Meki na inleiding foe wi kroederi nanga den boekoe
1 Te joe e sreka a pristeri foe joe a moen disi, dan kande joe kan go loekoe fosi san na den moro prenspari problema nanga san den sma ini joe kontren abi foe doe èn soekoe na ini den moro njoen tijdschrift noso ini wan brochure den sani di skrifi èn di e poti prakseri tapoe a praktis, bijbel loesoe.
2 Ini son birti, a kan taki sma e broko den ede taki moro nanga moro nanga moro wroko no de foe feni èn den hei kostoe foe a libi. Efoe joe e toeka nanga so wan situwâsi, dan joe ben sa kan taki spesroetoe foe a problema dati ini joe inleiding.
Joe ben sa kan taki:
◼ „Wi ben e taki nanga den birti foe wi foe a tori san ben sa kan doe foe wi de seiker taki nofo wroko nanga oso de gi ibriwan sma. Joe denki taki a de wan leti sani foe froewakti taki libisma tiri sa man doe disi? [Gi ososma okasi foe piki.] Wan sma de di sabi foe loesoe den problema disi; kon poti prakseri tapoe a pramisi foe en di e gi wi seikerfasi na Jesaja 65:21-23. [Leisi.] A Mekiman foe wi ben meki den skrifi na pramisi disi foe gi wi deki-ati, èn wi alamala abi dati fanowdoe ini den hebi ten disi, a no so?” — rs bladzijde 14.
3 Na a penti disi ini joe pristeri joe ben sa kan meki gebroiki foe materiaal foe den moro njoen tijdschrift noso foe wan brochure. Efoe joe e teki prati na a tijdschriftwroko, joe kan soekoe wan penti di fiti ini a tori „Howpoe e wini a lasi di sma e lasi-ati krinkrin!” ini A Waktitoren foe juli. Efoe joe e pristeri a „Loekoe!-brochure, foe san ede joe no e sori dan fa den e prenki a njoen fasi foe denki, di abi foe doe nanga boen tanpresi èn wroko gi ala sma tapoe a kafti foe a brochure. Joe kan opo en so taki na ososma kan si na heri prenki.
4 Ini birti pe den ososma abi difrenti sani nanga san den e broko den ede, wan inleiding di kan kenki moro makriki sa de wan jepi. Kande joe sa wani gebroiki a di foe toe inleiding di skrifi ini a Taki-go-taki-kon-boekoe ondro „Kownoekondre”.
Joe ben sa kan taki:
◼ „Jesus ben leri wi begi foe a Kownoekondre foe Gado kon èn taki En wani pasa na grontapoe neleki a e pasa na hemel. Joe prakseri taki efoe a wani foe Gado sa pasa djaso oiti, taki grontapoe sa tron wan paradijs troetroe?” Baka te na ososma piki, bigin taki foe Openbaring 21:3-5 èn leisi a pisi disi.
Efoe joe e pristeri na Tiri-brochure, dan leisi den pisi, di joe soekoe na fesi na mindri trawan, foe a paragraaf di e bigin a tori na bladzijde 3. „Poti prakseri na tapoe taki den skrifi den wortoe: „Nanga jepi foe a Kownoekondre, Gado sa tjari wan kaba heri esi kon na feti, angri, siki nanga ogridoe.” Aksi na ososma sortoe wan foe den problema disi a feni taki de a moro serjoesoe wan.
Efoe joe e poti sma prakseri tapoe na 15 juli tijdschrift foe „A Waktitoren” dan joe ben sa kan taki:
◼ „Foeroe sma ben sa wani foe bribi so te taki a pramisi disi ben sa kon troe, ma den no sabi seiker efoe a bijbel na wan tjariman di den kan froetrow na tapoe. Mi de seiker taki joe sa feni taki a tori disi, ’A bijbel e taki kontrari ensrefi?’, e bow sma bribi.”
5 Jongoesma srefi kan pristeri a Kownoekondre boskopoe na wan fasi di abi boen bakapisi, srefi na sma di bigi moro den.
Te den e bigin taki foe Jesaja 65:21-23, wan jongoe preikiman ben sa kan taki:
◼ „Mi sabi taki foe di joe na wan bigi sma, taki joe abi moro foeroe ondrofeni ini a libi leki mi, ma na bijbeltekst disi na wan trowstoe gi wi alamala.”
6 Sorgoe taki oenoe skrifi ala sani finifini di oenoe libi na baka, so srefi sortoe brochure noso tijdschrift. Joe sa abi den bodoi disi fanowdoe te joe e drai go baka foe meki a belangstelling gro.