Jepi den foe handri ini akroederi nanga a boskopoe
1 A preikiwroko foe wi e gi sma na okasi foe ’jere den wortoe foe a profeititori foe Openbaring’ (Openb. 1:3). Ma efoe den wani pasa „a bigi banawtoe” libilibi, dan den moesoe handri ini akroederi nanga den wortoe toe (Openb. 7:14). A abi foe doe nanga libi! So boen, de seiker foe go baka na den sma di ben sori belangstelling ini a bigin gi wan foe den pristeri di joe ben gebroiki a moen disi.
2 Efoe joe ben libi na „Openbaring Heimarki”-boekoe na baka, dan joe ben kan taki:
◼ „A de wan prisiri foe si joe baka. A lasti leisi di wi ben taki, wi ben taki foe wan foe den profeititori foe a boekoe Openbaring, èn mi ben libi wan boekoe di e froeklari en, gi joe na baka. Kande joe ben si taki, ala di a boekoe Openbaring moeilek foe froestan, tokoe wi man froestan en te wi e loekoe den sani di e pasa disiten, nanga jepi foe difrenti fondamenti bijbel waarheid. Mi ben sa wani foe teki wan toe miniti foe poti krakti na tapoe wan toe sani di abi foe doe nanga wi ten, di bijbel e taigi wi foe den.” Baka dati teki wan poeblikâsi di fiti, di joe kan gebroiki foe bigin wan oso-bijbelstudie.
3 Efoe joe ben libi a traktaat „A grontapoe disi sa tan” na baka na a fosi fisiti, dan joe ben kan taki wan sani leki disi:
◼ „Mi breiti foe miti joe na oso tide. Di mi ben fisiti joe no so langa pasa, dan wi ben taki foe den sani di e meki a marki, di ben o pasa pikinmoro na a kaba foe grontapoe [Loekoe den sani baka di fiti foe a marki na Mateus 24:3-14.] Joe ben si wan sani di ben pasa no so langa pasa na grontapoe noso ini wi libimakandra di joe e denki taki a ben kan de wan kontroe foe wan pisi foe a marki dati?” Foe di joe e gebroiki den prenki ini kapitel 16 foe na Openbaring Heimarki-boekoe, gi komentaar na tapoe a kontroe foe wan toe foe den bijbel profeititori disi. Kari na a kaba foe a fisiti, a titel foe a poebliki taki foe a wiki èn gi en wan kari foe de makandra nanga joe na a Kownoekondrezaal.
4 Efoe joe ben gi na ososma wan kari gi a Memrefesa, dan taki:
◼ „Di mi ben fisiti joe a lasti leisi, wi ben taki foe o prenspari a dede foe Jesus de gi a libisma famiri. Mi ben gi joe wan kari toe foe fisiti a Memrefesa foe en dede, di kresten na heri grontapoe sa hori tapoe 26 maart. Mi kon tide foe memre joe taki joe kisi wan kari gi a prenspari dei dati [Kari a ten nanga a presi pe a fesa sa hori.] A kan jepi joe foe froestan san na okasi wani taki, efoe wi e go loekoe wan toe foe den blesi baka di wi e njanboen foe den now leki wan bakapisi foe san Jesus ben doe gi a libisma famiri, so srefi den blesi di moesoe kon ete.” Doe moeiti baka dati foe taki makandra foe penti di e fiti di teki komoto foe wan foe den njoen tijdschrift noso foe kapitel 41 foe na Openbaring Heimarki-boekoe. Joe kan poti krakti toe na tapoe den prenki na tapoe bladzijde 294, 299, nanga 308. Efoe a kan, dan seti sani foe jepi a sma di abi belangstelling, foe kon na a Memrefesa.
5 Efoe a sma ben de wan sma di lobi arki nomo, dan disi kan abi boen bakapisi:
◼ „Mi ben prisiri sote nanga a takimakandra foe wi, di ben go foe bijbel no so langa pasa. Mi kon baka foe di mi ben sa wani foe si taki joe e njanboen foe den sani di Gado pramisi gi den sma di wani leri moro foe en.” Leisi Johanes 17:3, dan sori go na a traktaat Libi ini wan vrede njoen grontapoe.
6 Meki a de so taki a lobi foe joe gi libi èn a warderi foe joe gi a froeloesoe-paiman e boeweigi joe foe go baka na den sma di abi belangstelling. Jepi den foe handri ini akroederi nanga a span boskopoe ini Openbaring. Memre taki, „a fasti ten de krosibei”! — Openb. 1:3.