Drai go baka ala ten
1 Leki dinari foe a boen njoensoe, wi kisi a komando foe meki disipel (Mat. 28:19, 20). Tjari gobaka na wan prenspari pisi foe a wroko foe wi foe meki disipel. Wi e froestan taki libi de ini a tori disi èn foe dati ede wi wani foe doe ala moeiti foe meki a fosi belangstelling di sma ben sori, gro moro fara.
2 Wi moesoe si ibri aparti sma di wi ben libi boekoe gi en, leki sma di warti wan gobaka. Ma a libi di wi e libi boekoe a baka, no moesoe de a wan enkri fondamenti foe tjari wan gobaka. Foeroe sma de klariklari foe taki-go-taki-kon foe a bijbel boskopoe, ma den no wani boekoe. So boen, efoe wi e si taki belangstelling de, dan seiker wi moesoe go baka èn proeberi foe meki a belangstelling gro moro fara.
3 Go baka pe wi libi boekoe gi sma: Foe di a nomroe foe boekoe gi sma de krinkrin moro foeroe leki a nomroe foe den gobaka, dan disi e sori taki moro kan doe foe go a fesi ini na afersi disi. Wan pionier ben libi wan boekoe gi wan sma, ma ben kon si taki na ososma ben abi pikinso belangstelling nomo. Wan bakadina, baka di a ben tjari ala den tra gobaka foe en, a brada ben bosroiti foe go na a sma disi. Den ben bigin wan bijbelstudie.
4 Wán brada ben libi toe tijdschrift na wan man, ma ben frigiti en, foe di a ben prakseri taki a no ben abi troetroe belangstelling. Wan toe dei a baka, a man ben skrifi a gemeente foe a presi dati wan brifi foe aksi den foe dopoe. Den ben aksi wan zendeling sisa san, so leki a ben firi, de a moro prenspari penti ini a jepi di a ben jepi 74 sma foe tron preikiman. A ben taki: „Wi ben doe foeroe tijdschriftwroko èn mi ben tan tjari gobaka na sma di ben teki den tijdschrift te leki mi ben man foe bigin bijbelstudie nanga den.”
5 Son leisi wi man foe libi soso wan traktaat gi na ososma na a fosi fisiti. Foeroetron traktaat kan gebroiki nanga boen bakapisi na wan gobaka foe sori fa a e go na wan bijbelstudie. Wan kringopziener di ben wroko nanga wan tra preikiman, ben libi wan traktaat gi wan oema. A ben de wan sjatoe fisiti, ma a kringopziener ben gi a sisa deki-ati foe go baka. A sisa ben tjari wan gobaka èn wantewante a ben bigin wan bijbelstudie.
6 Te sma abi belangstelling: Te na ososma no e teki boekoe na a fosi fisiti, disi no wani taki ala ten dati a no abi belangstelling. Di wan preikiman ben tjari wan gobaka na wan jongoe paar a ben kon si, taki den ben abi wan toe boekoe foe wi kaba èn ben kisi studie a fesi kaba. Wantewante den ben agri foe bigin baka nanga a studie foe den. Wan spesroetoe pionier ben si pikinso belangstelling na wan oema di ala ten ben weigri foe teki tijdschrift. A pionier ben poti den tijdschrift na wan sei èn na oema ben de klariklari foe taki-go-taki-kon foe wan toe paragraaf ini wan foe den brochure. Baka wan toe fisiti moro, a ben abi wan bijbelstudie toe tron wan wiki.
7 Ibri wan sma di gi ensrefi abra na Jehovah, moesoe firi a frantiwortoe foe abi prati na a wroko foe meki disipel. Te wi e tjari gobaka doronomo na ala sma di abi belangstelling, wi sa koti froktoe di sa tjari foeroe blesi gi wi ’èn gi den wan di e arki wi.’ — 1 Tim. 4:16.