Yu man abra go na Masedonia?

WAN leisi, na apostel Paulus ben de na a foto Troas, di ben abi wan lanpe gi sipi. A foto disi de na ini Pikin Asia. Drape Paulus kisi wan fisyun. Na ini a fisyun dati, wan man fu Masedonia begi en: „Abra kon na Masedonia fu yepi wi.” Wantewante di Paulus si a fisyun, dan en nanga den sma di ben de nanga en ’kon frustan taki Gado ben taigi den fu go fruteri den Masedoniasma a bun nyunsu’. San ben de a bakapisi? Na ini Filipi, a mamafoto fu a distrikt Masedonia, Lidia nanga en osofamiri teki a tru bribi. Na a ten dati, Masedonia ben de na ondro a makti fu Rome. Te fu kaba, tra sma na ini a kontren dati, teki a tru bribi tu.​—Tori. 16:9-15.

Na ini a ten disi, Yehovah Kotoigi e dini Gado fayafaya tu. Furu fu den ben de klariklari fu froisi go na kontren pe moro Kownukondre preikiman ben de fanowdu, èn densrefi pai ala den kostu. Fu eksempre, Lisa ben wani du moro na ini a diniwroko. A froisi gowe libi Kanada, èn a go libi na ini Kenia. Trevor nanga Emily na fu Kanada tu. Den tu sma disi go libi na Malawi, fu di den ben wani du moro na ini a preikiwroko. Paul nanga Maggie, di de fu Ingrisikondre, ben go nanga pensyun, èn den si dati leki wan tumusi moi okasi fu du moro na ini a diniwroko fu Yehovah. Den froisi go na wan kondre na a owstusei fu Afrika. Yu de klariklari fu du moro na ini a diniwroko? Yu ben o wani froisi go tu na wan tra kondre? Efu yu ben o wani du dati, dan sortu Bijbel gronprakseri nanga rai kan yepi yu fu abi bun bakapisi?

Ondrosuku yusrefi

Wan sani di yu musu ondrosuku, na a reide fu san ede yu wani froisi go tan na wan tra kondre. Yesus ben taki dati a moro bigi komando na disi: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.” Den reide fu san ede wan sma wani dini na ini wan tra kondre, musu de taki a lobi Gado, èn taki a wani du a wroko di a kisi fu meki disipel. Yesus ben taki moro fara: „A di fu tu komando de leki a wan disi, èn dati na: ’Yu musu lobi tra sma leki fa yu lobi yusrefi.’” Te wi wani yepi sma trutru, dan dati e sori taki wi lobi den sma dati (Mat. 22:36-39; 28:19, 20). Sma di e dini na ini wan tra kondre, nofo tron musu wroko tranga, èn den musu de klariklari tu fu fiti densrefi na a nyun situwâsi fu den. Den sma disi no go libi drape fu abi wan prisiri ten. Yu musu abi lobi gi trawan fu man du dati. Remco nanga Suzanne di de fu Bakrakondre, e dini now na ini Namibia. Den e taki fa a de fu dini drape: „A reide fu san ede wi e tan dyaso, na fu di wi lobi trawan.”

Willie, di de wan kring-opziener na ini Namibia, e taki: „Den sma di tan dini na ini wan tra kondre no kon nanga a denki taki den brada nanga sisa drape ben o sorgu gi den. Den kon fu dini makandra nanga den brada nanga sisa drape, èn fu yepi den na ini a preikiwroko.”

Te yu ondrosuku a reide fu san ede yu wani go dini na ini wan tra kondre, dan aksi yusrefi: ’Sortu ondrofeni mi abi di sa yepi mi fu dini na ini wan tra kondre? Mi man du a preikiwroko bun? Sortu tongo mi man taki? Mi de klariklari fu leri wan tra tongo?’ Taki seryusu fu a tori dati nanga yu osofamiri. Suku rai na den owruman na ini yu gemeente. Èn no frigiti fu begi Yehovah fu yepi yu nanga a tori disi. Te yu e ondrosuku yusrefi na a fasi disi, dan dati sa yepi yu fu kon si efu trutru yu o man dini na ini wan tra kondre.​—Luku a faki „Sabi yusrefi.”

Pe yu kan go dini?

Paulus ben kisi wan fisyun pe wan man ben kari en fu go dini na ini Masedonia. Na ini a ten disi, Yehovah no e meki wi kisi fisyun fu sori wi san wi musu du. Ma nanga yepi fu A Waktitoren nanga tra publikâsi, a pipel fu Gado e kon sabi fu someni tra kontren pe furu yepi de fanowdu. Sobun, skrifi na tapu papira san na den kontren dati. Efu yu no de klariklari fu leri wan tra tongo, noso fu tan fu ala ten na ini wan tra kondre, dan kande yu kan dini na ini wan kondre pe furu sma e taki a tongo di yu man taki. Baka dati, pruberi fu kon sabi fa yu kan kisi visum, fa yu kan go na a kondre dati, efu sani o waka bun nanga yu na ini a kontren dati, san na den kostu fu libi drape, èn fa a weer fu a kondre dati de. Kande yu kan taki nanga sma di froisi go libi kaba na wan tra kondre. Aladi yu e suku fu kon sabi moro fu den tori disi, begi Gado fu yepi yu, so taki yu kan teki a yoisti bosroiti. Hori na prakseri taki „a santa yeye ben tapu [Paulus nanga den mati fu en] fu preiki a wortu na ini a distrikt Asia”. Den pruberi fu go na Bitinia, ma „Yesus meki taki a yeye tapu den fu go drape”. Na so a kan teki ten tu, fosi yu kan bosroiti pe a ben o bun fu go yepi nanga a preikiwroko.​—Tori. 16:6-10.

Kande yu si wan tu presi kaba pe yu kan go. Efu yu e prakseri fu go dini na ini wan tra kondre, dan skrifi wan brifi seni go na den bijkantoro fu Yehovah Kotoigi na ini den kondre pe yu ben sa wani go. Fruteri sortu diniwroko yu du èn sortuwan yu e du now, èn skrifi iniwan aksi di yu abi. Kande yu wani sabi san na den kostu fu libi na ini a kondre drape, sortu oso yu o man feni, sortu datrayepi de fu feni drape, èn efu yu o man feni wan wroko. Baka dati, tyari a brifi, noso den brifi fu yu gi den brada fu a diniwroko komte na ini a gemeente fu yu. Den sa skrifi wan brifi tu fu fruteri a bijkantoro fu a tra kondre taki yu bun nofo fu dini drape. Den sa poti a brifi dati makandra nanga a di fu yu, èn den sa seni den go langalanga na den bijkantoro di yu seni brifi gi. Te den bijkantoro dati seni brifi kon baka gi yu, dan dati sa yepi yu fu kon sabi pe a ben o moro bun fu go dini.

Willie, di ben kari na a bigin fu na artikel, ben taki: „Den sma di abi bun bakapisi, nofo tron go luku a kondre fosi, èn den go suku presi pe den ben o man firi koloku. Wan trowpaar kon si taki a ben o muilek gi den fu libi na ini wan farawe kontren. Sobun, den go tan na ini wan pikin foto pe moro preikiman ben de fanowdu, èn pe den ben o man libi na wan fasi di ben o yepi den fu de koloku.”

Fa fu du nanga nyun tyalensi

Te yu e froisi gowe libi yu kondre fu go tan na ini wan heri nyun kontren, dan yu sa kisi fu du nanga wan tu tyalensi. Lisa, di ben kari kaba na a bigin, e taki: „Son leisi yu ben kan firi leki yu de yu wawan, èn dati kan de wan bigi problema.” San e yepi en nanga a problema disi? A e tan wroko skinskin nanga a gemeente na ini a nyun kondre pe a e tan. A du muiti fu leri den nen fu ala brada nanga sisa na ini a gemeente. Fu man du dati, a ben e kon fruku na den konmakandra, èn baka a konmakandra a no ben e gowe wantewante, fu di a ben wani taki nanga den brada nanga sisa. Lisa ben e wroko nanga trawan na ini a diniwroko, èn a ben e kari furu fu den kon na en oso. Na so a meki nyun mati. A e taki: „Mi no e sari taki mi meki a muiti disi. Yehovah blesi mi trutru.”

Baka di den pikin fu Paul nanga Maggie go libi den eigi libi, dan Paul nanga Maggie froisi gowe libi na oso pe den ben e tan 30 yari langa. Paul e fruteri: „Mi no ben fruwakti taki a ben o makriki so fu libi den sani di wi ben abi. A sani di ben muilek gi wi, na fu gowe libi den famiriman fu wi. A ben moro muilek leki san wi ben fruwakti. Wi krei so te di wi ben e sidon na ini na opolani. Wi ben kan prakseri makriki taki wi no ben o man du a sani di wi ben wani du, ma wi frutrow tapu Yehovah. Te yu e meki nyun mati, dan dati e gi yu moro deki-ati fu horidoro.”

Greg nanga Crystal bosroiti fu froisi gowe libi Kanada, fu go tan na ini Namibia. Den du dati fu di den man taki Ingrisitongo, a moro prenspari tongo di den sma drape e taki. Ma bakaten, den kon si taki a moro bun fu leri taki a tongo fu den sma drape. Den e taki: „Son leisi wi ben e lasi-ati. Ma na di wi leri taki a tongo fu den sma drape, dan fosi wi kon frustan a kulturu fu den sma. Wi ben abi krosibei demakandra nanga den brada nanga sisa drape, èn dati yepi wi fu fiti wisrefi na a nyun kontren drape.”

Te wi abi a srefi sakafasi dati, èn te wi de klariklari fu fiti wisrefi, dan dati kan de wan bun eksempre tu gi den brada nanga sisa na ini a kondre drape. Nanga prisiri Jenny e prakseri den famiri di ben froisi go na Ierland, a kondre pe a ben kweki. A e taki: „Na den sma dati ben e sori switifasi gi trawan. Den no ben kon so taki sma ben kan dini den, ma den ben kon trutru fu dini trawan. Den ben de so fayafaya èn so koloku, taki mi ben musu fu teki na eksempre fu den.” Now Jenny nanga en masra e dini leki zendeling na ini Gambia.

Den blesi fu Yehovah „e meki sma kon gudu”

Paulus ben kisi deki-ati trutru fu den sani di a ben ondrofeni na ini Masedonia! Sowan tin yari baka dati, a skrifi den brada na ini Filipi: „Ala ten te mi e prakseri unu, mi e taki mi Gado tangi.”​—Fil. 1:3.

Na so Trevor nanga Emily e denki tu. Den tu sma disi ben e dini na ini Malawi, fosi den kisi a kari fu go na a Waktitoren Bijbelskoro Gilead. Den e taki: „Aladi wi ben e aksi wisrefi son leisi efu wi ben teki a yoisti bosroiti, toku wi ben de koloku. Wi ben kisi moro lobi gi makandra, èn wi ben e firi taki Yehovah ben e blesi wi.” Greg nanga Crystal, di ben kari kaba na ini na artikel, e taki: „Wi no ben o wani du nowan enkri tra sani.”

A tru taki a no ala sma sa man dini na ini wan tra kondre. Gi son sma a moro bun fu froisi go na wan tra presi na ini den eigi kondre, fu man yepi pe moro preikiman de fanowdu. Tra sma kan suku fu dini na ini tra gemeente krosibei fu pe den e tan. San prenspari, na taki yu musu du ala san yu man fu dini Yehovah (Kol. 3:23). Te yu e du dati, dan den wortu disi di skrifi nanga yepi fu santa yeye, sa kon tru gi yu: „A blesi fu Yehovah, na dati e meki sma kon gudu, èn a no e meki den firi sari.”​—Odo 10:22.

[Faki/​Prenki na tapu bladzijde 5]

Sabi yusrefi

Fu man kon sabi efu yu o man dini na ini wan tra kondre, dan a bun fu poti prakseri na den aksi di e kon. Aksi yusrefi nanga wan krin ati efu a ben o de wan koni sani fu froisi, èn begi Gado fu yepi yu fu teki a yoisti bosroiti. Den sani di skrifi na ini den Waktitoren di ben kon na doro kaba, kan yepi yu fu teki a bosroiti dati.

• Mi na wan sma di lobi Gado?​—„Stappen die tot geluk leiden”(15 oktober 1997, bladzijde 6)

• Mi man du a preikiwroko bun?​—„Hoe een success te maken van de pioniersdienst” (15 mei 1989, bladzijde 21)

• Mi man libi sondro mi famiri nanga mi mati?​—„Het hoofd bieden aan heimwee in Gods dienst” (15 mei 1994, bladzijde 28)

• Mi man leri wan nyun tongo?​—„Yu kan dini na ini wan gemeente pe sma e taki wan tra tongo?” (15 maart 2006, bladzijde 17)

• Mi abi a moni fu froisi go tan na wan tra kondre?​—„Yu kan go dini na ini wan tra kondre?” (15 oktober 1999, bladzijde 23)

[Prenki na tapu bladzijde 6]

Te wi abi sakafasi, èn te wi de klariklari fu fiti wisrefi, dan dati kan de wan bun eksempre gi den brada nanga sisa fu a kondre

[Prenki na tapu bladzijde 7]

Den sma di e kon fu dini dyaso, na den wan di abi bun bakapisi