„Tan fruwakti en”

1, 2. (a) Sortu sani yu ben kan aksi yusrefi? (b) Na ini sortu ten sonwan fu den 12 profeiti ben e libi, èn sortu denki Mika ben abi?

O LANGA yu e wakti kaba taki a dei fu Yehovah kon fu puru ogridu na grontapu? O langa yu wani tan wakti a dei dati? Sortu denki yu o abi èn fa yu o libi yu libi aladi di yu e wakti? A no de fu taki dati yu o piki heri tra fasi leki den kerki sma di e libi soleki fa densrefi wani, èn di e wakti fu go na hemel.

² Aladi yu e wakti a bigi dei dati, den buku fu den 12 profeiti kan de wan bigi yepi gi yu. Furu fu den profeiti dati ben e libi na a ten di Gado ben o krutu sma. Fu eksempre, Mika ben e dini krosibei fu a ten di Gado ben o meki den Asiriasma strafu Samaria na ini 740 Fosi Krestes. (Luku a faki na tapu bladzijde 22 nanga 23.) Bakaten, Yehovah ben o krutu Yuda, soleki fa a ben taki. Mika no ben sabi soifri o ten Gado ben o krutu den pipel disi, ma yu denki taki a ben e sidon e howpu nomo taki a ten dati doro esi-esi? Luku san Mika taki: „Mi dati o wakti Yehovah. Nanga pasensi mi o wakti mi Gado di o frulusu mi. Mi Gado o yere mi” (Mika 7:7). Iya, fu di Mika ben abi a frutrow taki den sani disi ben o pasa, meki a ben de leki wan waktiman na tapu wan waktitoren èn a ben de na ai.​—2 Samuel 18:24-27; Mika 1:3, 4.

3. Sortu denki Habakuk nanga Sefanya ben abi di a pori fu Yerusalem ben e kon krosibei?

³ Luku a faki na tapu bladzijde 22 nanga 23 fu si o ten Sefanya nanga Habakuk ben e libi. Luku taki den tu profeiti disi ben e dini moro krosibei fu 607 Fosi Krestes, a ten di Yerusalem kisi pori. Ma toku den no ben kan sabi efu a krutudei fu Gado ben o kon esi-esi noso furu tenti yari bakaten (Habakuk 1:2; Sefanya 1:7, 14-18). Sefanya ben skrifi: „’Un musu tan fruwakti mi’, na so Yehovah taki, ’teleki a dei di mi o kon fu tyari den gudu gowe. Bika mi bosroiti fu . . . puru atibron na den tapu’” (Sefanya 3:8). Ma fa a de nanga Habakuk di ben e dini syatu baka Sefanya? Habakuk ben skrifi: „A fisyun o kon tru na wan spesrutu ten. A e hasti ensrefi fu doro na a kaba èn a no de wan leitori. Un musu tan fruwakti en awinsi a no pasa ete, bika a o kon tru nomonomo. A no o kon lati.”​—Habakuk 2:3.

4. Na ini sortu ten Sefanya nanga Habakuk ben e dini leki profeiti, èn sortu denki den ben abi?

⁴ Wi kan leri furu te wi e luku den tra tekst lontu Sefanya 3:8 nanga Habakuk 2:3. Na a ten dati, son Dyu ben e taki: „Yehovah no o du nowan bun èn a no o du nowan ogri.” Ma na a srefi ten dati, Sefanya ben e taki fu „a dei fu Yehovah en atibron”. Na a dei dati, na atibron fu Gado ben o kon na tapu den feanti fu a pipel fu en èn na tapu Dyu di no ben wani gi yesi na en (Sefanya 1:4, 12; 2:2, 4, 13; 3:3, 4). Yu denki taki Sefanya ben frede a krutudei fu Gado èn na atibron fu en? We, a ben kisi a rai fu „tan fruwakti” a dei dati. Ma kande yu e aksi yusrefi: ’Fa a ben de nanga Habakuk?’ A profeiti dati ben musu „tan fruwakti” a dei dati tu. Sefanya nanga Habakuk no ben frigiti den sani di ben o pasa, èn den no ben e du leki sani no ben o kenki noiti (Habakuk 3:16; 2 Petrus 3:4). Ma soleki fa wi si, dan wan prenspari sani di den tu profeiti disi ben musu du, na taki den ben musu „tan fruwakti” a dei. Soleki fa yu sabi, dan a sani di den tu profeiti disi ben e fruwakti, kon tru na ini 607 Fosi Krestes. Sobun, den du wan koni sani di den „tan fruwakti” a dei fu Gado.

5, 6. Te wi e luku den someni profeititori di kon tru kaba, dan sortu denki wi musu abi?

⁵ Yu kan de seiker tu taki „a dei fu Yehovah en atibron” o kon. Iya, a dei te a o pori a grontapu sistema disi e doro, èn yu kan bribi a sani dati. A no de fu taki dati yu no e tweifri na a tori dati. Neleki Sefanya nanga Habakuk, yu no sabi soifri o ten a dei dati o kon (Markus 13:32). Ma toku a o kon, èn den Bijbel profeititori di e kon tru na ini a ten disi e sori krin taki a o kon heri esi. Sobun, a sani di Yehovah ben taigi den profeiti dati abi fu du tu nanga yu. Yu musu „tan fruwakti” a dei dati tu. No frigiti a prenspari tru tori disi: A Gado fu wi na a wan-enkri Gado di „e yepi den wan di e tan wakti en”.​—Yesaya 64:4.

⁶ Wan fasi fa yu kan sori taki yu e fruwakti a dei dati, na te yu e tyari yusrefi na wan fasi di e sori taki yu e bribi taki „a dei fu Yehovah en atibron” o kon na a yoisti ten. Te yu e dati, dan yu e du wan sani di Yesus ben taki. A ben gi den apostel nanga ala salfu Kresten a rai disi: „Un musu weri un krosi, de srekasreka, èn meki un lampu tan leti. Un musu de leki sma di e wakti den masra . . . Koloku fu den srafu te a masra doro èn a e si taki den de na ai! Fu tru, mi e taigi unu: A masra o tai en bere, dan a o meki den sidon na tafra èn a o gi den nyanyan” (Lukas 12:35-37). Iya, te wi e tan fruwakti a dei fu Yehovah nanga a yoisti denki, dan dati e sori taki wi e bribi taki a bigi dei fu Yehovah o kon soifri na a ten di Gado feni bun.

„TAN FRUWAKTI EN” ÈN „DE SREKASREKA”

7, 8. (a) Sortu wini a pasensi fu Gado tyari kon? (b) Sortu rai Petrus e gi wi?

⁷ Den futuboi fu Gado na ini a ten disi ben e fruwakti a dei fu en fosi a Kownukondre ben seti na hemel na ini 1914, èn den e fruwakti en te now ete. Ma den no ben e sidon e wakti nomo. Na presi fu dati, den tan du a wroko fu Gado fayafaya (Tori fu den apostel 1:8). Ma luku a tori disi: Efu a bigi dei fu Yehovah ben kon na ini 1914, dan san ben o pasa nanga yu? Kon meki wi taki dati a ben kon 40 yari pasa. Yu ben e ’tyari yusrefi na wan santa fasi èn yu ben e dini Gado fayafaya’ na a ten dati? (2 Petrus 3:11) Fa a ben o de nanga den famiriman fu yu di de Kotoigi? Noso fa a ben o de nanga den bun mati fu yu na ini a gemeente? Soleki fa 2 Petrus 3:9 e sori, dan yu nanga furu trawan e kisi okasi fu kisi frulusu, fu di a dei fu Gado no kon ete. Baka di a Kownukondre seti, Yehovah no pori a heri ogri sistema wantewante. A sani dati meki taki furu sma kisi okasi fu sori berow, neleki fa den Ninefeisma ben kisi okasi fu sori berow èn tan na libi. Wi alamala abi reide fu taki a srefi sani disi di na apostel Petrus ben taki: ’Wi musu si a pasensi fu wi Masra leki wan okasi fu kisi frulusu’ (2 Petrus 3:15). Na ini a ten disi sma e kisi okasi ete fu sori berow noso fu kenki a libi nanga a denki fu den.

⁸ A kan taki wan Kresten no e broko en ede tumusi nanga a situwâsi di ben de na ini a ten fu Mika, Sefanya, nanga Habakuk. Kande a sa taki: „A sani dati pasa bun langa kaba!” Ma san wi kan leri fu a situwâsi dati? Wi taki kaba fu a rai di Petrus ben gi taki Kresten musu de sma di e ’tyari densrefi na wan santa fasi èn di e dini Gado fayafaya’. Baka di Petrus taki a sani dati, a poti prakseri na ete wan sani di wi musu du. Wi musu „tan hori bun na prakseri taki a dei [fu Yehovah] e kon” (2 Petrus 3:11, 12). Dati meki wi musu „tan hori” a dei dati „bun na prakseri”, iya, wi musu tan „fruwakti en”.

9. Fu san ede a bun te wi e tan ’wakti nanga pasensi’?

⁹ Kande wi e dini Yehovah wan tu yari kaba, noso kande wi e dini en omeni tenti yari kaba. Wi ’o wakti nanga pasensi’ neleki fa Mika ben du dati? (Romesma 13:11) A tru taki wi leki libisma e angri fu kon sabi o ten a kaba o kon èn o langa wi o abi fu wakti a dei dati ete. Ma wi no kan sabi dati. Memre a sani disi di Yesus ben taki: „Efu a masra fu na oso ben sabi sortu yuru a fufuruman ben o kon, dan a ben o tan na ai èn a no ben o meki sma broko kon na ini en oso. Dati meki un musu de srekasreka tu, bika a Manpikin fu libisma o kon na wan yuru di unu no ben prakseri.”​—Mateyus 24:43, 44.

10. San yu kan leri fu a libi èn fu a denki fu na apostel Yohanes?

¹⁰ A sani di Yesus ben taki gersi a srefi sani di Mika, Sefanya, nanga Habakuk ben skrifi. Ma a sani di Yesus ben taki no ben abi fu du nanga sma fu owruten, ma nanga den bakaman fu en, iya, nanga wi. Furu fayafaya Kresten fiti a rai fu Yesus. Den sori taki ’den de srekasreka’ èn taki den e tan fruwakti a dei fu Gado. Na apostel Yohanes de wan bun eksempre gi wi. A ben de wan fu den fo apostel na tapu na Olèif-bergi di ben aksi Yesus o ten a kaba fu a sistema disi ben o kon (Mateyus 24:3; Markus 13:3, 4). Dati ben de na ini a yari 33, ma Yohanes no ben kan sabi srefisrefi o ten a kaba ben o kon. Dan prakseri 60 yari go na fesi. Yohanes ben kon owru kaba, ma toku a no ben kon weri fu wakti. Di Yesus taigi en: „Iya, mi o kon esi”, dan Yohanes piki: „Amen! Kon, Masra Yesus.” A no ben hati Yohanes taki a ben gebroiki en heri libi fu dini en Masra. A ben de seiker taki te Yehovah ben o krutu sma, dan A ben o pai ibri sma leki fa a fiti a wroko di a sma dati du (Openbaring 22:12, 20). Awansi o ten a krutudei dati ben o kon, Yohanes ben wani de „srekasreka”, soleki fa Masra Yesus ben taigi en. Yu abi a srefi denki disi?

WI O „TAN FRUWAKTI EN” NOSO WI O ’NYAN WI BERE FURU’?

11. Fa den sma fu a ten fu Mika nanga Hosea ben de tra fasi leki den man disi?

¹¹ Luku wan tra sani di wi kan leri fu den profeiti di ben e libi na ini a ten di Yehovah ben o krutu Israel èn baka dati Yuda. Aladi Mika ben e tan ’wakti nanga pasensi’, toku furu tra sma no ben e du dati. Den sma disi ’no ben lobi san bun. Na soso ogri den ben lobi’. Mika warskow den taki efu den no ben kenki den fasi fu den, dan den ben o ’bari kari Yehovah, ma a no ben o piki den’ (Mika 3:2, 4; 7:7). Hosea, di ben e libi na ini a ten fu Mika, ben gebroiki wortu di abi fu du nanga gronwroko, di a ben e gi a noordsei kownukondre Israel a rai disi: „Sai siri fu retidu, dan unu o koti bun-ati. Sreka den gron fu unu, so taki unu man prani na tapu, bika unu abi ten ete fu suku Yehovah.” Toku furu fu den no gi yesi. Den „ben plugu ogridu”, sobun, den koti kruktudu (Hosea 10:12, 13). Den ben e tapu ai gi kruktudu, noso den ben du kruktudu, èn den ben e ’frutrow tapu densrefi’ na presi fu frutrow tapu Yehovah. Son sma na ini a ten disi ben kan aksi densrefi: ’Fa dati ben kan pasa nanga anbegiman fu a tru Gado di ben e libi leti na ini a Pramisi Kondre?’ Hosea sori taki den ben abi wan denki di no ben bun, èn wi musu luku bun nanga a denki dati efu wi wani tan fruwakti a bigi dei fu Yehovah. Sobun, wi no musu ’nyan wi bere furu’, iya, wi no musu denki taki wi libi bun kaba.

12. (a) Sortu fowtu den Israelsma ben meki bifo 740 Fosi Krestes? (b) Fa a pipel sori taki den ben „nyan den bere furu”?

¹² Baka di a pipel fu Gado go na ini a Pramisi Kondre di ben lai merki nanga oni, dan a libi ben e go bun trutru. Fa den ben si a sani dati? Hosea e skrifi san Yehovah ben taki: „A pipel nyan den bere furu nanga a nyanyan di den gron fu den ben gi. Ne den kisi heimemre. Dati meki den frigiti mi” (Hosea 13:6). Hondrohondro yari na fesi, Gado ben warskow a pipel fu en gi a sani disi (Deuteronomium 8:11-14; 32:15). Toku a pasa taki na a ten fu Hosea nanga Amos, den Israelsma frigiti Yehovah nanga den wèt fu en. Den ben „nyan den bere furu”. Amos e taigi wi moro fara san ben pasa. A e taki dati furu sma ben abi diri sani na ini den oso, èn son famiri ben abi tu oso srefi. Den ben abi den moro bun nyanyan, den ben e dringi diri win, èn den ben e lobi „den moro diri oli” gi den skin, kande na fu smeri switi (Amos 3:12, 15; 6:4-6). A no de fu taki dati a no fowtu fu abi den sani dati, ma a no ben bun srefisrefi taki a pipel ben e poti tumusi furu prakseri na den.

13. Sortu fowtu den guduwan nanga pôtiwan na ini Israel ben meki?

¹³ A tru taki a no ala sma fu a noordsei kownukondre ben kon gudu èn a no alamala ben „nyan den bere furu”. Son sma ben pôti èn den ben musu wroko tranga fu man sorgu den osofamiri (Amos 2:6; 4:1; 8:4-6). Na so a de tu na furu presi fu grontapu. A rai fu Gado na ini Hosea 13:6 ben de tu gi den pôtiwan na ini owruten Israel? A de tu gi den pôtiwan na ini a ten disi? Iya, na so a de. Yehovah ben e sori taki awansi wan tru anbegiman gudu noso pôti, toku a musu luku bun taki a no e poti so furu prakseri na den sorgu fu a libi taki a e ’frigiti Gado’.​—Lukas 12:22-30.

14. Fu san ede a bun fu luku efu wi e tan fruwakti a dei fayafaya ete?

¹⁴ Fu di someni profeititori kon tru kaba, meki wi abi moro reide fu de na ai, fu de srekasreka, èn fu tan fruwakti a dei. Ma kande wi e wakti wan pisi ten kaba, kande wan tu tenti yari kaba. Wi ben e wroko tranga na ini a preikiwroko èn wi ben e teki bosroiti di ben e sori taki wi abi a tranga bribi taki a dei fu Yehovah no ben de fara moro. Ma a dei no kon ete. Wi e tan fruwakti en ete? Aksi yusrefi: ’Mi e tan fruwakti a dei fayafaya ete, noso mi lasi a faya di mi ben abi fosi?’​—Openbaring 2:4.

15. Sortu sani kan sori taki wi no e fruwakti a dei fu Gado fayafaya moro?

¹⁵ Difrenti fasi de fa wi kan luku efu wi e tan fruwakti a dei fayafaya ete. Ma a bun te wi e luku efu wi abi den fasi fu den sma fu a ten fu Amos di ben „nyan den bere furu”. Na so wi o man si efu a srefi sani dati e pasa nanga wi. Kande wan Kresten ben libi na wan fasi di ben sori taki a ben e fruwakti a dei fayafaya. Ma a Kresten disi ben kan bigin suku fu abi wan moro diri oso noso wan moro diri wagi, den moro diri krosi nanga sani fu moi ensrefi. Kande a wani nyanyan den moro diri nyanyan. Bijbel no e taki dati wi no mag abi den sani disi noso taki wi no mag nyan bun fu a libi. Wan man di e wroko tranga ’musu nyan, a musu dringi èn a musu prisiri nanga ala a tranga wroko di a e du’ (Preikiman 3:13). Ma a no bun te wan Kresten e poti tumusi furu prakseri na nyanyan, dringi, èn na modo (1 Petrus 3:3). Yesus ben taki dati na a sani disi pasa nanga wan tu salfuwan na ini Pikin Asia, èn disi e sori taki Kresten musu luku bun nanga a tori disi (Openbaring 3:14-17). Wan srefi sortu sani pasa nanga yu? A de so taki wi e „nyan wi bere furu”? Wi e poti tumusi furu prakseri na den sorgu fu a libi? A de so taki yu no e fruwakti a dei fu Gado fayafaya moro?​—Romesma 8:5-8.

16. Fu san ede a no ben o bun te wi e gi wi pikin deki-ati fu kon abi wan gudu libi?

¹⁶ A rai di wi e gi wi pikin noso tra sma kan sori efu wi e fruwakti a dei fu Yehovah fayafaya ete. Wan Kresten ben kan denki: ’Mi no teki heiskoro leri, noso mi no suku fu meki en na ini a grontapu disi fu di mi ben denki taki a kaba ben de heri krosibei. Ma now mi wani de seiker taki den pikin fu mi e kisi a leri di o gi den okasi fu abi wan gudu libi.’ Kande son sma na ini a ten fu Hosea ben e denki so tu. Efu den ben denki taki den libi ben bun kaba, dan den ben o man gi den pikin fu den bun rai? Boiti dati, efu den pikin dati ben suku fu abi wan gudu libi, dan fa sani ben o waka nanga den na ini 740 Fosi Krestes, di den Asiriasma teki Samaria abra?​—Hosea 13:16; Sefanya 1:12, 13.

WI KAN DE SEIKER TAKI A DEI O KON

17. Fu san ede wi musu teki na eksempre fu Mika?

¹⁷ Neleki den tru anbegiman fu owruten, wi kan abi a frutrow tu taki den sani di Gado pramisi o kon tru na a yoisti ten, èn na a ten di a feni bun (Yosua 23:14). A profeiti Mika ben koni fu di a ben wakti a Gado fu en di ben o frulusu en. Fu di wi sabi san pasa na ini owruten, meki wi man si taki Mika ben e libi krosibei fu a ten di den teki Samaria abra. Fa a de nanga wi èn nanga a ten disi? Te wi e luku baka fa wi libi waka, dan wi man si taki wi teki koni bosroiti? Fa a de nanga a wroko fu wi, nanga a fasi fa wi e libi, èn nanga a furuten diniwroko? A tru taki wi no sabi „a dei nanga a yuru dati” (Mateyus 24:36-42). A no de fu taki dati wi e du wan bun sani te wi e kon abi a srefi denki fu Mika, èn te wi e du san a ben du. Te Mika kisi têgo libi na grontapu di o tron wan paradijs, dan a o breiti fu sabi taki wi kisi wini fu a profeiti boskopu fu en èn fu a bun eksempre fu en! A o si taki Yehovah na a Gado di e frulusu sma!

18, 19. (a) Sortu rampu ben o pasa, soleki fa Obadya ben taki? (b) Fa Obadya sori taki howpu ben de ete gi den Israelsma?

¹⁸ Wi abi bun reide fu bribi taki a dei fu Gado o kon. Prakseri a syatu profeiti buku fu Obadya. A buku disi e taki fu owruten Edom, èn a e sori fa Yehovah strafu a pipel di no ben libi bun nanga Israel, a „brada” fu den (Obadya 12). Edom kisi pori trutru, soleki fa wi si na ini kapitel 10 fu a buku disi. Den Babilonsma di ben de na ondro a tiri fu Nabonidus teki Edom abra na a ten fu a yari 550 Fosi Krestes, èn wan kaba kon na a pipel disi. Ma a boskopu fu Obadya e poti prakseri na wan tra prenspari sani. A sani dati e sori taki wi musu tan fruwakti a bigi dei fu Yehovah.

¹⁹ Yu sabi taki Gado ben meki Babilon di ben pori Edom, strafu a tranga-ede pipel fu en tu. Na ini 607 Fosi Krestes, den Babilonsma pori Yerusalem èn den tyari den Dyu go na ini katibo. Ne a kondre kon tron wan brokopresi. Dati ben de a kaba fu a pipel fu en? Nôno. Yehovah meki Obadya taki na fesi dati den Israelsma ben o kisi a kondre fu den baka. Na ini Obadya 17, yu kan leisi a moi pramisi disi: „Den loweman o de na Sion-bergi. A o tron wan santa presi. Den sma fu Yakob o teki den sani di de fu den.”

20, 21. Fu san ede Obadya 17 musu de wan trowstu gi wi?

²⁰ Historia e sori taki den sani di Yehovah ben meki Obadya taki, kon tru. Gado ben taki dati a ben o pasa, èn na so a pasa tu. Dusundusun katiboman di ben komoto na Yuda nanga Israel, drai kon baka na ini 537 Fosi Krestes. Nanga yepi fu Yehovah den wan di ben drai kon baka na den kondre, kenki wan brokopresi kon tron wan moi paradijs. Na Yesaya 11:6-9 nanga Yesaya 35:1-7, yu leisi fu profeititori di e taki fu a moi kenki dati di pasa. Wan tumusi prenspari sani, na taki a tru anbegi ben seti baka èn sma ben e teki prati na a anbegi disi na a tempel fu Yehovah di ben seti kon bun baka. Sobun, Obadya 17 na wan tra buweisi gi wi taki wi kan frutrow den pramisi fu Yehovah. Ala ten den e kon tru.

²¹ Na a kaba fu en profeititori, Obadya e taki a moi sani disi: „A kownumakti o kon de fu Yehovah” (Obadya 21). Aladi yu e frutrow a pramisi dati, yu e wakti a tumusi moi ten te Yehovah o meki Yesus Krestes tiri sondro taki sma na hemel noso na grontapu e gens en. Awansi yu e fruwakti a bigi dei fu Yehovah wan syatu pisi ten, noso someni tenti yari kaba, toku yu kan de seiker taki a dei dati o kon trutru èn taki yu o kisi den blesi di a o tyari kon.

22. Fu san ede yu wani abi a denki di wi e si na Habakuk 2:3 nanga Mika 4:5?

²² Dati meki a fiti te wi e poti prakseri baka na a pramisi disi fu Habakuk di abi fu du nanga a ten fu wi: „A fisyun o kon tru na wan spesrutu ten. A e hasti ensrefi fu doro na a kaba èn a no de wan leitori. Un musu tan fruwakti en awinsi a no pasa ete, bika a o kon tru nomonomo. A no o kon lati” (Habakuk 2:3). Awansi a gersi leki a bigi dei fu Yehovah e tan langa fu kon, toku a dei disi o kon, èn a o kon na a yoisti ten. Na dati Yehovah e pramisi wi. Sobun, den sma di e dini Gado omeni yari kaba èn den wan di bigin anbegi en no so langa pasa kan tan du dati makandra, aladi den e taki a sani disi di skrifi na Mika 4:5: „Fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati.”