Libi nanga trawan soleki fa Gado wani

1-3. (a) San furu Kresten ben kan prakseri te den e yere fu owruten Tirus? (b) Fruteri fa Kownu Hiram nanga Israel ben e wroko makandra. (c) San wi kan leri te wi e luku a tori fu Tirus?

SAN yu e prakseri te yu e yere sma e taki fu Tirus fu owruten? Furu Kresten ben o prakseri a profeititori disi di kon tru: Aleksander a Bigiwan teki den broko ston nanga tra sani di ben tan abra fu a foto Tirus, èn a bow wan dan go na a moro nyun foto fu Tirus di ben de wan èilanti. Ne a pori a foto disi (Esekièl 26:4, 12; Sakaria 9:3, 4). Ma te sma e taki fu a foto disi, dan yu ben o prakseri a fasi fa yu musu libi nanga yu Kresten brada nanga sisa noso nanga tra sma?

² Fu san ede Tirus ben kisi pori? Bijbel e taki: „Ibri tron baka Tirus e opo ensrefi. A tyari wan heri pipel leki katiboman go na Edom, èn a no memre a frubontu fu den brada. Dati meki mi musu fu strafu en. Mi o seni wan faya go na a skotu fu Tirus” (Amos 1:9, 10). Wan heri pisi ten na fesi, Kownu Hiram fu Tirus ben du bun gi David èn a gi sani fu bow a tempel fu Salomo. Salomo ben meki wan frubontu nanga Hiram èn a gi en foto na ini Galilea. Hiram ben kari Salomo „mi brada” (1 Kownu 5:1-18; 9:10-13, 26-28; 2 Samuel 5:11). Di Tirus „no memre a frubontu fu den brada” èn a seri wan tu sma fu a pipel fu Gado leki srafu, dan Yehovah si san Tirus du.

³ San wi e leri te wi e luku taki Gado krutu den Kanansma fu Tirus di den no ben libi bun nanga a pipel fu en? Wan prenspari sani di wi e leri, na taki wi musu luku bun fa wi e libi nanga wi Kresten brada nanga sisa. Na ini wan tu kapitel na fesi, den 12 profeiti ben sori wi kaba fa wi musu libi nanga trawan. Den ben sori wi taki wi no musu bedrigi sma te wi e du bisnis, èn taki wi musu tyari wisrefi na wan krin fasi. Ma den 12 buku disi abi moro sani na ini fu sori wi fa Gado wani taki wi e libi nanga trawan.

NO PRISIRI TE OGRI E MITI TRAWAN

4. Fa den Edomsma ben de „brada” fu a pipel Israel, ma san den ben du nanga den „brada”?

⁴ Yu kan leri wan sani te yu e luku fa Gado krutu Edom, wan kondre krosibei fu Israel: „Yu no ben musu tan luku nomo fa ogri miti yu brada na a dei dati. Yu no ben musu prisiri di den sma fu Yuda ben e dede” (Obadya 12). A pipel fu Tirus ben de leki „brada” fu Israel te a ben abi fu du nanga bisnis. Ma den Edomsma ben de trutru „brada” fu Israel, fu di den ben de bakapikin fu Esau, a twelengi brada fu Yakob. Srefi Yehovah ben kari den Edomsma „brada” fu Israel (Deuteronomium 2:1-4). Dati meki a no ben bun srefisrefi taki den Edomsma ben e prisiri di den Babilonsma tyari rampu kon na tapu den Dyu.​—Esekièl 25:12-14.

5. San ben kan sori taki wi abi a srefi denki leki den Edomsma?

⁵ A de krin taki Gado no ben lobi a fasi fa den Edomsma ben libi nanga den Dyu brada fu den. Ma kande wi e aksi wisrefi: ’Fa Gado feni a fasi fa mi e libi nanga den Kresten brada nanga sisa fu mi?’ Wán sani di wi musu luku, na a fasi fa wi e libi nanga wan brada te a du wan sani di wi no lobi. Kon meki wi taki dati wan Kresten du wan hati sani nanga yu, noso taki a abi wan problema nanga wan famiriman fu yu. Efu yu ’feni taki wan trawan du wan hati sani nanga yu’, dan yu o tan hori en na ati? Yu o weigri fu libi a sani noso fu du muiti fu meki sani bun baka? (Kolosesma 3:13; Yosua 22:9-30; Mateyus 5:23, 24) Te yu ben o du dati, dan yu no ben o libi bun nanga yu brada. Kande yu ben o koti pasi gi en noso kande yu ben o taki ogri fu en. Ma kon meki wi taki dati bakaten a brada disi e meki wan fowtu èn a musu kisi rai noso piri-ai srefi fu den owruman (Galasiasma 6:1). Yu ben o de leki den Edomsma èn yu ben o prisiri fu di sani miti yu brada? Fa Gado ben o wani taki yu libi nanga yu Kresten brada?

6. Te wi e luku Sakaria 7:10 nanga Mika 7:18, dan san wi musu du?

⁶ Yehovah ben meki Sakaria skrifi taki wi ’no musu prakseri srefi fu du ogri nanga wan trawan’ (Sakaria 7:9, 10; 8:17). A bun fu hori a sani disi na prakseri te wi feni taki wan brada du wan hati sani nanga wi, noso taki a du wan ogri nanga wan famiriman fu wi. Te dati de so, dan makriki wi ben kan ’prakseri fu du ogri nanga a sma’ èn fu sori tu fa wi e denki. Ma Gado wani taki wi musu teki a bun eksempre fu en. Memre taki Mika ben skrifi taki Yehovah e gi sma „pardon fu den sondu èn [a] no e tan prakseri a fowtu di den meki” (Mika 7:18).a Fa wi kan du a srefi?

7. Fu san ede wi kan bosroiti fu libi a sani te wan sma du wan hati sani nanga wi?

⁷ Kande wi e mandi fu di wan sma du wan sani nanga wi noso nanga wan famiriman fu wi. Ma a bun fu aksi wisrefi o seryusu a sani dati de. Bijbel e sori san wi musu du fu lusu trobi, srefi te wi sondu teige wi brada. Nofo tron a moro bun fu libi a sani èn fu ’no tan prakseri a fowtu’. Aksi yusrefi: ’A sani disi na wan fu den 77 leisi di mi musu gi en pardon? Fu san ede mi no e libi a sani?’ (Mateyus 18:15-17, 21, 22) Kande a gersi leki a sani di a sma du na wan bigi ogri. Ma dati sa de so ete baka wán dusun yari? Wi kan leri wan prenspari sani fu den wortu na Preikiman 5:20. A tekst dati e taki fu wan wrokoman di e prisiri fu di a e nyan èn dringi: „A sma disi no o tan prakseri den problema di e miti en na ini a syatu libi fu en, fu di a tru Gado gi en furu sani fu du, so taki a kan prisiri.” Fu di a man disi e prisiri nanga den sani dati, meki a e frigiti den problema fu en. Wi kan abi a srefi denki dati? Te wi e prakseri fa a e gi wi prisiri taki wi abi so furu Kresten brada nanga sisa, dan kande wi o man frigiti sani di no o de prenspari fu ala ten èn di wi no o memre moro na ini a nyun grontapu. Dati na wan heri tra sani leki te wi e prisiri fu di ogri miti wan trawan noso fu di wi e memre den hati sani di trawan du nanga wi.

TAIGI TRAWAN SAN TRU

8. Sortu sani ben kan muilek gi wi?

⁸ Den 12 profeiti buku e sori tu taki a prenspari srefisrefi gi Gado taki wi e taigi trawan san tru. A no de fu taki dati wi e du ala san wi man fu tan taki san tru te wi e preiki „a tru boskopu. Dati na a bun nyunsu” (Kolosesma 1:5; 2 Korentesma 4:2; 1 Timoteyus 2:4, 7). Ma kande a moro muilek gi wi fu tan taki san tru te wi e taki nanga famiriman noso nanga tra Kresten. Fu san ede?

9. O ten wi ben kan prakseri fu no taki soifri san tru? Ma san wi musu aksi wisrefi?

⁹ Oiti yu taki noso du wan sani di hati wan trawan, èn bakaten sma taki nanga yu fu a sani dati? Kande yu ben e firi syen, noso kande yu ben frustan taki a sani di yu du no bun. Te wan sma e firi so, dan a ben kan taki dati a no en du a sani dati, noso a ben kan drai a tori, soso fu no meki sma denki taki a du wan ogri. Noso te wi e firi syen, dan kande wi no e taki fu a heri tori, fu di wi no wani taki sma denki takru fu wi. Sobun, a kan taki wi e taki san tru, ma toku wi e meki sma kisi wan heri tra denki fu sani. Aladi wi no lei, soleki fa sma na ini a grontapu disi gwenti du, toku wi musu aksi wisrefi efu trutru wi „taki san tru nanga trawan” noso nanga wi brada (Efeisesma 4:15, 25; 1 Timoteyus 4:1, 2). Te wan Kresten sabi taki den sani di a e taki o meki en brada kisi wan fowtu denki fu sani, noso taki a o bribi wan sani di no tru, dan fa yu denki taki Gado ben o firi?

10. Sortu gwenti sma na ini owruten Israel nanga Yuda ben abi?

¹⁰ Den profeiti ben sabi taki son leisi srefi man nanga uma di gi densrefi abra na Yehovah, no e du san A wani. Hosea ben taki fa Gado ben e denki fu son sma fu a ten fu en: „Meki sma feti nanga den èn fufuru ala den sani fu den, bika den trangayesi mi! Mi ben de fu frulusu den, ma toku den ben e taki lei fu mi.” Boiti taki den sma disi ben e fruteri krinkrin lei fu Yehovah, sonwan fu den ’ben e fluku, èn den ben e bedrigi’ trawan. Kande den ben e drai tori srefi fu kori trawan (Hosea 4:1, 2; 7:1-3, 13; 10:4; 12:1). Hosea ben skrifi den wortu dati na ini Samaria, a noordsei kownukondre. Ma sani ben e waka moro bun na ini Yuda? Mika e taki: „Den guduman na ini a foto e du wan lo ogri. Den sma fu a foto e lei èn den e taki sani fu kori trawan” (Mika 6:12). A bun taki wi sabi fa den profeiti dati ben krutu den wan di ’ben e bedrigi’ trawan èn den wan di ben e „taki sani fu kori trawan”. Sobun, srefi Kresten di no ben o wani fruteri lei fu espresi, ben kan aksi densrefi: ’Mi e bedrigi sma son leisi? Noso mi e taki sani fu kori trawan? San Gado e fruwakti fu mi te a abi fu du nanga a tori disi?’

11. Fa Gado wani taki wi musu taki?

¹¹ Ma a moi fu sabi taki Gado ben gebroiki den profeiti tu fu fruteri wi san a e fruwakti fu wi. Sakaria 8:16 e taki: „Disi na den sani di un musu du: Te unu e taki nanga makandra, un musu taki san tru. Un musu koti krutu na wan reti fasi na den portu fu unu, so taki ala sani waka bun na ini a kondre.” Na ini a ten fu Sakaria, den owru man ben e krutu afersi na den portu fu a foto (Rut 4:1; Nehemia 8:1). Ma Sakaria no ben taki dati na den okasi dati wawan sma ben musu taki san tru. Wi musu taki san tru na ini seryusu afersi, ma wi e kisi a rai disi tu: „Te unu e taki nanga makandra, un musu taki san tru.” Sobun, wi musu taki san tru te wi de na oso, iya, te wi e taki nanga wi trowpatna, noso nanga tra sma na ini wi osofamiri. Boiti dati, wi musu taki san tru te wi e taki nanga wi Kresten brada nanga sisa, awansi wi e taki fesi nanga fesi nanga den, nanga yepi fu telefon, noso na wan tra fasi. Den abi ala reide fu fruwakti taki den sani di wi e taigi den na tru tori. Kresten papa nanga mama musu sori den pikin fu den krin o prenspari a de fu no fruteri lei. Na so yonguwan o sabi taki Gado no wani taki den e taki sani fu kori trawan èn taki den musu taki san tru ala ten.​—Sefanya 3:13.

12. Sortu prenspari sani wi kan leri fu den profeiti buku?

¹² Wan yonguwan noso wan bigisma di gwenti taki san tru e agri nanga a sani disi di Sakaria e taki: „Un musu lobi san tru èn un musu sorgu taki trobi no de” (Sakaria 8:19). Luku tu san Yehovah e taki fu Yesus, soleki fa Maleaki e sori: „A no ben e lei noiti èn noiti a ben e taki sani di no fiti. A ben dini mi nanga wan krin ati èn a ben de mi mati” (Maleaki 2:6). Yu denki taki Yehovah ben o fruwakti tra fasi fu wi? Hori na prakseri taki wi abi a heri Wortu fu en, sosrefi den 12 profeiti buku nanga ala den sani di wi kan leri fu den.

NO DU OGRI-ATI SANI NANGA TRAWAN

13. Fu sortu tra problema Mika 6:12 e taki?

¹³ Mika 6:12 e taki dati na owruten pipel fu Gado ben e libi takru nanga trawan, fu di ’den ben e lei èn den ben e taki sani fu kori trawan’. Ma a vers dati e poti prakseri na wan tra seryusu sondu di den ben e du. A e taki dati den ’guduman ben e du wan lo ogri’. Fa den ben e du dati èn san a sani disi e leri wi?

14, 15. Sortu ogri-ati sani den pipel di ben e libi krosibei fu a pipel fu Gado ben e du?

¹⁴ Luku fa a ben de nanga wan tu fu den pipel di ben e libi krosibei fu a pipel fu Gado. Na a noord-owstusei yu ben abi Asiria, nanga a mamafoto, Ninefei. Nahum ben skrifi fu a foto disi: „Helu fu a foto di e kiri sma! A foto lai soso bedrigiman nanga fufuruman. Den sma fu a foto no e tapu fu fufuru sani” (Nahum 3:1). Sma ben sabi den Asiriasma leki ogri-ati fetiman di ben e du wan lo ogri-ati sani nanga den sma di den ben e tyari go na ini katibo. Den ben e bron sonwan fu den katiboman disi libilibi, den ben e puru a buba na den skin, den ben e breni trawan fu den, èn den ben e koti den noso, den yesi, noso den finga puru. Wan buku e taki: „Te sma ben e yere a nen Ninefei, dan den ben e prakseri soso a kiri, a fufuru, a kwinsi, nanga a pina di a pipel disi ben e pina den swakiwan. Den ben e du dati na ini feti èn na furu tra ogri-ati fasi” (Gods, Graves, and Scholars). Wi sabi wan sma di ben si den ogri dati (èn a kan taki ensrefi ben du den ogri dati tu). Baka di a kownu fu Ninefei ben yere a boskopu fu Yona, dan a taki fu a pipel fu en: „Meki den weri krosi di sma gwenti weri te den e sari, iya, ala libisma nanga osometi musu abi den krosi disi na den skin. Dan den musu bari kari Gado bun tranga fu yepi den. Meki den tapu nanga na ogri fasi fa den e tyari densrefi èn meki den tapu nanga den ogri sani di den e du.”​—Yona 3:6-8.b

¹⁵ A no Asiria wawan ben e du den ogri-ati sani disi. Edom, di ben de na a zuid-owstusei fu Yuda, ben musu kisi strafu tu. Fu san ede? Bijbel e taki: „Edom o tron wan sabana pe nowan sma e tan, fu di den sma fu Edom nanga Egepte du ogri nanga den sma fu Yuda. Drape den kiri sma di no du ogri” (Yoèl 3:19). Den Edomsma ben gi yesi na a warskow dati? Den ben tapu nanga den ogri fu den? Sowan tu hondro yari baka dati, Obadya ben skrifi: „Ai Teiman, [wan foto fu Edom] den tranga man fu yu o frede, . . . Fu di yu du ogri nanga yu brada Yakob, . .  meki sma o kiri yu èn noiti moro yu o de” (Obadya 9, 10). Ma fa a ben de nanga a pipel fu Gado?

16. San Amos nanga Habakuk e fruteri wi fu a ten fu den?

¹⁶ Amos ben sori san ben de a situwâsi na ini Samaria, a mamafoto fu a noordsei kownukondre: „’Luku den bruya sani di sma e du drape èn a bedrigi di den e bedrigi makandra na ini a foto dati. Sma e du furu ogri. Na ini den toren pe den e tan den e kibri den sani di den fufuru nanga tranga. Den no sabi fa fu du san reti’, na so Yehovah taki” (Amos 3:9, 10). Kande yu ben o denki taki sani ben o de tra fasi na ini Yuda, pe a tempel fu Yehovah ben de. Ma Habakuk, di ben e libi na ini Yuda, ben aksi Gado: „O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi? Fu san ede yu e meki mi si takrudu? Fu san ede yu e tan luku nomo fa sma e du ogri? Fu san ede mi musu si fa sma e fufuru sani èn fa den e pina trawan?”​—Habakuk 1:2, 3; 2:12.

17. Fa a du kon taki a pipel fu Gado ben kon abi a gwenti fu du ogri-ati sani?

¹⁷ Soleki fa wi si, dan a pipel fu Gado ben kon abi a gwenti fu du ogri-ati sani. Yu denki taki dati ben kon fu di den ben kon abi a srefi denki fu den Asiriasma, den Edomsma, noso fu tra pipel di ben e du ogri-ati sani? Salomo ben warskow taki a sani dati ben kan pasa. A ben taki: „No dyarusu na tapu wan sma di e du soso ogri èn no waka na en baka” (Odo 3:31; 24:1). Bakaten, Yeremia ben taki krin: „Disi na san Yehovah taki: ’Un no musu du nowan sani di den tra pipel e du.’”​—Yeremia 10:2; Deuteronomium 18:9.

18, 19. (a) Efu Habakuk ben de na libi now, dan fa a ben o feni den ogri-ati sani di sma e du na ini a ten disi? (b) Fa yu e denki fu den ogri-ati sani di e pasa na ini a ten disi?

¹⁸ Efu Habakuk ben de na libi now, dan yu no denki taki a ben o tegu gi den ogri-ati sani di sma e du na ini a ten disi? Yonguyongu kaba furu sma e si ogri-ati sani. Teken felem di yongu boi nanga meisje lobi luku, lai nanga ogri. Na ini den felem disi yu e si fa sma e suku fu naki trawan panya, fu sutu den panya, noso fu kiri den na wan tra fasi. Fosi yu denki, furu yonguwan e bigin prei video game pe den kan strei sutu, fringi bom, noso kiri sma na wan ogri-ati fasi. Son sma ben kan taki: „Den sani dati na game nomo.” Ma den ogri-ati computer game disi di sma e prei na oso noso na ini wan cyber, e meki sma prakseri soso ogri, èn a sani dati abi krakti tapu a denki fu den èn tapu den sani di den e du. A rai disi di Bijbel e gi na wan tru tori: „Wan man di lobi du ogri o kori en mati èn a o meki a waka wan pasi di no bun”!​—Odo 16:29.

¹⁹ Habakuk no ben man yepi taki a ben musu tan luku nomo fa sma e du ogri èn fa den ben e „pina trawan”. A sani disi ben e meki a firi sari. Now yu ben kan aksi yusrefi: ’A profeiti disi ben o firi bun efu a ben o sidon nanga mi e luku den programa di mi gwenti luku na tapu telefisi?’ Aksi yusrefi tu: ’A ben o go sidon luku den sport pe sma e du ogri-ati sani èn pe den sportman e weri den srefi fetisani leki den fetiman fu owruten?’ Na ini son sport, sma lobi te den sportman e bigin feti, noso te den sma drape e bigin feti nanga makandra leki den law na den ede. Na ini son kulturu, furu sma e luku ogri-ati felem nanga video di abi fu du nanga orloku noso nanga den sortu feti leki karate. Kande sma feni taki den felem disi e poti prakseri na a historia fu den kondre noso na a kulturu fu den. Ma a sani dati wani taki dati den ogri-ati sani na ini den felem disi bun fu luku?​—Odo 4:17.

20. Sortu tra ogri Yehovah no lobi?

²⁰ Maleaki e taki fu wan tra sani di abi fu du nanga a tori disi. A e sori fa Yehovah ben e denki fu a bedrigi di son Dyu ben e bedrigi den wefi fu den. „’Mi no lobi brokotrow kwetikweti’, na so Yehovah, a Gado fu Israel taki. ’Mi no lobi a sma di weri krosi di flaka nanga na ogri di a e du’” (Maleaki 2:16). Difrenti fasi de fa sma e frustan den Hebrew wortu di vertaal nanga „a sma di weri krosi di flaka nanga na ogri di a e du”. Son sabiman e taki dati a wani taki dati wan sma en krosi e flaka nanga brudu te a e feti nanga wan sma. Awansi fa a no fa, Maleaki ben e sori krin taki a no bun te wan man e du ogri nanga en wefi. Iya, Maleaki ben taki fu den ogri-ati sani di e pasa na ini osofamiri, èn a sori taki Gado no feni a sani dati bun.

21. Sortu ogri-ati sani Kresten no musu du?

²¹ Te Kresten e du ogri-ati sani nanga makandra na ini oso, awansi na naki den e naki makandra noso awansi na kosi den e kosi, dan dati ogri a srefi leki te sma e du den sani disi pe trawan man si. Gado e si ala sani (Preikiman 5:8). Aladi Maleaki ben taki fu na ogri di wan man e du nanga en wefi, toku Bijbel no e sori taki a bun te wan man e du ogri nanga en pikin noso nanga en papa nanga mama di owru kaba. A no bun tu efu wan wefi e du ogri nanga en masra, en pikin, noso nanga en papa nanga mama. A tru taki na ini wan osofamiri fu sondu sma, son leisi trobi o de, èn son leisi sma o atibron nanga makandra. Toku Bijbel e gi wi a rai disi: „Efu un ati e bron, sorgu taki unu no sondu. No meki son dongo, aladi unu e mandi ete.”​—Efeisesma 4:26; 6:4; Psalm 4:4; Kolosesma 3:19.

22. San e sori taki wi no abi fu du ogri-ati sani, awansi furu sma na wi lontu e du ogri?

²² Son sma di e du ogri ben kan taki: ’Mi no man yepi fu di mi gro kon na ini wan osofamiri pe sma ben gwenti feti nanga makandra.’ Noso a ben kan taki: ’Sma fu a kontren pe mi e tan noso fu a kulturu fu mi e kisi atibron makriki.’ Ma ’den guduman di ben e du wan lo ogri’, ben kweki tu na mindri sma di ben lobi du ogri nanga trawan. Toku, Mika no ben taki dati den no ben man yepi (Mika 6:12). Noa ben e libi na a ten di grontapu ben „lai ogridu”, èn den manpikin fu en ben gro kon na ini a situwâsi dati. Den ben kon abi ogri-ati fasi? Kwetikweti! „Noa ben e plisi Yehovah,” èn fu di den manpikin fu en ben teki na eksempre fu en, meki den pasa a Frudu libilibi.​—Genesis 6:8, 11-13; Psalm 11:5.

23, 24. (a) San kan yepi wi fu no tron sma di abi ogri-ati? (b) Fa Yehovah e denki fu den sma di e libi nanga trawan soleki fa en wani?

²³ Sma na heri grontapu sabi Yehovah Kotoigi leki sma di lobi meki freide. Den no sabi den leki sma di abi ogri-ati. Yehovah Kotoigi e lespeki den wèt fu lanti di e taki dati sma no mag du ogri-ati sani, èn den e hori densrefi tu na den wèt disi (Romesma 13:1-4). Den du tranga muiti fu „naki den feti-owru kon tron plugu”, èn den e du muiti fu suku freide (Yesaya 2:4). Den e pruberi fu „kisi nyun fasi”, èn a sani dati e yepi den fu no du ogri-ati sani (Efeisesma 4:22-26). Boiti dati, den e si a moi eksempre fu Kresten owruman di no mag de „sma di lobi du ogri nanga trawan”. Iya, den no mag taigi sma hati sani èn den no mag du hati sani tu nanga trawan.​—1 Timoteyus 3:3; Titus 1:7.

²⁴ Iya, wi man libi nanga trawan soleki fa Gado wani èn wi musu du dati tu. Hosea e taki: „Suma koni fu man frustan den sani disi? Suma e si sani krin fu man sabi den sani disi? Den pasi fu Yehovah reti, èn den sma di e du san reti o waka na tapu den pasi dati.”​—Hosea 14:9.