„No meki yu ati kon ini bruya”

„No meki yu ati kon ini bruya. Sori bribi ini Gado, sori bribi ooktu ini mi.” — YOHANNES 14:1.

1. Fu san-ede den wortu fu Yesus ini Yohannes 14:1 ben kon precies na a leti ten?

A BEN de 14 Nisan fu na yari 33 G.T. Wan pikin grupu man ben kon na makandra a wan tapsodro ini Yerusalem baka di sondongo. A tiriman fu den ben taki adyosi-wortu na ini san a ben gi den rai nanga dek’ati. A ben taki fu eksempre: „No meki yu ati kon ini bruya” (Yohannes 14:1). Den worLu fu en ben kon precies na a yoisti ten bikasi heri esi sekseki sani ben sa psa. A neti dati den ben kisi en, den tyari en go a fesi krutu èn den krutu en taki a mu dede.

2. Fu san-ede a dei dati ben de so kefarlek prenspari èn san ben yepi den disipel?

² Yu mag kari na dei dati nanga reti leki a moro prenspari dei na ini na heri historia, na dei di ben bepaal na heri tamara fu na libisma-famiri. Na dede fu na Fesiman, Yesus Kristus leki wan ofrandi, ben meki furu owru profeititori kon tru èn ben gi den sma di ben poti bribi na ini en na fondamenti fu tego libi (Yesaya 53:5-7; Yohannes 3:16). Den apostel, di ben fruwondru èn di no ben sabi san fu du fu den sani di ben psa tapu a neti dati, fu wan pisten ben kon ini wan toestand fu bruya nanga frede. Petrus ben taki srefi dati a no sabi Yesus (Mattéus 26:69-75). Ma bakadi den getrow apostel ben kisi na pramisi yepiman, na santa yeye, dan den ben kisi a fri fu taki sondro frede èn a bruya fu den ben wai komoto (Yohannes 14:16, 17). Di Petrus nanga Yohannes ben horidoro na ondro tranga gens nanga straf’oso den ben begi fu dat’ede na Gado fu kisi yepi fu taki na wortu fu en „nanga ala fri èn sondro frede.” Gado ben yere a begi fu den. — Tori fu den Apostel 4:1-3, 29-31.

3. Fu san-ede someini sma de so nanga skreki-ati ini a ten disi?

³ Ini a ten disi wi e libi ini wan grontapu di bruya srefsrefi. Na kaba fu na owru seti fu sani disi e kon krosbei esesi (2 Timotéus 3:1-5). Na seryusu fadon fu na osofamiri-libi èn den moreel markitiki, wan gro fu freemde siki di e frede sma, politiek instabiliteit, wroko di no de fu feni, mankeri fu nyanyan, terrorisme èn a kefar fu wan kernoorluku de afersi fu san milyunmilyun sma e ondrofeni na bakapisi na ini a persoonlek libi fu den ofu fu san den e broko-ede nanga en srefsrefi. Furu ati de ini bruya fu wan frede gi na tamara di e kon, frede di e kwinsi den. Soleki Yesus ben taki a fesi, dan wi abi a fesi den natie „bruya skreki . . . ala den sma e kon weri fu frede èn fu fruwakti fu den sani di e kon tapu na grontapu pe libisma e libi a tapu”. — Lukas 21:25, 26.

4. Sortu sani kan meki dati kristensma abi spanning fu ferdrage?

⁴ Srefi kristensma kan kon ondro a krakti fu den sortu sani disi di e kwinsi sma. Den kan kon ooktu na ondro spanning leki wan bakapisi fu a krutu di sma e krutu den a fesi fu na sei fu kerki ofu gens fu famiriman, birti, wrokoman, kompe skoromati èn rigeriman (Mattéus 24:9). Fa wi kan hori sobun ini a muiliki ten disi a bedarifasi nanga rostu fu wi? Fa wi kan hori vrede fu yeye te wi kisi furu sani fu tyari? Fa wi kan luku na tamara di e kon nanga fertrow? San sa yepi wi fu wini na dipi brok-ede di moromoro de algemeen? Wi de ini a srefi pisiten fu na kalender leki ini san Yesus ben de di a ben gi a rai di skrifi na ini Yohannes 14:1; meki sobun wi luku dati finifini.

Fa wi kan wini brok-ede?

5. Sortu dek’ati fermane den buku e gi wi?

⁵ Bakadi Yesus ben gi na yepi èn dek’ati ’fu no meki den ati kon ini bruya’, a ben taigi den disipel: „Sori bribi ini Gado, sori bribi ooktu ini mi” (Yohannes 14:1). Na bijbel di skrifi nanga yepi fu Gado santa yeye e gi wi furu fu den sortu dek’ati disi: „Trowe na lai fu yu tapu Yehovah, dan ensrefi sa hori baka gi yu”. „Drai un pasi poti tapu Yehovah, èn libi yusrefi gi en, èn ensrefi sa handri” (Psalm 55:22; 37:5). Paulus ben gi den sma fu Filipi na tumsi prenspari rai disi: „No broko-ede fu noti ma meki na ini ala sani nanga yepi fu begi èn tranga begi makandra nanga taki tangi den begi fu yu kon de bekenti na Gado èn na vrede fu Gado di e pasa ala prakseri, sa kibri yu ati èn yu yeye krakti.” — Filipi 4:6, 7.

6, 7. (a) San na wán fasi fu meki spanning kon moro mendri? (b) Fa wi kan meki wan krosbei banti gro nanga Yehovah?

⁶ Te wi e broko wi ede ofu de ongerostu fu problema ofu hebi frantwortu, dan sontron dati no wawan e abi krakti tapu wi yeye ma ooktu tapu wi gesontu. Wan sabiman fu datrawroko e taki na ini en buku Don’t Panic: „Efu sma kan taki fu den problema fu den nanga wan sma fu suma den abi respeki . . . , dan na marki fu stress nofotron e kon moro pikin.” Efu dati de so fu wan kenki fu prakseri nanga wan tra sma, o moro furu a no sa yepi den fu taki nanga Gado. Bikasi gi suma wi kan abi moro respeki dan leki gi Yehovah?

⁷ Fu dat’ede meki wan krosbei persoonlek banti nanga en ini a ten disi de so prenspari gi kristen sma. Lepi dienstknegti fu Yehovah sabi dati bunbun, èn fu dat’ede den e kibri densrefi fu na sortu demakandra fu grontapu sma ofu fu den vorm fu ten fu puru ferferi di ben sa kan swaki na matifasi dati (1 Korinte 15:33). Den e frustan ooktu o prenspari a de fu go ini begi na Yehovah, no soso wán ofu tutron ini wan dei, ma furutron. Spesrutu yongu ofu nyun kristen mu kweki na krosbei banti disi nanga Yehovan fu di den e studeri alaten èn e go prakseri dipi fu en wortu èn nanga yepi fu kristen demakandra ini a dienst. Wi e kisi a tranga dek’ati: „Kon krosbei na Gado, èn a sa kon krosbei na yu.” — Yakobus 4:8.

Rai di Yesus ben gi

8, 9. Sortu positief rai ini a tori fu moni problema wi kan poti ini wi libi?

⁸ Ini furu kondre a de di wroko no de èn wan takru economia e de seryusu reide fu broko-ede. Yesus ben gi positief rai fu den broko-ede disi: „Un no broko-ede moro langa gi un sili, ini a tori fu san un sa nyan ofu fu san un sa dringi ofu fu un skin ini a tori fu san un sa weri. Na sili no wani taki moro leki nyanyan èn a skin de moro leki krosi?” (Mattéus 6:25) Iya, na sili èn na skin, efu na heri sma de furu èn furu moro prenspari leki nyanyan èn krosi. Den dienstknegti fu Gado kan de seiker fu en dati a sa yepi den ini a sorgu fu den fondamenti fanowdu fu den. Yesus ben gi na eksempre disi: „Luku den fowru fu hemel bun, bika den no e sai, èn den no e koti nyanyan tu èn ooktu den no e tyari kon makandra ini maksin. Ma toku un hemel Tata e gi den nyanyan. Unu de moro warti leki den disi?” (Mattéus 6:26). A no de wan sani di un kan prakseri dati a kan dati Gado ben sa sorgu gi mekisani di abi frei ma ben sa libi en libisma dienstknegti, di de diri gi en èn fu suma Yesus ben gi en libi, a wan sei.

⁹ Yesus ben poti krakti moro fara tapu disi fu di a ben sori a tapu den leili fu na sabana, di no e wroko èn no e meki krosi, aladi „srefi Salomo ini ala en glori no ben weri so moi leki wan fu disi”. Na tiri fu kownu Salomo ben de bekenti fu na glori fu en. Yesus ben aksi fu trowstu sma: „[Gado] no sa weri un moro furu nanga krosi?” — Mattéus 6:28-32; Hooglied 3:9, 10.

10. (a) Den wortu di e gi trowstu fu na mofo fu Yesus ben taki gi suma? (b) Sortu rai a ben gi fu a te di e kon?

¹⁰ Ma Yesus e meki wi si moro fara dati disi de soso gi den sma di „e suku a kownukondre nanga en regtvaardikifasi fosi”. Na a heri grontapu den sortu tru kristen disi e frustan san Gado kownukondre ede trutru èn e poti en tapu a fosi presi ini den libi. Gi den na fermane fu Yesus de: „Sobun no broko-ede noiti fu na dei fu tamara, a tra dei sa abi en eigi sorgu. Ibri dei abi nofo fu en eigi ogri” (Mattéus 6:33, 34). Nanga tra wortu, wroko nanga ibri problema te a sori ensrefi èn no go prakseri furfuru fu a ten di e kon.

11, 12. Fa son kristen ben ondrofeni dati Yehovah ben yere den begi fu den fu kisi yepi?

¹¹ Moro furu sma abi na fasi fu broko-ede fu san e kon spesrutu te den toestand e kon moro takru. Ma kristensma kan drai go nanga fertrow na Yehovah èn den mu du disi ooktu trutru. Luku na geval fu Eleanor pikinso. A man fu en ben siki srefsrefi, èn wan yari langa a no ben kan wroko. Eleanor ben abi tu nyunyu pikin nanga na sorgu fu wan owru papa sodati a no ben kan teki ete wan heri dei wroko. Den aksi Yehovah fu kisi yepi. Syatu bala dati den ben feni wan mamanten wan envelop na ondro den doro. Wan bun bigi pis moni ben de na ini — nofo fu psa a libi te leki a man ben kan wroko baka. Den ben de grantangi fu a yepi disi di ben kon na tapu a yoisti momenti. Na bijbel no e gi wi no wan enkri reide fu fruwakti dati so wan sortu sani sa psa nanga ibri mofina kristen, ma wi kan de seiker Yehovah sa yere na babari fu wi fu kisi yepi en dati a abi na makti fu yepi wi tapu difrenti fasi.

¹² Wan kristen weduwe ini zuid sei fu Afrika ben du wroko fu sorgu gi ensrefi nanga tu yongu pikin. Ma nanga ala prisiri a ben wani fu wroko soso afu dei fu pasa ooktu ete wan pisten nanga den. Bakadi a ben feni wan wroko, a ben libi en baka di na basi ben teki a bosroiti dati a ben abi wan uma leki sekretarsi fu wroko heri dei fanowdu. Agen a ben de sondro wroko, èn na sisa disi ben begi fayafaya na Yehovah fu kisi yepi. Dri wiki na baka en fosten basi ben aksi en fu kon baka fu wroko au dei. Fa a ben pisiri! A ben frustan dati Yehovah ben yere en begi.

Begi Yehovah tranga

13. (a) San den e bedoel nanga „faya begi”? (b) Sortu eksempre fu bijbel fu faya begi wi abi?

¹³ Luku dati Paulus baka en rai: „Un no broko-ede fu noti”, e taki moro fara ete „ma meki ini ala sani nanga begi fu faya begi makandra nanga taki tangi den tranga begi fu yu kon bekenti na Gado” (Filipi 4:6). Fu san-ede a e kari „faya begi”? A wortu wani taki „wan tranga kasi” ofu „wan faya begi”. Wan sma e begi Gado tranga kande soleki disi de na ini ten fu bigi spanning ofu kefar. Di Paulus ben de wan straf’man, a ben aksi kompe-kristen fu seni faya begi fu na bun fu en go na Gado sodati a ben kan de sondro frede „fu kan preiki na bun nyunsu . . . leki wan boskopuman ini bui” (Efese 6:18-20). Ooktu na Romein legre-officier Cornelius „ben seni doronomo faya begi go na Gado”. O bigi na prisiri fu en ben musu de di wan engel ben taki: „Den begi fu yu èn presenti fu sar’ati opo go na tapu leki wan memre na a fesi fu Gado”! Èn fa a ben abi bun ede dati a ben de den fosi heidensma di ben kisi salfu nanga santa yeye! — Tori fu den Apostel 10:1-4, 24, 44-48.

14. Fa wi sabi efu sowan faya begi musu seni go soso wantron na Yehovah?

¹⁴ A de wan moi sani fu si dati sowan sortu faya begi na Gado no soso de wan afersi fu wantron nomo. Yesus ben leri ini en barnen Bergipreiki: „tan aksi, èn yu sa kisi; tan suku èn yu sa feni; tan naki doro èn den sa opo doro gi yu” (Mattéus 7:7). Furu bijbelvertaling e vertaal disi nanga „aksi . . . suku . . . naki doro.” Ma na Griki tongo di ben de biginbigin e tyari a prakseri kon a tapu wan sani di e go doronomo.a

15. (a) Fu san-ede Nehemia ben de nanga sari di a ben gi win na kownu Artaxerxes? (b) Fa Nehemia ben du moro leki seni wan syatu begi go?

¹⁵ Di Nehemia ben dini a kownu Artaxerxes fu Persië leki a man di e kanti wini gi en, a kownu ben aksi en fu san-ede a ben sari so. Nehemia ben taki dati disi ben du kon fu di a ben kon sabi dati Yerusalem ben de ini wan brokobroko toestand. A kownu ben aksi dan: „San yu wani dati musu psa.” Wantewante Nehemia ben aksi Yehovah fu kisi yepi, sondro degedege bun syatu, ini tiri fasi. Moro fara a ben aksi pasi fu drai go baka na Yerusalem fu bow en lobi foto baka. Den ben yere na aksi fu en (Nehemia 2:1-6). Ma bifo na takmakandra dati di ben tyari wan bosroiti kon Nehemia ben begi dei langa na Yehovah fu kisi dek’ati (Nehemia 1:4-11). Yu e si sortu leri de ini disi gi yu?

Yehovah e piki

16. (a) Sortu prenspari grani Abraham ben abi? (b) Fu sortu krakti yepisani wi abi di kan prei wan rol ini a kisi fu piki tapu wi begi?

¹⁶ Na bepaalde okasi Abraham ben abi na okasi fu taki nanga Yehovah nanga yepi fu engel (Genesis 22:11-18; 18:1-33). Aladi disi no e psa moro ini a ten disi, toku Gdo blesi wi nanga krakti yepisani di Abraham no ben abi. Wan fu den na a heri bijbel — wan fonten fu tiri nanga trowstu di alaten yu kan feni sani na ini (Psalm 119:105; Romeini 15:4). Bun furutron a bijbel kan gi unu tiri ofu dek’ati di wi abi fanowdu, èn pe Yehovah e yepi unu fu memre den presi fu a bibel di wi abi fanowdu. Furutron wan a concordantie ofu wan fu den furu bijbelpublikatie di Gado gi nanga yepi fu en organisatie kan gi wi na piki. Wan tumsi bun index di e go finfini tapu tori tapu den publikatie disi de ete wan yepisani fu bun furu waarde fu feni den fanowdu bodoi.

17. Tapu sortu tra fasi Yehovah kan yere wi begi, èn fa kristensma nanga switi fasi èn di e firi gi trawan kan yepi sma?

¹⁷ Efu wi de nanga wan problema ofu wi e firi sari ofu wi las’ati, dan a yere di Gado yere den begi fu wi kan kon ooktu tapu tra fasi. Na so wan bijbellezing ini na gemeente ofu tapu. wan kongres fu Yehovah Kotoigi kan abi (na dresi di wi abi fanowdu). Tapu tra momenti wan pikin takmakandra nanga wan tra kresten sa gi wi san wi abi fanowdu. Furutron owruman kan gi ini a gemeente dek’ati ofu rai. Srefi na tyari kon gewoon a doro san de tapu wi ati gi wan lepi kristen di abi switifasi èn e firi gi trawan èn di de wan bun arkiman, nofotron kan meki wi firi wisrefi moro bun. Dati de spesrutu so efu na mati disi e yepi wi fu go denki fu bijbel prakseri. Sowan kenki fu prakseri kan fri wi geest nanga ati fu wan hebi lai. — Odo 12:25; 1 Thessalonika 5:14.

18. Sortu spesrutu activiteit kan yepi kristen fu wini wan pisten fu brokoskin, èn fa disi ben yepi wan yongu pionier sisa?

¹⁸ Ini ala den „tranga ten disi . . . di de muilek fu psa” dan ala sortu fu broko-saka-firi de wan gewoon sani (2 Timotéus 3:1). Fu difrenti sortu reide meki sma e lasi ati èn e firi brokosaka. Disi kan psa ooktu nanga kristensma, èn a kan de wan tumsi takru ondrofeni di no de prisiri. Ma furu sma ben si dati na preiki fu na bun nyunsu ben yepi den fu hari densrefi puru komoto fu wan brokoskin fu wan pisten.b Yu ben pruberi dati? Efu yu e firi yusrefi weri pikinso, pruberi fu abi wan prati na wan ofu tra dienst fu na Kownukondre. Fu taki nanga tra sma fu Gado kownukondre furutron sa yepi yu fu meki na firi fu yu di de neatief kon tron positief. Fu taki fu Yehovah èn fu gebroiki en Wortu kan gi yu prisiri — wan froktu fu en yeye — kan meki dati yu firi yusrefi tra fasi (Gal. 5:22). Wan yongu pionier sisa ben si ooktu dati fu tan druk bezig na ini a Kownukondrewroko ben meki a frustan dati „te yu teki en gersi nanga den problema di tra sma abi, [dati di fu en] ben de kefarlek pikin èn fu wan pisten”.

19. Fa wan kristen nanga wan takru gesontu ben wini negatief prakseri?

¹⁹ Sontron wan takru skin kondisi, di kande e kon moro ogri nanga sorgu ofu problema kan meki brokosaka kon. Disi kan meki wan sma tan na ai na neti nanga skreki-ati soleki ben e psa wawantron nanga wan kristen fu middelbare leeftijd nanga wan takru gesontu. Ma a ben kon si dati opregti begi ben de wan trutru yepi. Te a ben de na ai èn ben firi ensrefi ferferi, dan tiri a ben go begi na Yehovah. Disi esesi ben sorgu dati a ben firi enrefi moro betre. A ben feni ooktu wan sani di e kowru en senwe fu taki na ede-pisi fu bijbel di e gi trowstu soleki Psalm 23. Heri bun a ben ondrofeni dati Yehovah yeye, di e wroko leki wan yere fu en begi of via en Wortu ben yepi en fu meki brokosaka komoto a pasi gi wan moro koloku firi. Bakaten na man ben kan go denki na wan balans èn tiri fasi fu en probleem, aladi a ben si fa a ben kan wini den ofu fa a ben kan firi tranga fu tyari den.

20. Fu san-ede a gersi dati a yere fu den begi fu wi e tan langa fu Gado piki den?

²⁰ Disi na wan eksempel fu na fasi tapu fa begi kan gi wan piki. Ma sontron a gersi dati a feni fu wan lusu e tan langa fu kon. Fu san-ede? Kande na piki mu wakti te leki na a faste ten fu Gado. A gersi dati Gado ini son geval e gi den sma di e kon na en nanga den tranga begi na okasi fu sori na dipi fu na broko-ede fu den, na tranga lostu fu den nanga nanga na trutru fasi fu na gi di den e gi den srefi na ini a dini fu Gado. Wan fu den psalmsingiman bn abi na ondrofeni dati. — Psalm 88:13, 14; teki gersi 2 Korinte 12:7-10.

21. Fu san-ede a de wan bigi grani now fu de wan sma fu Yehovah Kotoigi, èn fa wi kan sori warderi?

²¹ A wansi fa a no fa, takmakandra nanga Gado nanga yepi fu begi de wan ondrofeni di e tranga wi bribi èn di kan opo wi puru fu wan toestand pe wi no abi howpu go na ini wan toestand pe wi abi fertrow. Fa a de wan sani di e gi trowstu fu sabi dati a e yere unu èn a e yere wi begi! Soleki Paulus ben skrifi ini a gemeente ini Filipi, dan wi mu seni wi begi èn tranga begi go makandra „nanga taki tangi” (Filipi 4:5). Iya, ala dei wi mu opo wi ati na ini tangi gi Yehovah èn ’taki tangi na ini a tori fu ala sani’ (1 Tesalonika 5:18). Disi sa meki wan krosbei èn waran banti du kon èn sa gi wi vrede. A tra artikel e meki wi si o prenspari disi de gi Yehovah dienstknegti ini na skreki èn kefarlek ten disi.

[Futuwortu]

San yu ben sa piki?

◻ Sortu sani kan meki kristensma de nanga dyompo ati?

◻ San sa yepi wi fu wini broko-ede?

◻ Fu san-ede kristensma kan de seiker dati Gado kan yepi den fu sorgu fu den fondamenti sani di den abi fanowdu?

◻ San wani taki faya begi, èn fa eksempre na ini a ten di psa e meki wi si fa Gado e du tapu dati?

◻ Tapu sortu difrenti fasi Yehovah kan yere den begi fu wi?

[Prenki na tapu bladzijde 3]

’Un hemel Tata e gi den fowru nyanyan. Un no de moro warti leki den disi?’