Wan fisiti di kan de wan blesi
1 Nanga prisiri Sakeus ben teki Jesus leki wan fisitiman na ini en oso. Èn a fisiti dati troetroe ben tron wan blesi! — Luk. 19:2-9.
2 Na ini a ten disi, dan Jesus, leki na Edeman foe a gemeente, e tiri den opziener foe „wei na ipi foe Gado” (1 Petr. 5:2, 3; Joh. 21:15-17). Boiti a gi di den e gi leri na den konmakandra èn a teki di den e teki fesi na ini a velddienst, dan den opziener foe a gemeente densrefi e gi jepi na wan lobi fasi, na aparti memre foe a gemeente. Ten na ten, foe dati ede, joe kan froewakti taki den owroeman densrefi sa poti prakseri na joe tapoe, a kan de na joe oso, na a Kownoekondre zaal, te wi de makandra na ini a velddienst, noso na tra okasi. Joe moesoe e frede a fisiti foe den owroeman? Kwetikweti. A fisiti di den e fisiti joe no wani taki dati na a wan noso tra fasi joe e misi wan sani. We, san na a marki foe wan herder fisiti dan?
3 Paulus ben taki dati a ben wani fisiti den brada ’foe si fa a de nanga den’ (Tori. 15:36). Ija, den owroeman di de leki skapoeman di abi lobi, abi foeroe belangstelling foe kon sabi fa a de nanga joe. Den wani gi joe jepi na jejefasi di kan de wan jepi gi joe èn kan bow joe. So wan lobi sorgoe na a sani di wi lobi Skapoeman Jehovah wani dati ibriwan foe wi moesoe kisi. — Esek. 34:11.
4 De breiti foe kisi den fisiti foe den owroeman: A marki foe Paulus foe a fisiti di a ben wani fisiti den brada ben de foe ’gi den wan toe jeje presenti so taki den kan kon tranga èn taki den ben sa kan gi makandra deki-ati’ (Rom. 1:11, 12). Wi alamala abi jeje deki-ati fanowdoe na ini den moeilek lasti dei disi, èn wi abi jepi fanowdoe foe tan tranga na ini bribi. A positief fasi fa joe sa doe wan sani tapoe wan herder fisiti, sondro tweifri sa abi leki bakapisi taki na wan heri moi fasi oenoe sa gi makandra deki-ati.
5 Warderi den foeroe winimarki di joe kan kisi foe a herder wroko foe den owroeman. Efoe wan sani noso wan aksi de di joe e broko joe ede nanga en, hori na prakseri taki den owroeman de drape na ini a gemeente foe jepi. No draidrai foe taki foe ibri sani di kan wroko kroektoe tapoe joe gosontoe na jejefasi. Warderi a lobi seti disi foe Jehovah èn abi prisiri nanga den blesi di den sortoe fisiti disi kan tjari kon gi joe.