De doeman — No de leki sma di e jere nomo
1 Troe kresten na ini a ten disi e teki a froemane foe bijbel na ati foe de doeman foe a wortoe, èn no de leki sma di e jere nomo (Jak. 1:22). Disi e meki den difrenti krinkrin foe den wan di, ala di den e taki dati den de kresten, e dini Gado nanga den mofo nomo (Jes. 29:13). Jesus ben taki krinkrin dati soso den wan di e doe a wani foe Gado sa kisi kibri. — Mat. 7:21.
2 Anbegi, sondro foe doe den wroko foe Gado, na wan soso sani (Jak. 2:26). So boen, wi moesoe aksi wisrefi: ’Fa den wroko foe mi e sori taki a bribi foe mi de troetroe? San e sori taki mi e libi troetroe akroederi san mi e bribi? Fa mi kan waka moro boen na baka na eksempre foe Jesus?’ Den eerlijk piki tapoe den aksi disi sa jepi wi foe si sortoe go na fesi wi meki, noso moesoe meki ete na ini a doe foe a wani foe Gado.
3 Leki bakaman foe Jesus, a moro prenspari marki foe wi na ini a libi, moesoe de soleki fa a psalm singiman ben taki: „Na ini Gado wi sa prèise a heri dei, èn te ten di no abi kaba wi sa gi joe nen glori” (Ps. 44:8). A krestendom na wan fasi foe libi di e sori ensrefi ala dei èn na ini ala sani di wi e doe. Wi e feni satisfaksi te wi e sori a fajafaja winsi foe wi foe prèise Jehovah na ini ala den sani di wi e doe! — Fil. 1:11.
4 Prèise Jehovah abi foe doe nanga moro leki abi wan opregti libi: Efoe Gado ben aksi noti moro foe wi leki foe tjari wisrefi na wan toemoesi boen fasi nomo, dan wi ben kan poti prakseri nomo na tapoe a meki di wi e meki wi persoonlijkheid kon moro boen. Ma tokoe, na anbegi foe wi abi na ini toe, a meki di wi e meki den toemoesi boen wroko foe Jehovah bekènti na sma foe dorosei èn a meki di wi e meki a nen foe en bekènti na poebliki! — Hebr. 13:15; 1 Petr. 2:9.
5 A preiki di wi e preiki a boen njoensoe na poebliki na wan foe den moro prenspari wroko di wi e doe. Jesus ben gi ensrefi gi a wroko disi foe di a ben sabi taki, a ben wani taki têgo libi gi den wan di ben sa arki (Joh. 17:3). Na ini a ten disi, „a diniwroko foe a wortoe” no de mendri prenspari; na a wan-enkri fasi fa sma kan kisi kibri (Tori. 6:4; Rom. 10:13). Te wi e kon sabi den boen bakapisi foe wan langa pisi ten, wi kan froestan foe san ede Paulus ben froemane wi foe „preiki a wortoe” èn foe „doe en leki wan sani di de tranga fanowdoe”. — 2 Tim. 4:2.
6 O dipi a prèise foe Jehovah moesoe de na ini wi libi? A psalm singiman ben taki dati a ben de na en prakseri a heri dei. Na so wi e firi toe? Ija, èn wi wani foe si ala leisi di wi e miti wan tra sma, leki wan toemoesi moi okasi foe taki foe a nen foe Jehovah. Wi sa loekoe foe feni okasi di e fiti, foe drai a takimakandra go na tapoe jeje afersi. Wi sa doe tranga moeiti foe abi wan prati dorodoro na ini den velddienst aktiviteit di a gemeente ben sreka. Den wan di abi na okasi, kan prakseri serjoesoe foe a pionierwroko, foe di dati e jepi wi foe poti a preikiwroko tapoe a moro foenamkoe presi na ini wi libi ala dei. A Wortoe foe Gado e gi wi a djaranti taki te wi e horidoro leki sma di e doe a wani foe Gado, wi sa de kolokoe. — Jak. 1:25.