Na moro prenspari dei na ini 1991
1 A jari disi na moro prenspari datum na tapoe wi kalender na satra 30 maart. Na a dei dati, baka sondongo, wi sa hori na Memrefesa foe memre na dede foe Jesus (1 Kor. 11:20, 24). Foe san-ede na datum foe na dede foe Jesus ben meki kon tron wan dei di wi moesoe memre spesroetoe?
SAN NA MEMREFESA WANI TAKI
2 Na dede foe Jesus ben de wan sani di ben de prenspari gi hemel nanga grontapoe. Na apostel Paulus ben skrifi gi memre foe na gemeente di salfoe nanga santa jeje: „Someni tron leki oenoe e njan a brede disi èn e dringi a beker disi, oenoe e tan meki na dede foe Masra bekenti, te leki a kon” (1 Kor. 11:26). Na Memrefesa e poti soboen spesroetoe prakseri tapoe san na dede foe Jesus Krestes wani taki na ini a doe foe Jehovah prakseri. A e poti krakti na tapoe san na ofrandi dede foe Jesus wani taki, spesroetoe ini a tori foe na njoen froebontoe èn na fasi fa na dede foe en abi krakti tapoe denwan di sa de den kompe erfgenaam foe en na ini a hemel kownoekondre. — Joh. 14:2, 3; Hebr. 9:15.
3 Foedi a ben kibri en soifri-retifasi te na ini dede, Jesus ben meki na nen foe en Tata kon santa èn ben boeweisi taki wan volmaakti libisma ben sa kan sori ensrefi kotrow na Gado, na ondro ibri sortoe foe tesi di Satan ben sa kan tjari na tapoe en. Na dede foe en so srefi ben sorgoe gi na volmaakti libisma srakti-ofrandi di ben de fanowdoe foe bai den bakapikin foe Adam kon fri èn a ben opo na okasi gi ibri sma di ben sa sori bribi, foe libi foe têgo na tapoe wan paradijs grontapoe. Foe ala sani ede di ben sa doe nanga jepi foe na dede foe Jesus, a ben fiti heri boen taki a ben gi en disipel na ordroe foe memre na dede foe en. — rs blz. 152, 153 (Bakratongo).
FA WI KAN SORI WARDERI
4 Na ini a grontapoe, fesa e feni presi a heri jari langa, èn den e doe foeroe foe meki reklame gi den. Kontrari foe dati na Avondmaal foe Masra na a wanenkri fesa di den bakaman foe Jesus di e gi densrefi, ben moesoe hori. A de sondro degedege gi ala troe kresten na moro prenspari fesa foe na jari. A no de so taki foedi na Avondmaal foe Masra, di wi e memre, wani taki so foeroe, meki a moesoe boeweigi wi foe poti prakseri na tapoe dati na ini a moen maart?
5 Kande na ini maart wi ben sa kan gebroiki ibri wiki wantoe miniti foe taki nanga wi bijbelstudie, foe den tekst di e poti krakti na tapoe san na dede foe Krestes wani taki èn di meki kon a krin gi den san na a gron gi na Memrefesa. Wi ben sa kan gi den deki-ati so srefi foe waka finifini na baka na bijbel leisiprograma di abi foe doe nanga na Memrefesa, soleki dati skrifi na tapoe na Kalender foe Jehovah Kotoigi 1991 (Bakratongo) gi 25-30 maart. Disi kan jepi den foe meki na warderi foe den gi na Avondmaal foe Masra kon moro dipi.
6 Foedi na Memrefesa de na tapoe wan satra, meki a sa de moro makriki gi foeroe sma foe seti den afersi na so fasi taki den kan de drape. Foeroe preikiman e njanboen foe en taki na ini maart, feifi kaba foe na wiki de, foedi den e dini leki jepipionier. Disi e meki den man foe poti na fesa foe na Avondmaal foe Masra na a fosi presi, na wan moro bradi fasi. A e gi ekstra okasi foe jepi njoenwan foe sreka densrefi na ini den denki, na tapoe na spesroetoe okasi disi.
7 Meki wi, foedi na Memrefesa de so prenspari, doe ala san wi kan foe jepi trawan foe de drape. Boen sani foe jepi joe foe memre sani di abi foe doe nanga den finifini sani di den owroeman moesoe seti, de foe feni na ini Wi Kownoekondredienst foe maart 1989 nanga april 1990.
8 Meki wi waka go miti na prenspari dei disi na ini 1991 nanga wan soifri koni foe man foe si sani èn nanga dipi warderi gi ala san na dede foe Jesus wani taki gi na libismafamiri. Ija, meki a de so taki wi alamala de drape na tapoe na neti foe 30 maart, te den troe anbegiman foe Jehovah e gi jesi ete wan leisi na a gebod foe Jesus foe „meki na dede foe Masra bekenti, te leki a kon”.