Preiki a fasi fa Gado sa tjari vrede nanga seikerfasi kon
1 Libisma ben gi foeroe idea foe doro vrede nanga seikerfasi, ma no wan foe den idea disi e satisferi den fanowdoe foe sma na heri grontapoe. Ala di relisi, ras nanga nationaal bita-atifasi, makandra nanga politiek ambisi nanga gridifasi, e sori foe den toemoesi bigi problema tapoe a pasi foe wan vrede grontapoe, troe kresten sabi taki a troetroe problema na Satan Didibri nanga a weigri di sma e weigri foe saka densrefi na ondro Jehovah Gado.—Ps. 127:1; Jer 8:9; 1 Joh. 5:19.
2 Ini januari, wi sa doe moeiti foe jepi den birtisma foe wi foe si dati na fasi fa Gado sa tjari vrede nanga seikerfasi kon, na a wan enkri fasi èn taki Jehovah abi na wan enkri loesoe gi ala den problema foe libisma.
3 Gebroiki den njoen traktaat: Wi kan prati a boskopoe disi di e bow sma, foe di wi e gebroiki njoen traktaat di den ben tjari kon a doro na a „Tjariman foe Leti”-distriktkongres. Wan makriki demonstrâsi ben sori wi fa foe gebroiki traktaat no. 19, A grontapoe disi sa tan?, foe bigin wan takimakandra èn tjari en go tapoe wan bijbelstudie. A toemoesi moi kontroe foe a profeititori foe Jesus foe a kaba foe a grontapoe disi, moesoe hari a belangstelling foe foeroe sma.
4 Foeroe miljoenmiljoen sma ini a ten disi lasi-ati, èn den e angri foe wan ten foe kon gesontoe, foe troe vrede, seikerfasi nanga tirifasi. Traktaat no. 20, Trowstoe gi den wan di lasi-ati, kan de wan troetroe fonten foe deki-ati gi foeroe sma.
5 Traktaat no. 21, Njanboen foe a osofamiri libi, e gi praktis rai foe san wi kan doe foe meki a osofamiri libi kon moro boen, srefi now di wi e wakti tapoe wan toemoesi moi tamara ini Gado njoen grontapoe.
6 Traktaat no. 22 e gi wan wantewante piki tapoe na aksi Soema e tiri grontapoe troetroe? A e froeteri san ede libisma ben gebroiki den moro takroe fasi foe pina nanga slakti makandra, ala di moro foeroe sma e angri foe wan libi foe vrede nanga seikerfasi. Ogri jeje de ini den hemel tanpresi, èn Satan en moro koni triki ben de foe meki foeroe sma bribi taki en nanga den ogri jeje foe en no de troetroe.
7 Bigin wan oso-bijbelstudie: Joe kan bigin wan oso-bijbelstudie nanga jepi foe wan traktaat, wan brochure, wan tijdschrift noso wan boekoe. Efoe joe kon sabi taki wan ososma abi wan foe den poeblikâsi foe wi kaba, pristeri na wan taktvol fasi foe sori en fa a kan gebroiki dati foe bigin wan bijbelstudie. A njoen traktaat nanga a njoen brochure, Gado e broko ede troetroe nanga wi?, na toemoesi moi jepisani foe gebroiki foe kon sabi omeni belangstelling a ososma abi èn foe bigin bijbelstudie. Na tapoe foe dati joe kan pristeri a boekoe Libi—Fa a doe kon? Nanga jepi foe evolutie? noso foe di Gado meki sani? ini velddienst te sma e sori taki den abi troetroe belangstelling gi waarheid.
8 Troetroe seikerfasi kan kon soso foe a Mekiman, Jehovah Gado. Wi wani jepi someni sma leki a kan, foe opo den ati nanga prakseri gi waarheid foe Gado Wortoe èn teki a howpoe di a e gi wi. Meki a de so taki wi e meki boen gebroiki foe den leri jepisani di wi abi foe preiki na fasi fa Gado sa tjari vrede nanga seikerfasi kon.—Jes. 2:3, 4.