Sori ini a diniwroko foe wi taki wi no e teki sma partèi
1 „Gado no e teki sma partèi”, na so Petrus ben taki, ma „a sma di e frede en èn e doe regtfardikifasi, na en a e feni boen” (Tori. 10:34, 35). A diniwroko foe wi ini a ten disi, wi e doe, foe di wi e erken dorodoro a troe disi di skrifi krinkrin. Foe dati ede, a de prenspari taki wi e doe ala moeiti foe kakafoetoe gi sani di ben sa kan tapoe wi foe tjari a boen njoensoe gi ala sma.
2 Te wi e preiki oso-foe-oso na ini son kontren, a no de wan ongewoon sani foe feni sma di no e taki noso e froestan a tongo di wi e gebroiki ini wi gemeente. A tongo e skotoe wan toe sma foe njanboen dorodoro foe a Kownoekondre boskopoe di wi e preiki. Na mindri foe den sma disi joe abi den dofoewan, di abi komunikâsi nanga jepi foe gebaar. San wi kan doe foe jepi wi foe poeroe a skotoe di e tapoe wi foe miti den sma disi boen nanga a boen njoensoe?
3 Ini 1992 a Genootschap ben seni gi ala gemeente na Sranan wan nomroe foe formulier S-70a kon, foe fisiti sma di e taki tra tongo. A marki foe a pikin formulier disi de, foe jepi foe de seiker taki sma di no e taki a tongo foe a gemeente foe a gebied pe den e libi, pe joe abi na ini toe sma di e taki nanga jepi foe gebaar, e kisi na okasi foe kisi a Kownoekondre boskopoe na ini den eigi tongo.
4 Te joe e feni wan sma ini joe gebied di dofoe noso wan di no e froestan a tongo di a gemeente e gebroiki, dan joe moesoe skrifi dati tapoe wan foe den pikin formulier disi, na wan fasi di sma kan leisi. Disi moesoe doe srefi efoe a sma no e sori taki a abi belangstelling gi a waarheid. Kande a no ala ten joe sa man foe kon sabi a nen foe a sma, ma joe moesoe skrifi na adres nanga a tongo di a e taki. A pikin formulier kan poti ini a boksoe foe velddienst raport di de na ini a Kownoekondrezaal. A sekretarsi sa tjari den pikin papira disi kon makandra, e loekoe efoe ala sani skrifi boen èn seni den go na a gemeente noso groepoe di de moro krosibei èn di e sorgoe gi sma di e taki a tongo di skrifi na tapoe a pikin formulier. Efoe a no sabi na sortoe gemeente a moesoe seni bepaalde adres foe tra tongo, a kan seni den disi na a Genootschap, foe pe den sa seni den go na a joisti gemeente.
5 Sontron a de so taki den sma di e taki tra tongo e libi fara foe makandra. A gemeente noso a groepoe di e gebroiki a tongo dati, kande moesoe wroko bigi gebied èn den sa warderi a jepi foe soekoe den sma di den man jepi kande.
6 Efoe wan gemeente noso wan groepoe no de ini a heri kontren, di kan gi kotoigi ini a tongo di de fanowdoe, kande ini wan foe den gemeente wan preikiman de, di sabi a tongo èn kan sorgoe gi na adres. Efoe srefi nanga jepi foe a bijkantoro, preikiman no de foe feni foe sorgoe gi den adres di den ben seni go na a bijkantoro, foe sma di e taki wan tra tongo, dan den brada foe den gemeente moesoe doe ala san den man, foe gi kotoigi. A brochure Njanboen foe têgo foe a libi na grontapoe!, ben sori foe de wan toemoesi boen jepisani na ini den sortoe situwâsi disi.
7 Ibri preikiman moesoe tan na ai foe gebroiki a S-70a formulier te a de fanowdoe. Efoe a gemeente no abi moro foe den formulier disi, dan den bodoi di de fanowdoe kan skrifi tapoe wan pisi papira èn dati kan gi na den brada so leki fa a skrifi na tapoesei. A gemeente sa seni aksi so esi leki a kan wan ipi foe den formulier disi. Foe di serjoesoe moeiti e doe foe go na ala sma nanga a boen njoensoe, awansi sortoe tongo den e taki, wi sa sori taki wi e prenki wi Gado, Jehovah, „soema wani de taki ala sortoe sma moesoe kisi froeloesoe èn kon kisi wan soifri sabi foe waarheid”.—1 Tim. 2:4.