Aksi fu leisiman

◼ Na Wètfrubontu ben kon na wan kaba di Yesus ben dede na a postu, èn oten na nyun frubontu ben teki en presi?

Furu sma ben aksi den aksi disi, nanga dri sani di ben psa na ini prakseri: A dede fu Yesus na a pinapostu na a bakadina fu 14 Nisan 33 G.T., na pristeri fu na waarde fu en libibrudu na ini hemel èn na kanti fu na santa yeye na tapu den disipel na a ten fu na Pinksterfesa na ini 33 G.T. Den Buku e sori taki na Wètfrubontu ben kon na wan kaba nanga Pinkster èn na nyun frubontu ben teki en presi. Meki wi go luku pikinso fu san-ede disi de so.

Yehovah ben taki a fesi taki a ben sa poti „wan nyun frubontu” na ini na presi fu na Wètfrubontu baka wan pisiten, so dati pardon fu sondu ben sa gi dorodoro, san no ben kan na ondro na Wèt (Yeremia 31:31-34). Oten na sani disi, dati wani taki, taki na nyun frubontu ben o teki na presi fu na Wètfrubontu ben sa feni presi?

Na ini a fosi presi na owru frubontu, na Wètfrubontu, ben mu puru a pasi leki wan wrokosani di ben doro en marki (Galasiasma 3:19, 24, 25). Na apostel Paulus ben skrifi: „[Gado] ben gi wi na wan bun fasi pardon fu ala wi sondu èn na papira di ben skrifi nanga anu èn di ben kotoigi teige wi, èn di ben de fu verordening èn di ben de teige wi, ben figi puru; èn A ben puru en na pasi fu di a ben spikri na a pinapostu” (Kolosesma 2:13, 14).

Disi ben wani taki taki na nyun frubontu ben kon ini a presi fu na Wètfrubontu tapu a momenti fu Yesus dede?

Nôno, bika a nyun frubontu ben mu kisi krakti nanga na brudu fu na yoisti srakti-ofrandi èn ben mu sroto nanga wan nyun nasi, na yeye Israël (Hebrewsma 8:5, 6; 9:15-22). Tapu 16 Nisan Yesus ben wiki puru fu dede, èn fotenti dei a baka a ben go na heymel (Tori fu den apostel 1:3-9). Tin dei baka di a opo go na heymel ofu tapu na Pinksterdei, Yesus ben kanti „na pramisi santa yeye”, di a ben kisi fu en Tata, go tapu en disipel èn na yeye Israël ben du kon (Tori fu den apostel 2:33). Nanga leki mindriman Yesus Kristus, Gado e sroto na nyun frubontu nanga na yeye Israël.

Te unu luku den sani di e kruderi nanga makandra, dan oten na nyun frubontu ben go ini na presi fu na Wétfrubontu?

Wan suma no ben kan taki taki na Wèt ben kon na wan kaba na a ten fu na dede fu Yesus. Na ini a pisiten fu fotenti dei baka di Yesus ben kisi wan opobaka fu kisi yeye libi ma ben tan a grontapu, a ben de so taki en disipel te na a ten dati ete ben hori na Wèt. Boiti fu dati yu ben abi wan prenspari pisi fu na Wèt taki na heipristri wantron ini na yari ben mu go na ini na Moro santa presi. Na sani dati ben e prenki na opobaka fu Yesus go na ini heymel libi. Drape, na ini na de noya fu Gado a ben kan pristeri leki Mindriman fu na nyun frubontu na waarde fu en frulusu-ofrandi (Hebrewsma 9:23, 24) Tapu a gron fu dati èn leki wan kon tru fu Jeremia 31:31-34 wan nyun frubontu ben kan kisi krakti.

Na nyun frubontu ben bigin wroko di Yehovah, baka di a ben teki na frulusu-ofrandi, ben kan opo du sani. A ben kanti en santa yeye tapu Yesus getrow disipel fu meki wan nyun nasi du kon, namku na yeye Israël di de fu den sma di ben teki poti na ini na frubontu fu na kownukondre (Lukas 22:29; Tori fu den apostel 2:1-4). Disi ben buwèisi taki Gado ben puru na Wètfrubontu èn na agersi fasi ben spikri en na a postu di Yesus ben dede na en. Na Wètfrubontu ben kon na wan kaba so bun nanga Pinkster na ini a yari 33 G.T., di na nyun nâsi na yeye Israël ben kon gebôre èn na nyun frubontu ben bigin wroko ofu ben kisi krakti. — Hebrewsma 7:12; 8:1, 2.

Boiti na piki langa langa tapu a aksi, wi kan si taki Gado no ben drai baka krin krin gi na Israël na skinfasi di na Wètfrubontu ben kon na wan kaba nanga Pinkster na ini na yari 33 G.T. èn ben sori krin taki na nyun frubontu ben bigin wroko. Ini akruderi nanga na frubontu nanga Abraham, Yehovah ben sori den dyu, den proselietsma èn den Samariasma spesrutu bun-ati fu eksenpre na ini na di fu seibitenti „wiki” di ben kon na wan kaba na ini 36 G.T. (Genesis 12:1-3; 15:18; 22:18; Daniël 9:27; Tori fu den apostel 10:9-28, 44-48).

Srefi son salfu dyu kristen ben abi ten fanowdu fu seti den srefi na a sani disi taki baka 33 G.T. a no ben de moro fanowdu fu hori na Wèt: wi kan si disi fu na aksi di ben kon na fesi na tiri skin na ini 49 G.T. (Tori fu den apostel 15:1, 2). Na puru krin krin fu na Wèt ben sori taki a ben de so na ini 70 G.T., di na tempel èn den geslakti register di ben abi fu du nanga na Wèt, ben lasi gwe, fu di den Romeinsma ben pori den. — Mattéus 23:38.