Yesus libi nanga diniwroko

Furu disipel no wani waka moro baka Yesus

YESUS e gi leri ini wan dyu kerki ini Kapernaëm fu na rol di en e prei leki na tru brede di komoto fu hemel. Ini en lezing a sori taki a e go doro tapu a takmakandra di a ben bigin nanga den sma di den ben feni en bakadi a ben draibaka komoto fu na oostsei fu na se fu Galiléa, pe den ben nyan brede nanga fisi di ben kon fu wan wondru.

Yesus e go doro nanga den sani di a e taki nanga den wortu: „A brede di mi sa gi, na mi meti fu na bun fu na libi fu na grontapu.” Soso tu yari a fesi, ini na pikin dreiten fu 30 G.T., Yesus ben taigi Nikodémus dati Gado ben lobi grontapu sote, dati a ben gi en Manpikin leki yepiman. Sobun Yesus e sori now dati ibriwan sma ini a grontapu fu libisma di na wan agersi fasi e nyan fu en meti, fu di a e sori bribi ini a srakti-ofrandi di dyonsro a sa tyari kan kisi tego libi.

Ma den sma e nakifutu na den wortu fu Yesus. „Fa a man disi kan gi wi en meti fu nyan” den e aksi. Yesus wani dati den sma di e arki en frustan dati a nyan fu en meti de na wan agersifasi. Fu poti tapu disi krakti a e taki fu dat’ede wan sani di de wan moro skreki sani efu yu sa teki en letterlek.

„Efu yu no nyan na meti fu a Manpikin èn no dringi en brudu,” so Yesus e ferklari, „dan yu no abi libi ini yusrefi. A sma di e gi ensrefi nyanyan nanga mi meti èn e dringi mi brudu, abi tego libi, èn mi sa wiki en komoto fu dede tapu na laste dei; bika mi meti na tru nyanyan èn mi brudu na tru dringi. A sma di e gi ensrefi nyanyan nanga mi meti èn e dringi mi brudu e tan ini wanfasi nanga mi èn mi ini wanfasi nanga en.”

Efu Yesus ben sori dyaso fu go du na kanibalisme (dati wani taki na nyan fu libisma) dan seiker a leri fu en ben sa de wan sani di ben sa trusu sma gwe. Ma a no de fu taki dati Yesus no e taki dya fu a letterlek nyan fu meti ofu dringi fu brudu. Soso a e poti krakti na tapu dati ala sma di e kisi tego libi, musu sori bribi ini a srakti-ofrandi di en sa tyari te a e offer en volmaakti libisma skin èn a e kanti en libi brudu a gron. Toku furu fu en disipel no e du srefi muiti fu ferstan en leri èn datmeki den e knoru: „Na tiki disi na wan sani di nowan sma kan teki; suma kan arki na en?”

Fu di Yesus sabi dati furu fu en disipel e knoru, meki a e taki: „Disi e meki yu nakifutu? San dan, efu yu ben sa si na Manpikin fu libisma e opo go te pe a ben de a fesi? Den wortu di mi e taigi unu, na yeye èn na libi. Ma son sma de a mindri unu, di no e bribi.”

Yesus e go moro fara: „Fu dat’ede mi ben taigi unu: nowan sma kan kon na mi, efu na Tata no ben gi en disi.” Disi de gi furu fu en disipel wan sani fu gwe èn no waka moro langa na en baka. Fu dat’ede neki Yesus e drai ensrefi luku en twarfu apostel: „Unsrefi no wani gwe?”

Petrus e piki: „Masra, na suma wi sa go? Yu abi wortu fu tego libi; èn wi ben bribi èn ben kon sabi dati yu de na santawan fu Gado.” Fa disi de wan tumsi moi tori fu loyaliteit, awinsi Petrus nanga den tra apostel no ben ferstan krinkrin Yesus leri fu na afersi disi kande!

Aladi Yesus e prisiri fu a piki fu Petrus, toku a e taki: „Mi no ben teki un twarfu puru? Toku wan fu unu na wan leiman.” A e sori tapu Yudas Iskariot. Kande Yesus e si tapu a momenti disi wan „bigin” ofu na fosi stap fu go na wan fowtu libifasi.

Yesus dyonsrode ben meki den sma mandi fu di a ben kakafutu fu a muiti fu den fu meki en tron kownu, èn kande den e tak-go-tak-kon: ’Fa disi kan de a Messias, efu a no wani teki a reti fu a Messias?’ A afersi disi ooktu ben sa de vers ete ini a prakseri fu den sma. Yohannes 6:51-71; 3:16.

◆ Gi suma Yesus e gi en meti, èn fa den disi e nyan en meti?

◆ Den sma e nakifutu na sortu wortu fu Yesus di taki moro fara, ma tapu san a e poti krakti?

◆ San Petrus e du te furu sma no wani waka moro a baka Yesus?