Na meki bekenti na ala sey fu bun nyunsu

GADO kownukondre e tiri! Disi na a moro bun nyunsu di de. Na fu dati-ede meki moro leki 3.700.000 kotoygi fu Yehovah na a heri grontapu na ini 1989 nanga faya ben preyki na „bun nyunsu”, di Yeyses ben taki fu en a fesi èn „den prisiri ten” di na engel fu Yohanes fisyun ben meki bekenti (Mateyus 24:14; Openbaring 14:6). So leki na apostru Paulus ben taki: „Na ini a heri grontapu na bbari fu den ben go, èn den taki fu den te na den uku fu grontapu pe libisma e libi” (Rome sma 10:18). Èn sma fu pikinmoro ibri nâsi nanga lo nanga tongo nanga pipri nanga prisiri ben teki na kari fu den fu ’frede Gado èn gi en glori’. — Openbaring 14:7.

Libiverzekering no de moro

Wan fu den ben de wan man na ini Ingrisikondre di ben feni en brede ini na onseykerfasi fu a libi. Ken ben de wan seriman fu libiverzekering, èn di a ben naki na doro fu wan osofamiri fu Yehovah Kotoygi, den ben aksi en: „Yu ben sa wani fu libi na ini wan grontapu pe libiverzekering no sa de fanowdu moro?” San den ben wani taki nanga dati? Taki so leki na beybri taki, dan furu sani di e meki a libi de so onseyker now, so srefi siki nanga dede, no sa de moro na ondro Gado kownukondre.

So wan sani kan? Iya, Gado srefi ben pramisi dati. Fu eksenpre, na beybri e taki: „Gado srefi sa de nanga den [a libismafamiri]. Èn a sa figi ala watra-ay puru fu den ay, èn dede no sa de moro, no wan sari, no wan bbari, no wan pen no sa de moro. Den fosi sani psa gwe” (Openbaring 21:3, 4). San sa tyari so wan kenki kon? Gado kownukondre. Leki fa Gado Wortu taki, dan dyonsro a sa „masi èn tyari kon na wan kba ala den [disiten politik] kownukondre disi èn en srefi sa tan te ten di no skotu”. — Daniyel 2:44.

Yehovah Kotoygi ben tyari den sortu tekst leki disi kon na a prakseri fu hondrohondro milyunmilyun sma ini na preykiwroko fu den na a heri grontapu. Furu sma, so leki Ken, ben kon frustan taki disi no de soso wan denki pe yu e winsi sani. Na buweysi de wan di e overtoygi sma. Den pramisi disi fu Gado de fu frutrow èn sa kon tru heri-esi.

Wan tra grupu fu waarde

Den sma di e arki Yehovah Kotoygi te den e panya na prisiri boskopu fu na engel go moro fara, e kon frustan taki fu frede Gado èn fu gi en glori wani taki moro leki soso fu bribi na ini den pramisi fu beybri. A e kenki na heri luku fu den èn e fri furu sma fu den bruya fu a libi.

Rafael nanga en wefi ben ondrofeni taki disi de so. Den e libi na ini Argentina, èn di den ben trow moro leki 40 yari psa kba, den ben poti leki a moro prenspari marki na ini den libi fu wroko tranga èn fu kibri moni fu abi wan seyker tamara. Ma, 21 yari a baka, dan ala san den ben kan sori fu na tranga wroko fu den ben de wan pikin oso di ala ten baka ben musu repareer. Den no ben firi den srefi na no wan fasi moro seyker leki di den ben trow.

Ne den ben yere na bun nyunsu fu na mofo fu Yehovah Kotoygi èn ben leri fu wan moro betre sortu fu gudu èn wan moro betre sortu fu seykerfasi. Yeyses ben taki fu disi na ini en Bergi preyki di a ben taki: „Stòp fu tyari gudu kon makandra gi yu srefi na grontapu, pe moto nanga frustu e pori den, èn pe fufuruman e broko oso èn fufuru. Tyari gudu kon gi yu srefi moro furu na ini heymel, pe no moto, no frustu e pori den èn pe fufuruman no e broko oso èn fufuru.” — Mateyus 6:19, 20.

Ala di na beybri no e leri wi fu de onpraktis ini a tori fu gudu na skinfasi, toku a e gi wi tranga fu no poti wi howpu na tapu den sortu sani disi (Preykiman 7:12). Wi musu wroko moro furu fu kisi yeye gudu fu di wi e studeri na beybri, e leri sabi a wani fu Gado, èn e meki a du fu a wani dati de a fosi sani na ini wi libi (Mateyus 6:33). Rafael nanga en wefi ben bigin fu tyari den yeye gudu disi kon makandra, èn den e firi now taki den gudu trutru, no na a sey fu na moni situwâsi fu den, ma na a sey fu a matifasi fu den nanga Gado (Openbaring 3:17, 18). Na boskopu fu na kownukondre fu Gado ben de a tumusi bun nyunsu gi den.

Wan trowlibi di ben kon bun baka

Na bun nyunsu abi trutru krakti fu du bun. Fu eksenpre, Yohn, di e libi na ini Ingrisikondre, no ben abi belangstelling gi na beybri, ma na en uma nanga pikin ben abi belangstelling. Fu dati-ede den ben bigin fu go na den konmakandra fu Yehovah Kotoygi, ala di Yohn ben go dringi sopi nanga en mati. Leki wan bakapisi a ben fadon go na ini hebi dringi, smoko èn te fu kba na ini hurudu. Leki kba fu a tori a ben gwe libi en uma fu go libi nanga wan tra uma.

Sani ben seti na krutu fu broko a trow. Ma Yohn ben fruwondru fu si taki en wefi — di ben leri fu a studi fu a bun nyunsu fu libi wan kresten libi — ben e handri en te now ete nanga switifasi. Yohn no ben kan frustan fu san-ede disi ben de so. Dri wiki bifo na trow ben broko, dan na kresten waka nanga libi fu na wefi fu Yohn ben abi en bun bakapisi. Yohn ben fruteri taki a ben sari opregti fu en fasi fu libi, èn na brokotrow no ben go doro. A ben ondrosuku now na bun nyunsu ensrefi èn a ben studeri na beybri nanga Yehovah Kotoygi. Now en de so srefi wan kresten èn nanga en wefi a e meki na bun nyunsu fu na Kownukondre bekenti na tra sma.

Na ini den dey disi pe waarde ini na osofamiri e broko saka, dan furu sma fanowdu na yepi di na bun nyunsu di abi en fondamenti tapu na beybri e pristeri. Wan sma fu Yehovah Kotoygi na ini Peru ben sdon ini wan opolani na sey wan kolonel fu wan legre. Den bigin taki nanga makandra èn na kolonel ben bigin taki fu en osofamiri problema, èn so srefi a ben fruteri taki en wefi ben de wan srafu fu takru puyri nanga tabaka èn ben de so fara fu gwe libi en fu go libi nanga wan moro yongu man. Na Kotoygi ben sori en nanga takt, taki a beybri e gi bun ray ini a tori fu osofamiri afersi èn taki a ben yepi en persoonlek fu lusu en eygi osofamiri problema. — Efesiya sma 5:21–6:4.

A kolonel ben taki na Kotoygi tangi fu den trowstu wortu fu en èn ben teki wan abonnement tapu Na Waktitoren nanga Ontwaakt! so taki a ben kan kisi moro sabi fu a bun nyunsu. Dan di na Kotoygi ben e waka komoto fu na opolani, wan yongu paar ben lon go miti en èn ben aksi fu taki nanga en. „Wi ben sdon leti na fesi yu”, den ben taki, „èn wi ben yere a takimakandra fu yu nanga a man. Wi ben sa wani fu abonneer tapu den tijdschrift dati tu.” Den srefi ben wani leri sabi na bun nyunsu di kan kenki sma libi.

Wan libi di kenki

Moro fara, na bun nyunsu di abi en fondamenti tapu a beybri e kenki a libi fu sma. So leki na apostru Paulus ben taki: „A wortu fu Gado de a libi èn a abi krakti” (Hebrew sma 4:12). Disi ben de tru na ini a tori fu wan yonguman na ini Masadoniya, Grikikondre. A ben fruwondru fu sabi taki Gado nen na Yehovah so leki a beybri e taki. Fu dati-ede meki a ben aksi wan mati fu yepi en miti Yehovah Kotoygi so esi leki a kan. Sani ben seti gi tu takimakandra nanga den Kotoygi, di ibriwan fu den ben de so wan fo yuru langa. Ne na yonguman ben bigin nanga wan beybristudi di ben hori alaten baka, èn na fosi wan ben hori te nanga tu yuru na neti!

Fu sensi na fosi studi dati, na yonguman esi-esi ben tyari en libi kon ini akruderi nanga den markitiki fu na beybri. A ben go na konmakandra nanga Yehovah Kotoygi fu anbegi Gado èn ben kweki wan bigi lobi gi na Mekiman. Èn Yehovah fu en sey ben blèsi en. Na fosi wiki fu en beybristudi, a ben koti en langa wiri. Na di fu tu wiki, a ben tapu fu go na sopiwenkri nanga dansi-oso ini a howpu fu miti drape konpani di sòk. Na di fu dri wiki a ben trowe en lasti sigaret. Bakadi a studeri tu mun, a ben bigin go nanga den Kotoygi fu fruteri tra sma fu na bun nyunsu fu na Kownukondre. Iya, a ben breyti, taki Yehovah Kotoygi ben tyari na bun nyunsu go na a pisi dati fu na grontapu pe a ben libi.

Na bun nyunsu na ini strafu-oso

Srefi stafu-oso skotu no de wan sani di e tapu na bun nyunsu. Na ini Spanyorokondre wan yonguman, di nen Yosey e koti wan langa strafu fu di nanga wapen a ben ros sma èn du tra ogri sani. Ma, Yehovah Kotoygi ben man fu fruteri en na bun nyunsu, èn na boskopu fu na beybri ben kenki na fasi fa a e luku sani krinkrin. Yehovah ’ben gi en krakti’. — Filipi sma 4:13.

Yosey e taki taki a kan heri bun taki a tra pisi fu en libi na ini a seti fu sani disi a musu tan na baka isri trarki, fu en fositen waka nanga libi ede. Ma a teki dopu èn a de now wan kresten. En uma e hori baka gi en tranga èn a e proberi fu gi a pikin boy fu den wan kresten kweki. Disiten, Yosey e prati na bun nyunsu nanga konpe strafuman, di sma di e libi dorosey fu na strafu-oso muylek e miti den. Now na konpe fu en na ini a srefi cel de so srefi wan dopu kresten.

Disi na soso wantu eksenpre fu sori na bakapisi fu na preykiwroko fu Yehovah Kotoygi na a heri grontapu. Fu tru, na bun nyunsu di na engel di no de fu si ben meki bekenti Yehovah Kotoygi e panya go moro fara „leki prisiri ten na den sma di e libi na grontapu èn na ibri nâsi nanga lo nanga tongo nanga pipri”.

A de na moro bun nyunsu èn a de na wan enkri howpu gi na libismafamiri. Wi e gi yu tranga fu poti prakseri a tapu. Leki Ken nanga Yohn na ini Ingrisikondre, leki Rafael nanga en wefi na ini Argentina, leki Yosey na ini Spanyorokondre èn leki furu trawan wi e poti wi sten na di fu na engel fu gi ala sma tranga fu „frede Gado èn gi en glori, bika na yuru fu na krutu fu na sey fu en doro, èn anbegi fu dati-ede na Sma di meki heymel nanga grontapu nanga se nanga den watrafonten.” — Openbaring 14:7.