Bribi e meki wi hori pasensi èn tan begi doronomo
„Hori pasensi; meki oen ati kon de stanfaste, foe di a denoja foe Masra kon krosibei.” — JAKOBUS 5:8.
1. Foe san ede wi moesoe prakseri foe Jakobus 5:7, 8?
JESUS KRESTES en „denoja” di sma froewakti langaten kaba, kon troe now (Mateus 24:3-14). Moro leki iniwan ten na fesi, ala sma di e taki dati den e bribi na ini Gado nanga Krestes abi reide foe prakseri foe den wortoe disi foe a disipel Jakobus: „Hori pasensi, . . . brada, te leki a denoja foe Masra. Loekoe! A gronman e tan wakti a switi froktoe foe a gron, èn e hori pasensi nanga en te leki a e kisi a froekoe alen nanga a lati alen. Oenoe so srefi, hori pasensi; meki oen ati kon de stanfaste, foe di a denoja foe Masra kon krosibei.” — Jakobus 5:7, 8.
2. San ben de wan toe foe den problema di den sma di Jakobus ben skrifi a brifi gi, ben abi?
2 Den sma gi soema Jakobus ben skrifi en brifi na ondro a krakti foe santa jeje, ben moesoe hori pasensi èn soekoe wan loesoe gi difrenti problema. Foeroe foe den ben handri kontrari san sma ben froewakti foe den wan di ben taki dati den ben e bribi na ini Gado. Foe eksempre, wan sani ben moesoe doe na bepaalde lostoe di ben gro na ini na ati foe son sma. Korostoefasi ben moesoe kon baka na mindri den fositen kresten dati. Den ben abi rai fanowdoe toe ini a tori foe pasensi èn a begi di den ben moesoe tan begi doronomo. Te wi e go loekoe san Jakobus ben taigi den, dan meki wi si fa wi kan gebroiki den wortoe foe en na ini wi libi.
Takroe lostoe e tjari pori kon
3. Foe san ede sma na ini a gemeente ben strei nanga makandra, èn san wi kan leri foe disi?
3 Vrede no ben de na mindri son sma di ben taki dati den ben de kresten, èn takroe lostoe ben de a moro prenspari reide foe san ede a situwâsi disi ben de (Jakobus 4:1-3). A strei di sma ben lobi strei ben tjari pratifasi kon, èn son sma di ben de sondro lobi ben kroetoe den brada foe den. Disi ben pasa, foe di na angri di den ben angri foe kowroe den lostoe foe a skin ben tjari wan strei kon na mindri den memre foe den skin foe den. A kan, taki wisrefi moesoe begi jepi foe man kakafoetoe gi a lostoe di a skin lostoe foe kisi bigi nen, makti, nanga goedoe, so taki wi no e doe noti foe pori a vrede na ini a gemeente (Romesma 7:21-25; 1 Petrus 2:11). Son wan foe den fosi jarihondro kresten, ben kisi bigi-ai èn den ben go so fara taki den ben kisi bita-atifasi gi makandra, wan firi foe wani kiri makandra. Foe di Gado no ben o kowroe den takroe lostoe foe den, meki den ben tan feti foe doro den marki foe den. Efoe wi abi den srefi takroe lostoe dati, dan wi e aksi kande ma wi no sa kisi, foe di wi santa Gado no e gi piki na tapoe den begi dati. — Kragisingi 3:44; 3 Johanes 9, 10.
4. Foe san ede Jakobus e kari wan toe kresten, „soetaman”, èn fa a sani disi di a taki moesoe abi krakti na wi tapoe?
4 Grontapoefasi, djaroesoe, nanga bigimemre ben de na mindri son fositen kresten (Jakobus 4:4-6). Jakobus e kari son kresten „soetaman” foe di den ben de mati foe grontapoe èn foe dati ede den ben de sma di ben doe soetadoe na jejefasi (Esekièl 16:15-19, 25-45). Seiker, wi no wani tron sma di e denki, e taki èn e doe leki grontapoe, bika dati ben sa meki taki wi e tron feanti foe Gado. En Wortoe e sori wi taki „wan tranga lostoe foe firi djaroesoe” abi foe doe nanga a takroe firi, noso „jeje” di de na ini sondoe libisma (Genesis 8:21; Numeri 16:1-3; Psalm 106:16, 17; Preikiman 4:4). Foe dati ede, efoe wi e froestan taki wi moesoe feti nanga djaroesoe, bigimemre, noso wan tra takroe firi, dan meki wi soekoe a jepi foe Gado nanga jepi foe en santa jeje. A krakti dati di Gado e gi foe di a abi no-froedini boen-atifasi, bigi moro „wan tranga lostoe foe firi djaroesoe”. Èn ala di Jehovah e gens den bigimemre sma, a sa gi wi no-froedini boen-atifasi efoe wi e feti nanga sondoe firi.
5. Na sortoe markitiki wi moesoe hori wisrefi, efoe wi wani njan boen foe a no-froedini boen-atifasi foe Gado?
5 Fa wi kan kisi a no-froedini boen-atifasi foe Gado? (Jakobus 4:7-10) Foe abi a no-froedini boen-atifasi foe Jehovah, wi moesoe gi jesi na en, èn gebroiki den sani di a seti, èn saka wisrefi na ondro ala sani di a wani (Romesma 8:28). Wi moesoe „kakafoetoe”, noso ’gens’ Didibri toe. A sa ’lon gowe libi wi’ efoe wi e tan tanapoe kánkan leki sma di e horibaka gi na universeel soevereiniteit foe Jehovah. Wi abi a jepi foe Jesus, di e tapoe pasi gi den takroe sma noso organisâsi foe grontapoe, so taki noti no kan pasa nanga wi san kan gi wi mankeri ala ten. Èn no frigiti disi noiti: Nanga jepi foe begi, a gi di wi e gi jesi, èn bribi, wi e kon krosibei na Gado, èn a e sori foe de krosibei na wi. — 2 Kroniki 15:2.
6. Foe san ede Jakobus e kari son kresten „sondari”?
6 Foe san ede Jakobus e gebroiki a wortoe „sondari” gi son sma di e taki dati den e bribi na ini Gado? Bika na den ben meki „feti” kon èn den ben abi bita-atifasi gi sma èn wan firi foe wani kiri den — fasi di no e fiti kresten kwetikweti (Titus 3:3). Den „anoe” foe den di lai nanga takroedoe, ben moesoe kon krin. Den ben moesoe meki „den ati” foe den kon krin toe, a presi foe a reide di wi abi foe doe sani (Mateus 15:18, 19). Den sma „di no ben man teki bosroiti” ben degedege na mindri a matifasi foe Gado nanga a matifasi foe grontapoe. Foe di a takroe eksempre foe den na wan warskow gi wi, dan meki wi tan de na ai so taki den sani dati no e pori a bribi foe wi. — Romesma 7:18-20.
7. Foe san ede Jakobus e taigi son sma foe „sari èn foe krei”?
7 Jakobus e froeteri den leisiman foe en foe „meki presi gi pina nanga sari nanga krei”. Efoe den ben sori sari troetroe foe di den lobi Gado, dan dati ben o de wan boeweisi foe berow (2 Korentesma 7:10, 11). Na ini a ten disi, son sma di e taki dati den abi bribi, e soekoe a matifasi foe grontapoe. Efoe iniwan foe wi e soekoe foe doe so wan sani, dan wi no moesoe sari foe a swaki jejefasi foe wi èn doe wan sani wantronwantron foe poti a tori kon reti baka? Te wi e tjari den kenki kon di de fanowdoe èn Gado e gi wi pardon, dan dati sa prisiri wi troetroe, foe di wi abi wan krin konsensi èn a prisiri froewakti foe libi foe têgo. — Psalm 51:10-17; 1 Johanes 2:15-17.
No kroetoe makandra
8, 9. Foe san ede wi no moesoe taki kontrari makandra noso kroetoe makandra?
8 A de wan sondoe foe taki wan sani kontrari wan kompe bribiman (Jakobus 4:11, 12). Ma tokoe son sma e kroetoe kompe kresten, kande foe di den e si densrefi leki wan regtfardikisma noso foe di den wani hei densrefi nanga a lagi di den e lagi trawan (Psalm 50:20; Odo 3:29). A Griki wortoe di den e vertaal nanga ’taki kontrari’ e sori na tapoe feantifasi èn a wani taki dati wi e froeteri wan leitori noso wi e meki a tori sori moro bigi leki fa a de troetroe, so taki wan sma kan kisi takroe nen. Disi de a srefi leki foe gi wan brada wan takroe kroetoe. Fa disi na a srefi leki foe ’taki kontrari a wet foe Gado èn foe kroetoe disi’? We, den leriman foe Wet nanga den Fariseiman ’ben poti a komando foe Gado na wan sei na wan koni fasi’ èn ben kroetoe sani akroederi den eigi markitiki (Markus 7:1-13). So srefi toe, efoe wi e kroetoe wan brada di Jehovah no ben o kroetoe, dan a no de so taki wi ben o ’kroetoe a wet foe Gado’ èn taki na wan sondoe fasi dati a wet foe Gado no boen? Èn foe di wi e kroetoe wi brada na wan onregtfardiki fasi, dan wi no ben sa handri akroederi a wet foe lobi. — Romesma 13:8-10.
9 Meki wi hori disi na prakseri: „Wán sma nomo de di e gi wet èn di de kroetoeman” — Jehovah. En ’wet de volmaakti’, noti no e mankeri na en (Psalm 19:7; Jesaja 33:22). Gado wawan abi a reti foe poti markitiki nanga wet di e meki sma kisi froeloesoe (Lukas 12:5). Dati meki Jakobus e aksi: „Soema na joe, taki joe e kroetoe a sma na joe sei?” A no wi abi a grani foe kroetoe tra sma (Mateus 7:1-5; Romesma 14:4, 10). Te wi e prakseri foe a soevereiniteit foe Gado èn a teki di a no e teki sma partèi èn foe wi eigi sondoefasi, dan dati moesoe jepi wi foe no kroetoe trawan na wan fasi di e sori taki wi e si wisrefi leki wan regtfardikisma.
Loekoe boen taki joe no e djaf foe di joe e froetrow toemoesi tapoe joesrefi
10. Foe san ede wi moesoe hori Jehovah na prakseri na ini wi aladei libi?
10 Wi moesoe hori Jehovah nanga a wet foe en na prakseri ala ten (Jakobus 4:13-17). A sma di e froetrow toemoesi tapoe ensrefi no abi lespeki gi Gado, èn a e taki: „Tide noso tamara wi sa teki waka go na a foto disi èn sa tan wan jari drape, èn wi sa doe bisnis èn meki winst.” Efoe wi e ’kibri goedoe gi wisrefi, ma wi no goedoe na Gado ai’, dan a libi foe wi kan kon na wan kaba tamara èn kande wi no abi no wan okasi foe dini Jehovah (Lukas 12:16-21). Soleki fa Jakobus e taki en, wi de neleki a dampoe na mamanten „di e tan wan sjatoe pisi ten nomo èn dan e gowe” (1 Kroniki 29:15). Soso te wi e sori taki wi e bribi na ini Jehovah, dan wi kan howpoe taki wi sa abi prisiri di e tan èn libi foe têgo.
11. San a wani taki te wan sma e taki: „Efoe Jehovah wani”?
11 Na presi taki wi e poti Gado na wan sei nanga a djaf di wi e djaf, wi moesoe prakseri so: „Efoe Jehovah wani, dan wi sa libi èn doe disi noso dati.” Te wi e taki: „Efoe Jehovah wani”, dan dati e sori taki wi e proeberi foe handri akroederi a wani foe en. A kan de fanowdoe taki wi moesoe doe bisnis foe sorgoe foe wi osofamiri, foe rèis foe a Kownoekondre wroko ede, èn go so doro. Ma no meki wi djaf. „Ala a djaf disi na wan godelowsoe sani”, foe di a no e poti prakseri na tapoe na abi di wi abi Gado fanowdoe. — Psalm 37:5; Odo 21:4; Jeremia 9:23, 24.
12. San den wortoe foe Jakobus 4:17 wani taki?
12 Kande foe di Jakobus wani tapoe nanga a tori di a ben taki foe a prakseri di wan sma e prakseri toemoesi foeroe foe ensrefi èn a djaf di wan sma e djaf, meki a e taki: „Efoe wan sma sabi fa foe doe san boen èn tokoe a no e doe en, dan dati na wan sondoe gi en.” Ibri kresten moesoe erken nanga sakafasi, taki a abi Gado fanowdoe. Efoe a no e doe disi, dan „dati na wan sondoe gi en”. A no de foe taki, dati disi de so toe te wi no e doe kwetikweti san bribi na ini Gado e aksi foe wi. — Lukas 12:47, 48.
Wan warskow gi den goedoeman
13. San Jakobus e taki foe den sma di e gebroiki a goedoe foe den na wan fowtoe fasi?
13 Foe di son fositen kresten ben kon lobi materia sani noso den ben loekoe den goedoeman nanga froewondroe, meki Jakobus e taki wan krakti sani ini a tori foe son goedoeman (Jakobus 5:1-6). Grontapoesma di e gebroiki a goedoe foe den na wan fowtoe fasi ben o ’krei, noso sari foe den rampoe di ben o kon na den tapoe’ te Gado ben pai den akroederi den doe foe den. A goedoe foe foeroe sma na ini a ten dati, moro foeroe ben de sani leki krosi, siri-njanjan, nanga win (Joèl 2:19; Mateus 11:8). Wan toe foe den goedoe disi kan pori noso „motoe [kan] njan den”, ma Jakobus no e poti prakseri na tapoe a pori di den goedoe disi kan pori, ma na tapoe a warti di den no warti noti. Ala di gowtoe nanga solfroe no e froestoe, tokoe efoe wi ben sa kibri den, dan den no ben o warti noti neleki sani di e froestoe. „Froestoe” wani taki dati materia goedoe no ben gebroiki na wan boen fasi. Foe dati ede, wi alamala moesoe hori na prakseri taki „wan sani leki faja” na san den sma di e froetrow tapoe den materia goedoe foe den, „kibri na ini den lasti dei” te na atibron foe Gado e kon na den tapoe. Foe di wi e libi na ini „a ten foe a kaba”, meki den wortoe dati wani taki wan spesroetoe sani gi wi. — Danièl 12:4; Romesma 2:5.
14. Fa den goedoeman e handri nofotron, èn san wi moesoe doe na dati?
14 Nofotron den goedoeman e bedrigi den kotiman foe den, èn a moni di den goedoeman no ben pai den, e ’bari kari’ so taki sma kan pai den. (Teki gersi Genesis 4:9, 10.) Den goedoeman foe grontapoe „libi na ini foeroe goedoe”. Foe di den e satisferi den lostoe foe a skin pasa marki, meki den kweki wan fatoe ati di no abi firi èn den sa doe disi ete na a „dei” di sreka foe kiri den. Den ’e kroetoe èn e kiri a regtfardikiwan’. Jakobus e aksi: „A no e gens oenoe?” Ma wan tra vertaling e taki, „a regtfardikiwan; a no e gens oenoe”. Awansi fa a no fa, wi no moesoe teki partèi gi den goedoeman. Wi moesoe poti jeje afersi na a fosi presi na ini wi libi. — Mateus 6:25-33.
Bribi e jepi wi foe hori pasensi
15, 16. Foe san ede a de so prenspari foe hori pasensi?
15 Now di Jakobus ben taki foe den goedoeman foe grontapoe di e kwinsi sma, a e gi den kresten di trawan e kwinsi deki-ati foe hori pasensi (Jakobus 5:7, 8). Efoe bribisma ben o tan froedrage den problema foe den nanga pasensi, dan den ben o kisi den pai foe di den ben de getrow na ini a ten foe Krestes denoja, te a kroetoe ben o kon na tapoe den sma di ben kwinsi den (Mateus 24:37-41). Den fositen kresten dati ben moesoe de leki a gronman di e wakti nanga pasensi na tapoe a fosi alen na ini herfst te a kan prani, èn a lati alen na ini lente di e meki froktoe gro (Joèl 2:23). Wi so srefi moesoe hori pasensi èn meki wi ati de stanfaste, spesroetoe foe di „a denoja foe Masra” Jesus Krestes de kaba!
16 Foe san ede wi moesoe hori pasensi? (Jakobus 5:9-12) Pasensi e jepi wi foe no geme noso soktoe te kompe bribiman e tanteri wi. Efoe wi „e soktoe gi makandra” nanga wan firi foe wani doe sma ogri, dan a Kroetoeman Jesus Krestes sa kroetoe wi (Johanes 5:22). Now di a „denoja” foe en bigin kaba èn a „e tanapoe na fesi den doro”, meki wi soekoe vrede foe di wi e hori pasensi nanga wi brada, di e kisi foeroe tesi na tapoe a bribi foe den. Wi eigi bribi e kon tranga te wi e hori na prakseri taki Gado ben pai Job, foe di a ben horidoro na ondro den tesi foe en nanga pasensi (Job 42:10-17). Efoe wi e sori bribi èn e hori pasensi, dan wi sa si taki „Jehovah abi foeroe safoe lobi firi èn a abi sari-atifasi”. — Mika 7:18, 19.
17. Foe san ede Jakobus e taki: „No sweri moro”?
17 Efoe wi no e hori pasensi, dan kande wi sa gebroiki a tongo na wan fasi di no boen te wi de na ondro druk. Foe eksempre, kande wi e meki sweri toemoesi esi. „No meki sweri moro”, Jakobus e taki foe warskow sma taki den no moesoe meki sweri sondro foe den prakseri serjoesoe foe dati. Te wi e meki sweri ibri leisi te wi e taki wan sani, dan a gersi wan hoigri sani toe. Foe dati ede, wi moesoe taki soso waarheid, èn meki na ija foe wi wani taki ija, èn a nôno foe wi, nôno (Mateus 5:33-37). A de krin, taki Jakobus no e taki dati a de wan fowtoe sani foe meki wan sweri foe froeteri waarheid te joe de na fesi kroetoe.
Bribi èn den begi foe wi
18. Na ini sortoe situwâsi wi moesoe „tan begi” èn „singi psalm singi”?
18 Begi moesoe plèi wan prenspari ròl na ini wi libi efoe wi moesoe dwengi a fasi fa wi e taki, hori pasensi, èn tan abi wan gosontoe bribi na ini Gado (Jakobus 5:13-20). Spesroetoe te wi e kisi tesi wi moesoe „tan begi”. Efoe wi e prisiri, dan meki wi „singi psalm singi”, soleki fa Jesus nanga den apostel foe en ben doe di a ben seti a fesa foe memre a dede foe en (Markus 14:26, foetoewortoe). Son leisi, wi wani taki Gado so foeroe tangi taki wi e singi prèisesingi srefi na ini na ati (1 Korentesma 14:15; Efeisesma 5:19). Èn fa a de wan prisiri foe prèise Jehovah na ini singi na den kresten konmakandra!
19. San wi moesoe doe efoe wi e kon siki na jejefasi, èn foe san ede wi moesoe doe so wan sani?
19 A kan taki wi no e firi foe singi te wi siki na jejefasi, kande foe di wi e tjari wisrefi na wan fasi di no boen, noso foe di wi no e njan doronomo na a tafra foe Jehovah. Efoe wi firi wisrefi so, dan meki wi abi a sakafasi foe kari den owroeman kon, so taki den kan ’begi gi wi’ (Odo 15:29). Den sa ’lobi wi nanga oli na ini a nen foe Jehovah’. Neleki switi oli na tapoe wan soro, na so den wortoe di den e taki foe trowstoe wi èn a bijbel rai di den e gi sa jepi foe poeroe depressie, tweifri, nanga frede. ’A begi foe bribi sa meki wi kon betre’ efoe wi eigi bribi e horibaka gi dati. Efoe den owroeman feni taki a siki di wi siki na jejefasi ben kon foe wan serjoesoe sondoe ede, dan den sa froeteri wi na wan switi fasi san na wi sondoe èn den sa proeberi foe jepi wi (Psalm 141:5). Èn efoe wi abi berow, dan wi kan bribi taki Gado sa jere den begi foe den èn sa gi wi pardon.
20. Foe san ede wi moesoe bekènti wi sondoe èn begi gi makandra?
20 Te wi e ’bekènti wi sondoe na makandra na wan fri fasi’, dan dati moesoe jepi wi foe dwengi wisrefi foe no doe sondoe wan tra leisi. A moesoe gi wi deki-ati foe abi sari-atifasi gi makandra, wan eigifasi di sa meki wi „begi gi makandra”. Wi kan bribi taki disi sa tjari wini kon gi wi, foe di a begi foe ’wan regtfardiki man’ — wan sma di e sori bribi èn di Gado e si leki wan opregti sma — e doe foeroe na Jehovah (1 Petrus 3:12). A profeiti Elia ben abi swakifasi neleki di wi foe wi, ma den begi foe en ben abi boen bakapisi. A ben begi, èn dri nanga afoe jari langa alen no ben kon. Di a ben begi baka, alen ben kon troetroe. — 1 Kownoe 17:1; 18:1, 42-45; Lukas 4:25.
21. San wi sa man doe efoe wan sani ’kori’ wan kompe kresten ’poeroe en foe a waarheid’?
21 San ’efoe sani kori wan memre foe a gemeente poeroe en foe a waarheid’, èn a e gowe libi a joisti leri èn a joisti fasi foe tjari ensrefi? Kande wi man gebroiki bijbel rai, begi, nanga tra jepisani foe jepi en foe no doe a sondoe moro. Efoe wi abi boen bakapisi, dan disi e meki a tan na ondro a loesoe-paiman foe Krestes èn e kibri en foe wan dede na jejefasi èn foe wan kroetoe di e tjari pori kon. Te wi e jepi a sma di doe wan sondoe, dan wi e tapoe wan heri ipi sondoe foe en. Te a sondari di kisi piri-ai e tapoe foe waka wan pasi di no boen, e sori berow, èn e soekoe foe kisi pardon, dan wi sa prisiri taki wi ben doe moeiti foe jepi foe tapoe den sondoe foe en. — Psalm 32:1, 2; Judas 22, 23.
Wan sani gi wi alamala
22, 23. Fa den wortoe foe Jakobus moesoe abi krakti na wi tapoe?
22 A de krin, taki a brifi foe Jakobus abi wan sani di kan gi wi alamala winimarki. A e sori fa wi kan kakafoetoe gi tesi, e gi wi a rai foe no sori taki wi lobi a wan sma moro a trawan, èn e gi wi tranga foe doe wroko di opregti. Jakobus e gi wi tranga foe dwengi a tongo, foe kakafoetoe gi a krakti di grontapoe abi na tapoe sma, èn foe soekoe vrede. Den wortoe foe en moesoe meki wi hori pasensi toe èn tan begi doronomo.
23 A troe taki biginbigin, a brifi foe Jakobus ben seni go gi den fositen salfoe kresten. Ma tokoe wi alamala moesoe meki a rai na ini a brifi jepi wi foe hori fasti na wi bribi. Den wortoe foe Jakobus kan gi wi deki-ati di e tranga wi bribi èn di e meki wi doe sani nanga wan fasti bosroiti na ini a diniwroko foe Gado. Èn a brifi disi di ben skrifi na ondro a krakti foe santa jeje, e bow wan bribi na ini wi di e tan èn di e meki wi de Kotoigi foe Jehovah na ini a ten disi, di e hori pasensi èn di e tan begi doronomo, na ini a ten foe „a denoja foe Masra” Jesus Krestes.
San joe ben sa piki?
◻ Foe san ede son fositen kresten ben moesoe kenki den fasi foe denki èn a fasi fa den ben tjari densrefi?
◻ Sortoe warskow Jakobus ben gi den goedoeman?
◻ Foe san ede wi moesoe hori pasensi?
◻ Foe san ede wi moesoe begi doronomo?
[Sma di abi a reti foe a prenki na tapoe bladzijde 19]
Pictorial Archive (Near Eastern History) Est.
[Prenki na tapoe bladzijde 23]
Son fositen kresten ben moesoe hori moro pasensi nanga kompe bribiman
[Prenki na tapoe bladzijde 24]
Kresten moesoe hori pasensi, de nanga lobi èn tan begi doronomo