Joe e si den sani di de fanowdoe?
1 Den e taki foe Jehovah dati a de wan Jepiman nanga wan Sma di kan gi wi kibri. Wi sabi taki wi kan aksi en foe jepi wi te wi abi a jepi dati fanowdoe (Ps. 18:2; 46:1). Wi kan waka na baka na eigifasi disi foe Jehovah ini a fasi fa a abi troetroe firi gi trawan, foe di wi e jepi trawan te wi e si taki den abi jepi fanowdoe.
2 San e poesoe wan sma foe doe spesroetoe moeiti foe jepi wan tra sma? Moro foeroe sma e erken taki disi na a sani di, te wi e doe en, wi e sori lobi nanga switifasi gi trawan. Gado Wortoe e gi wi deki-ati foe disi srefisrefi (Rom. 15:1). Paulus ben gi wi tranga foe hori ’ai, no soso foe wi eigi belang ede, tapoe den sani di de foe wi, ma so toe foe hori ai tapoe den sani di de foe tra sma’.—Fil. 2:4.
3 Disi na wan sani di wi alamala kan feni prisiri na ini te wi e doe dati (Tori. 20:35). Paulus ben teki a jongoe Timoteus leki wan eksempre foe wan sma di ben sa „sorgoe troetroe gi den sani di ben de foe” den brada foe en (Fil. 2:20). A boen taki na ini a ten disi, wi abi foeroe jongoewan ini den gemeente di abi a srefi fasi foe denki èn firi. Awinsi wi jongoe noso owroe, sani de di wi kan doe efoe wi e si taki jepi de fanowdoe.
4 Oiti joe firi taki trawan abi sani fanowdoe di wi ben kan poti moro prakseri na tapoe? Kande wan brada noso wan sisa ben de na ini ati-oso èn wan toe kotoigi nomo ben kon foe fisiti en; noso wan sma di no kan doe sani ensrefi moro, ma no wan tra sma ben de foe jepi en nanga sani di a abi fanowdoe noso nanga wroko di a abi foe doe na ini a oso. Jesus e si den wan di e dini Jehovah leki memre foe wan osofamiri di troetroe e sorgoe gi makandra (Mark. 3:33-35). Ini na agersitori foe den skapoe nanga den bokoboko, a ben sori taki den wan di e njan boen foe de na a leti anoe foe a Kownoe, foe di a feni den boen, handri na so wan fasi foe di den jepi den brada foe a Kownoe.—Mat. 25:40.
5 Fa mi kan jepi? San wi kan doe foe gi jepi te wi e si taki jepi de troetroe fanowdoe? Wi sa kan de a fosiwan foe doe wan sani foe jepi ini wán noso tra fasi? Kande wan toe owroewan de di abi deki-ati fanowdoe, ma den no abi krosibei mati foe jepi den. Kande jongoewan de di abi jepi fanowdoe. Wan njoen osofamiri di bigin sori belangstelling kan kon na a Kownoekondrezaal nanga wan toe pikin, ala di a preikiman di e studeri nanga den, no de. Den sa kan warderi en efoe wan tra sma e jepi den nanga den pikin foe den.
6 Ala di wi e gro ini lobi gi waarheid èn gi Jehovah en organisâsi, wi sa gro toe ini warderi èn ini a broko di wi e broko wi ede nanga trawan na ini a gemeente. Paulus ben gi wi deki-ati foe kon moro bradi ini a tori disi (2 Kor. 6:11-13). Jesus ben poti krakti na tapoe taki, a moro prenspari fasi fa wi kan sori taki wi troetroe e waka na baka en, na foe di wi e sori lobi gi trawan.—Joh. 13:35.
7 So boen, te wi e si taki jepi de fanowdoe, dan troetroe lobi gi wi brada èn gi a gemeente moesoe poesoe wi foe teki a fosi stap foe jepi na ala sortoe fasi di wi man (Gal. 6:9, 10). A broko di wi e broko wi ede nanga trawan, e hari wi kon makandra na ini wan krosibei banti foe lobi nanga wánfasi (1 Kor. 10:24). Na a fasi disi, wi e doe san wi moesoe doe foe jepi a gemeente nanga san a abi fanowdoe.