Verwijzing gi „Wi Kresten libi nanga a preikiwroko studie-buku”

Verwijzing gi Wi Kresten libi nanga a preikiwroko studie-buku

8-14 YULI

GUDU NA INI GADO WORTU PSALM 60-62

Yehovah e kibri wi èn a e yepi wi fu no bruya

it-2-O 1011 ¶3

Tenti

Wan tu leisi den gebroiki a wortu „tenti” na tra agersifasi tu. Wan tenti fu wan sma ben de wan presi pe sma ben kan go suku kibri noso rostu te a presi ben faya noso te alen ben e fadon (Ge 18:1). Soleki fa a gwenti ben de te a abi fu du nanga teki sma na oso, dan fisitiman ben kan bribi taki den ben o kisi sorgu nanga lespeki, te wan sma ben teki den na ini en tenti. Dati meki te Openbaring 7:15 e taki fu a bigi ipi di Gado „o bradi en tenti abra den,” dan a wani taki a o sorgu den èn a o kibri den (Ps 61:3, 4). Yesaya e taki fu a sreka di Sion, a wefi fu Gado, e sreka gi a manpkin di a o kisi. Yesaya ben taki „Meki a tenti fu yu kon moro bigi” (Yes 54:2). Sobun, a meki a kibri presi fu den pkin fu en kon moro bigi.

22-28 YULI

GUDU NA INI GADU WORTU PSALM 66-68

Yehovah e tyari den lai fu wi ala dei

w10-O 1/12 23 ¶6

Poti prakseri na p’pa nanga m’ma di musu kweki den pkin den w’wan

Nanga yepi fu Yehovah en santa yeye, a ben meki sma skrifi kownukondre singi noso psalm, so taki den Israelsma ben kan singi te den ben e anbegi Gado. Prakseri o furu dek’ati den uma di masra ben dede kba èn den pkin di no ben abi p’pa moro ben e kisi, te den ben e yere den singi di ben e memre den taki Yehovah na „wan p’pa” nanga „wan krutuman” di ben o gi den san den ben abi fanowdu (Psalm 68:5; 146:9). Wi sosrefi kan taki wortu di e gi p’pa nanga m’ma di musu kweki den pkin den w’wan dek’ati di den no o fergiti. Ruth, wan m’ma di e kweki den pkin fu en en w’wan, e memre ete san wan p’pa di abi furu ondrofeni ben taigi en 20 yari psa. A ben taigi en: „Yu e kweki den tu boi fu yu heri bun. Tan go so doro.” Ruth e taki: „Den wortu fu en gi mi trutru dek’ati.” Iya, „wortu di taki na wan switifasi na bun dresi” èn a kan gi wan p’pa noso m’ma di musu kweki den pkin den w’wan dek’ati, moro leki san wi ben kan denki (Odo 15:4, Contemporary English Version). Yu kan denki fu wan spesrutu sani di yu kan prèise wan p’pa noso m’ma di musu kweki den pkin den w’wan?

w09-O 1/4 31 ¶1

A papa fu den pkin di no abi papa moro

„GADO di de na ini en santa tanpresi, na wan papa gi den pikin di no abi papa moro” (Psalm 68:5). Den wortu disi di skrifi nanga yepi fu santa yeye, e leri wi wan moin sani fu Yehovah Gado. A e poti prakseri na den sani di den mofinawan abi fanowdu. A fasi fa a e broko en ede nanga den pkin di lasi den papa noso mama na ini dede, ben de krin fu si na ini a Wet di a ben gi den Israelsma. Meki wi go luku a fosi leisi di Bijbel e taki fu den „pikin di no abi papa moro,” di de fu feni na Eksodus 22:22-24.

29 YULI–4 AUGUSTUS

GUDU NA INI GADO WORTU PSALM 69

Fa Psalm 69 ben taki na fesi fu den sani di ben o psa na ini a libi fu Yesus

g95-O 22/10 31 ¶4

Yu kan dede fu di yu ati broko?

Son sma e taki dati Yesus, a sma di profeititori ben taki fu en na fesi, ati ben broko fosi a dede. Bijbel ben taki: „Mi ati broko, fu di sma kosi mi. A soro dati no man dresi” (Psalm 69:20). Ma disi abi fu du nanga trutru broko ati? Kande dati de so, fu di den lasti yuru fosi Yesus dede ben hebi srefisrefi, no na skin fasi nomo ma a ben brokosaka sosrefi (Mateyus 27:46; Lukas 22:44; Hebrewsma 5:7). Moro fara, a kan taki wan broko ati e tyari kon na krin fu san ede „brudu nanga watra” ben kon na doro di den dyuku wan lansri go na ini Yesus sei bere baka di a dede. Wan priti ini na ati fu wan sma noso wan bigi brudutitei kan tyari brudu go na ini a borsu noso na ini na pericard (wan watrawatra sani di abi cel di de lontu na ati). Na ala tu presi wan olo kan meki taki wan sani kon na doro di de leki „brudu nanga watra.”—Yohanes 19:34.

it-1-O 844

Takru w’wiri di e tyari dede

Na ini den profeititori di abi fu du nanga a Mesias, Bijbel ben taki na fesi taki den ben o gi en „takru wiwiri” leki nyan (Ps 69:21). Disi psa di den gi Yesus Krestes, bifo sma spikri en na wan postu, win fu dringi di ben moksi nanga bita. Ma di a tesi en, a no ben wani dringi en. A ben gersi leki den du a sani disi so taki a no ben o firi pen moro. Fu sori taki a profeititori disi kon tru, Mateyus (27:34) e taki dati a Griki wortu choʹle (bita), wani taki a srefi sani na ini a Griki Septuaginta na Psalm 69:21. Ma na Evangelietori fu Markus e taki fu mirre (Mr 15:23), èn a sani disi meki taki sma bigin denki taki a „takru wiwiri di e tyari dede” noso „bita” ben de „mirre.” Na a tra sei a kan taki a dringi disi ben abi bita nanga mirre na ini.

5-11 AUGUSTUS

GUDU NA INI GADO WORTU PSALM 70-72

„Fruteri den sma di musu kon ete” fu a makti fu Gado

Diki moro dipi

it-1-O 651

Eufraat-liba

Den skotu fu a kontren di Israel ben kisi. Gado ben meki wan ferbontu nanga Abraham èn a ben pramisi fu gi den bakapikin fu Abraham a kondre, fu „a heri kontren na mindri Egepte-liba nanga a bigi liba di den e kari Eufraat-liba” (Ge 15:18). A pramisi disi ben abi fu du nanga a pipel Israel (Eks 23:31; De 1:7, 8; 11:24; Yos 1:4). 1Kroniki 5:9 e taki dati na a ten di David ben e tiri, den bakapikin fu Ruben ben meki a kontren fu den kon moro bigi go „te na ini a kontren di de na Eufraat-liba pe a sabana e bigin.” Ma fu di Efraat-liba ben de sowan 800 kilo meter na „owstusei fu Gilead” (1Kr 5:10), meki a kan taki den ben meki a kontren fu den moro bigi fu owstusei fu Gilead go te na a lanki fu a Siria-sabana, di e go doro te na a Eufraat-libi. (Na ini a WV-Willibrordvertaling, a skrifi: „Te na a bigin fu a sabana na a sei disi fu na Eufraat-liba” èn na ini a JB-The Jerusalem Bible, a skrifi: „te na a bigin fu a sabana di e kon na wan kba na a liba Eufraat.”) A gersi leki na a pisi ten di David nanga Salomo ben e tiri fosi a pramisi fu Yehovah ben kon tru, di a skotu fu Israel ben bigi go doro te na a Arameisi kownukondre fu Soba, sobun a go doro te na a lanki fu Eufraat-libi. A de krin taki a ben e abra go te na noorsei fu Siria (2Sa 8:3; 1Kw 4:21; 1Kr 18:3-8; 2Kr 9:26). Fu di a ben de so wan prenspari liba meki nofo tron sma ben e kari en „a Gran Liba.”—Yos 24:2, 15; Ps 72:8.

26 AUGUSTUS–1 SEPTEMBER

GUDU NA INI GADO WORTU PSALM 78

Den Israelsma ben tranga yesi —Na wan warskow gi wi

w96-O 1/12 29-30

“Prakseri fa sani ben de fosi”—Fu san ede?

Na wan sari sani taki furu tron den Israelsma ben e sondu fu di den ben e fergiti den komando fu Yehovah. San ben de a bakapisi? „Ibri leisi baka den ben e tesi Gado. Den ben e meki a Santawan fu Israel sari. Den no memre a fasi fa a yepi den na a ten di a ferlusu den fu den feanti” (Psalm 78:41, 42). Te fu kaba, na fu di den ben e fergiti den wet fu Yehovah meki a no ben wani den leki en pipel moro.—Mateyus 21:42, 43.

A psalm skrifiman ben gi wan moi eksempre di ben skrifi: „Mi o memre den sani di Yah du. Iya, mi o memre den bigi sani di yu du langa ten psa. Mi o denki dipi fu ala den sani di yu du. Na soso den sani di yu du, mi o prakseri” (Psalm 77:11, 12). Te wi e denki dipi fu a getrow fasi fa wi ben du wi diniwroko na ini a ten di psa èn fa Yehovah yepi wi na wan lobi-ati fasi, dan dati o gi wi trutru deki-ati fu horidoro èn fu tan abi warderi gi san Yehovah du gi wi. Sosrefi, te wi e „prakseri den dei fu fositen” dan dati kan yepi wi fu no weri fu du san bun èn fu horidoro na wan getrow fasi.