joe ben piki joisti”, èn san a go brokobroko wan pisi tori foe Leviticus 18:5 di a taki: „Tan doe disi èn joe sa kisi libi.” Na wan tra okasi Jezus srefi kari ini en piki tapoe wan aksi den toe komando dati (Markus 12:28-31). Ma na a lési disi a man nanga soema a ben taki ben de wan sma di ben sabi a Wet foe Mozes èn di a de krin ben wani sabi ofoe Jezus ben agri nanga san en ben leri foe dati. Jezus ben meki a firi na satisfaksi foe gi ensrefi na piki.
9. (a) San Jezus ben doe foe jepi a man foe ferstan san ben de na méne foe wan foe den tekst di a ben gebroiki? (b) Foe san ede na fasi dati ben de toemsi boen?
9 Ma ete a man dati ben misi san den tekst dati ben wani taki dorodoro di a ben kari. Foe dat’ede na man di ben wani „sori dati a ben de regtvaardiki ben taki gi Jezus san e kon now: ’Soema de dan mi naaste?’” Jezus no ben kari tekst moro na ini en piki. A no ben gi eenvoudig nomo wan definitie tége san kande a man ben sa kakafoetoe. A ben gebroiki na a tra sé wan agersitori — wan toemsi moi agersitori di ben fiti den fanowdoe foe a man, èn di ben sa jepi en foe tak-go-tak-kon foe san a tekst ben wani taki. Jezus ben ferteri foe wan Samaritaan di ben prakseri en naaste èn di ben go jepi wan sma di ben reis èn di den ben foefoeroe èn naki trowe, aladi wan priester nanga wan leviet no ben doe dati. Na agersitori disi ben meki dati na wortoe „naaste” ben kisi wan betekenis di a man disi noiti ben si ete, èn dati ben de tapoe wan fasi di ben de foe doro na ati. Dan leki bosroiti Jezus ben poti wan aksi foe loekoe si dati a man ben ferstan foe san a tori e go, èn a ben gi en dek’ati foe poti na ini en ègi libi san den ben taki. — Lukas 10:29-37.
10. (a) San wi kan leri foe na eksempre dati foe Jezus fasi foe leri sma? (b) Fa wi
10 San wi kan leri foe na eksempre disi foe gi leri na sma? Joe ben si den sani di e kon now? (1) Jezus ben poti a prakseri foe na man ini en piki na tapoe na fosi aksi tapoe den Boekoe. (2) Jezus ben kari na man foe taki san ai prakseri, èn a ben prijse en boen di a ben sori na ini na kommentaar foe èn dati a ben abi na koni foe si sani foe makandra. (3) Jezus ben sorgoe dati na kroederi a mindri na aksi nanga den Boekoe no ben komoto na prakseri soleki e kon a krin na ini vers 28. (4) Wan agersitori ben gebroiki di ben wroko tapoe na ati foe sorgoe dati a man no ben sa frigiti na troetroe betekenis foe na piki. Efoe wi o wroko akroederi na patroon dati, dan wi sa kisi jepi foe tak-go-tak-kon nanga tra sma nanga jepi foe den Boekoe tapoe wan boenfasi.
„Leriman, joe ben taki boen”
11. (a) Sortoe boen piki Jezus ben gi di den Saducéman ben aksi en wan aksi foe na kroederi di de na mindri trow nanga opobaka? (b) Foe san ede a no ben stop nanga a tori drape?
11 Na ini Lukas kapitel 20, vers 27-40 ete wan moi eksempre skrifi foe a gebroiki foe a Wortoe foe Gado tapoe wan boenfasi. Wantoe Saducéman ben kon na Jezus nanga wan aksi. Den poti wan situwasi na fesi Jezus di, soleki fa den prakseri, ben sori o don a de foe bribi dati den dedesma ben sa libi baka. Den ferteri foe wan oema di baka makandra ben abi sèbi masra. „Foe soema foe den a e tron foe dat’ede a wefi na ini na opobaka?” den ben aksi. A piki di Jezus ben gi, ben de krinkrin san den no ben ferwakti. A de krin dati noiti den ben tan prakseri na a mogelekheid dati den sma di ben kisi wan opobaka no ben sa trow, ma ini a fasi dati den sa de leki den engel. Ma moro ben de fanowdoe foe poti krakti na a piki foe overtoigi den.
12. (a) Sortoe fasi foe tak-go-tak-kon Jezus ben gebroiki foe hori baka gi na bribi na ini wan opobaka? (b) Foe san-ede na tak-go-tak-kon disi ben de spesroetoe boen gi den Fariséman?
12 Jezus ben ferstan dati a troetroe problema foe den Saducéman ben de dati den no ben e bribi na ini na opobaka. Foe dat’ede a ben poti na prakseri foe den spesroetoe na tapoe dati. A ben poti a tak-go-tak-kon foe den tapoe den boekoe foe Mozes leki fundamenti tapoe Exodus 3:6, pe den Saducéman ben taki dati den e bribi na ini. A ben tak-go-tak-kon: „Dati den dedewan e kisi wan opobaka, srefi Mozes ben tjari kon na krin na ini a tori foe na makaboesi, te a e kari Jehovah ’na Gado foe Abraham èn na Gado foe Isaäk èn na Gado foe Jakob.’” Ma den Saducéman ben kan si na ini den wortoe dati wan sani dati wan opobaka sa de? Dati den ben kan pas di Jezus ben taki moro fara: „A no de wan Gado foe den dedewan, ma foe den libiwan, bika gi en den alamala e libi.” A ben de logis: Sani di no abi libi èn libisma di no abi libi kan abi wan mekiman, ma oso sma di de a libi kan abi wan gado, Wan Sma di den kan gi densrefi na en na ini a dini foe en èn di den kan anbegi. Efoe Abraham, Isaäk nanga Jakob de ini dede nomo èn ondro gron èn den no abi moro fara ferwakti foe libi, dan Jehovah kande ben sa taigi Abraham: ’Mi ben de a Gado foe den.’ Ma dati a no ben taki. A de wan ferwondroe sani dati sonwan foe den méster foe Wet, baka di den ben jere fa Jezus ben tak-go-tak-kon foe a tori nanga jepi foe den Boekoe ben piki taki nanga den wortoe: „Leriman, joe ben taki boen?”
13. Sortoe rai di gi djaso kan jepi wi na ini na kweki foe na koni foe tak go tak kon nanga jepi foe den Boekoe? Tjari kon na krin na ibriwan foe den rai disi foe san ede joe e feni en prenspari.
13 Fa joe kan kisi sowan koni ofoe meki a gro kon moro bigi foe takgo-tak-kon nanga jepi foe den Boekoe? Wantoe sani de prenspari: (1) Joe moe abi wan boen sabi foe den Boekoe. Studeri joesrefi alaten èn go na komakandra alaten e pré wan prenspari rol ini a pisi foe a sabi dati. (2) Joe moe teki a ten foe go prakseri dipi foe den sani disi, foe ondrosokoe na ini joe ferstan den waarheid komoto foe difrenti oekoe èn foe meki joe warderi kon moro bigi gi den. (3) Efoe joe e studeri no soekoe wawan na ferklari foe tekst ma ooktoe na bijbel réde foe den ferklari dati. Skrifi den disi na sé den tekst di joe wani taki foe den. (4) Loekoe fa joe kan tjari tekst kon a krin gi difrenti sortoe foe sma. (5) Go denki foe en fa wi ben sa kan tjari bepaalde punt kon na ini agersitori. Ala den punt disi de foe bigi waarde ini a kweki foe a koni foe tak-go-tak-kon nanga jepi foe den Boekoe.
Fiti na tak-go-tak-kon foe joe na a publiki
14. Sortoe aparti pisi foe a fasi fa Paulus ben gi leri na sma e tjari kon na wi prakseri na ini a Tori foe den Apostel 17:2, 3?
14 Ooktoe na apostel Paulus ben de wan boen leriman, wan sma foe soema wi kan leri foeroe. Wan heri pisten na datra Lukas ben reis makandra nanga en, èn fa a ben skrifi foe den activiteit foe Paulus ben de aparti. A e skrifi: „Den ben kon na Thessalonika, pe wan kerki foe den djoe ben de. Paulus dan ben go leki fa a ben gwenti drape na den, èn dri sabbat baka makandra a ben tak-go-tak-kon nanga jepi foe den Boekoe, aladi nanga jepi foe tekst a ben ferklari èn bewijsi dati Kristus ben moe njan pina èn ben moe opo baka foe dede, èn a ben taki: ’Disi na a Kristus na Jezus disi di mi e préki gi oenoe.’” San ben de na bakapisi? Jehovah ben blesi den moeiti foe Paulus. „Sonwan foe den ben tron bribiman . . . na so toe wan bigi ipi foe den Griki di ben anbegi Gado, èn no pikinso foe den prenspari oema.” Na fasi foe leri sma, di Paulus ben gebroiki, de aparti: A ben doe moro leki foe lési ini den Boekoe; a ben tak-go-tak-kon nanga jepi foe dati èn ben fiti a tak-go-tak-kon foe en na a publiki foe en. A no ben ferteri den foe a boen njoensoe, ma a ben ferklari dati èn a ben gi bewijsi foe na Wortoe foe Gado di ben skrifi na ondro na krakti foe santa jeje (Tori foe den Apostel 17:1-4). Loekoe pikinso toe eksempre foe na fasi fa Paulus e leri sma.
15. (a) Fa Paulus ben proeberi foe feni wan gemeenschappelek punt foe bigin, di a ben taki nanga wan djoe poebliki na Antiochië? (b) Foe san-ede a de prenspari leki fa joe e loekoe en na wi prékiwroko foe feni wan gemeenschappelek punt foe bigin?
15 Na ini Tori foe den Apostel 13:16-41 wan taki (lezing) ben skrifi di Paulus ben hori gi wan djoe publiki ini na Pisidië di ben didon na ini Antiochië. Ini a fosi prosi a ben doe moeiti foe feni wan gemeenschappelek punt foe bigin a taki foe en. (Loekoe vers 16 nanga 17.) Foe san-ede a ben doe dati? Foe di a ben jepi den foe de klarklari foe tak-go-tak-kon foe a tori di a ben wani taki nanga den. A no ben tjari ensrefi go a fesi leki wan memre foe na kristen gemeente nanga wan boskopoe gi den di e go foe Jezus Kristus. A ben taki nanga den djoe èn ben teki foe dat’ede a fasi fa den e denki na ini prakseri. A ben erken dati a publiki foe en ben de foe sma di ben frede Gado èn a ben sori dati en, netleki a moro bigi pisi foe den foe gebortoe ben de wan Hebrewsma. Ooktoe a ben poti prakseri na tapoe sani di ben psa na ini na historia foe Israël di ben wani taki wan sani. Ma fa a ben man foe no drifi komoto foe na gemeenschappelek fundamenti di a ben taki foe Jezus Kristus?
16. Fa Paulus ben man foe no drifi komoto foe na gemeenschappelek fundamenti dati di a ben taki nanga den djoe foe Jezus?
16 Paulus ben bigin taki foe Jezus leki wan bakapikin foe David èn leki wan sma di Johannes na Dopoeman ini algemeen den ben erken en dati a ben de wan proféti foe Gado (Tori foe den Apostel 13:22-25; Lukas 20:4-6). Ma Paulus ben sabi dati a publiki foe en ben sabi dati den tiriman na ini Jerusalem ben trowe Jezus, èn foe dat’ede na apostel Paulus ben tjari a tori disi ensrefi kon a fesi èn a ben tjari kon a krin dati srefi a trowe nanga a kiri foe Jezus ben pasa leki wan kontroe foe profétitori (Tori foe den Apostel 13:27-29). A ben sori a tapoe dati Gado ensrefi foe na boen foe Jezus ben opo doe wan sani moro fara foe di a ben opo en komoto foe dede èn dati a mindri den djoe, aikotoigi ben de foe a troe tori dati Jezus ben opo baka (Tori foe den Apostel 13:30, 31). Paulus ben e ferstan boenboen dati na afersi disi ben moeilek gi foeroe foe den foe ben kan teki èn foe dat’ede a ben tjari kon a krin dati a ben taki foe ’a boen njoensoe di e go foe na pramisi di ben gi a den fosten tata’. Dati disi ben de so, a ben sori foe di na ini a fosi presi a ben teki wortoe foe Psalm 2:7, moro fara foe Jesaja 55:3 èn te foe kaba foe Psalm 16:10. Di a ben tak-go-tak-kon foe a laatste tekst disi di kari a ben sori dati disi no ben kontroe na ini David, foe di David ’wel ben si a pori’. A ben moesoe kontroe soboen tapoe a sma di „no ben si a pori” foe di Gado ben opo en komoto foe dede (Tori foe den Apostel 13:32-37). Bakadi Paulus ben tjari a punt disi kon a fesi, a ben gi wan bosroiti di den moesoe gi den réde foe doe wan sani. A ben sabi dati a ben de toemsi prenspari gi den sma foe teki san den ben jere sondro foe spoetoe nanga en. Foeroe foe den ben teki en tapoe wan boenfasi. — Tori foe den Apostel 13:38-43.
17. (a) Foe san-ede Paulus ben tjari na waarheid kon a krin na ini Athene na wan tra fasi? (b) San wi kan leri foe a sani di a ben doe na a okasi dati?
17 Te Paulus ben taki nanga wan no-djoe publiki, dan a ben gebroiki den sortoe gronprakseri disi foe leri sma. Di foe dat’ede a ben de na tapoe na Areopagus na ini na Griki foto Athene a ben fiti a taki foe en na den omstandigheid nanga na denki foe den Athene sma. Na ini na proeberi foe en foe feni wan gemeenschappelek punt foe bigin, a ben prijse den foe di den ben de sma di ben lobi foe dini gado. A ben ferteri foe wan altari di ben de na ini na foto, wan altari nanga den wortoe: „Gi wan gado di wi no sabi.” Na Gado disi, na so Paulus ben ferklari ben de a sma di a ben préki foe en (Tori foe den Apostel 17:22, 23). Baka di a ben doe dati, a ben broko finifini pisi di komoto foe den Boekoe, di skrifi nanga santa jeje èn a ben bigin moro fara tapoe na fundamneti dati foe tak-go-tak-kon nanga den. Èn foe di Paulus ben de bekenti pikinso nanga boekoe foe den Griki, a ben teki sani taki foe den poëmaman foe den taki, no leki wan makti di joe kan bribi a tapoe, ma foe sori taki bepaalde sani foe san a ben taki den égi boekoe foe den ben erken. Leki bakapisi foe disi sonwan ben tron bribiman. — Tori foe den Apostel 17:24-31, 34.
18. San kan jepi wi foe meki den moeiti foe wi foe tak-go-tak-kon nanga tra sma nanga jepi foe den Boekoe waka boen?
18 A boen njoensoe di Paulus ben préki na ini Athene ben de a srefi boskopoe di a ben tjari na ini Antiochië. A réde foe na difrenti ini a fasi fa a ben tjari en kon na fesi ben de dati a ben si san ben de fanowdoe foe tak-go-tak-kon nanga sma. A ben broko en ede so foeroe foe den dati a ben doe na ekstra moeiti di ben de fanowdoe foe doe dati. Èn na moeiti dati ben tjari boen bakapisi kon. Meki wi ooktoe doe na fanowdoe moeiti èn begi na blesi foe Jehovah tapoe den moeiti foe wi foe tak-go-tak-kon nanga tra sma nanga jepi foe den Boekoe sodati wi kan prati na boen njoensoe nanga ala sortoe foe sma. — 1 Korinte 9:19-23.
San wi ben leri?
◻ Foe san ede a de prenspari foe gebroiki na ini wi diniwroko langalanga na bijbel?
◻ Sortoe moi gronprakseri foe leri sma e kon na fesi a ini Lukas 10:25-37?
◻ Sortoe gwenti kan jepi wi foe kweki na koni foe tak-go-tak-kon nanga jepi foe den Boekoe?
◻ Ofara na presi pe sma kweki kan abi krakti na tapoe a fasi fa wi e proeberi foe tak-go-tak-kon nanga en?