Gi joe nen na a theokrasia diniwroko-skoro
1 A theokrasia diniwroko-skoro de leki wan jepisani foe leri foeroe miljoen Jehovah Kotoigi foe tron bedinari foe a boen njoensoe. Foeroe foe wi e memre fa wi ben e frede èn fa wi ben denki taki wi no de bekwaam di wi ben gi wi nen a fosi leisi na a skoro disi, èn now nanga tangi wi e erken a ròl di a e plei foe meki wi gro na jejefasi leki takiman èn sma di e gi leri foe a Wortoe foe Gado. (Teki gersi Tori foe den Apostel 4:13.) Joe gi joe nen na a aparti skoro disi?
2 Soema kan gi den nen? Bladzijde 75 foe Georganiseerd om onze bediening te volbrengen (Orga foe doe wi diniwroko) e piki: „Ala sma di abi doronomo demakandra nanga a gemeente kan gi den nen, èn so srefi njoen sma di e fisiti den konmakandra, so langa leki den no e libi na wan fasi di no de akroederi kresten gronprakseri.” Wi e gi ala sma di doro den markitiki — man, oema, nanga pikin-nengre — foe go na a skoro-opziener èn foe aksi foe gi joe nen.
3 Skoro programa gi 1997: A programa gi a theokrasia diniwroko-skoro programa foe 1997 e taki foe foeroe difrenti sortoe bijbel leri èn foe sma na ini bijbel, èn so srefi foe a historia foe na organisâsi. Boiti taki wi e leri foe taki èn foe man kon bekwaam foe gi leri, wi e leri den foeroe goedoe na jejefasi di wi e feni na ini a leriprograma foe en ibri wiki (Odo 9:9). Efoe wi e sreka wisrefi gi a skoro, èn dati wani taki so srefi foe leisi na alawiki bijbel-leisipisi, èn wi e fisiti en doronomo, dan wi kan kisi foeroe wini na jejefasi foe a programa.
4 Gi 1997, a moro bigi pisi foe den bijbel-leisipisi gi toewijzing nr. 2 de moro sjatoe leki den jari bifo. Te a studenti e sreka ensrefi gi a toewijzing disi, a studenti moesoe tjek heri boen omeni ten a e teki foe leisi èn dan a moesoe bepaal omeni ten foe den feifi miniti di a abi gi en toewijzing, a kan gebroiki gi a biginwortoe èn gi a kabawortoe. Disi sa gi a studenti na okasi foe gebroiki en ten dorodoro foe kweki en bekwaamfasi foe leisi èn a koni foe taki sondro foe loekoe foeroe tapoe en papira. — 1 Tim. 4:13.
5 Okasi preiki poti leki ete wan situwâsi fa wi kan doe toewijzing nr. 3, di abi en gron tapoe a Sabi-boekoe. So boen, wan sisa kan froekisi a situwâsi foe en toewijzing leki wan gobaka, wan oso-bijbelstudie, noso okasi preiki. A no de foe taki, dati moro foeroe prakseri moesoe tan poti na tapoe a gi di den moesoe gi leri nanga boen bakapisi èn no na tapoe a situwâsi.
6 Awansi joe abi a grani foe gi na instruktielezing, den bijbel edeprakseri, noso wan toewijzing gi wan studenti, joe kan sori taki joe e warderi a theokrasia diniwroko-skoro te joe e sreka joesrefi èn e oefen joe toewijzing boen, te joe e gi en nanga overtoigi èn nanga faja, te joe no pasa joe ten, èn te joe e arki èn e gebroiki a rai foe a skoro-opziener na wan getrowfasi, èn te joe e doe moeiti ala ten foe hori joe toewijzing. Na so fasi a gi di joe gi joe nen na a skoro, sa sori foe de wan blesi gi joe èn gi ala sma di de drape.