A bosroiti foe wi—Foe waka Jehovah en pasi foe libi
1 Wan heimarki foe a „Gado pasi foe libi” kongres ben de a bosroiti di ben teki na ini a lasti lezing. A ben bigin nanga a froeklari: „Wi . . . e agri nanga wi heri ati taki Gado pasi na a moro boen fasi foe libi.” Memre wan toe prenspari penti foe a bosroiti dati pe wi ben taki: „IJA!”
2 A de a bosroiti foe wi foe tan krin na fesi foe Jehovah èn foe no meki a grontapoe disi doti wi. Wi sa tan poti a wani foe Gado na a fosi presi na ini wi libi. Foe di wi e gebroiki en Wortoe, bijbel, leki wi tjariman, meki wi no sa go na a reti-anoesei noso na a kroektoe-anoesei, èn na so fasi wi e sori taki a pasi foe Gado hei krinkrin moro leki a pasi foe grontapoe
3 A moro bigi pisi foe grontapoe no abi lespeki gi Gado pasi foe libi èn dati meki den e koti den bakapisi foe dati (Jer. 10:23). Foe dati ede wi moesoe tan kisi leri foe wi Gran Leriman, Jehovah, di e taki: „Disi na a pasi. Waka na tapoe, oen pipel” (Jes. 30:21). Jehovah pasi foe libi, soleki fa a tjari kon na krin na ini den Boekoe foe bijbel, moro hei na ala fasi. Foe man waka a pasi dati, a de fanowdoe taki wi e teki wini dorodoro foe ala den sani di Jehovah e leri wi.
4 A moro boen leriprograma foe Jehovah: Jehovah e leri wi a troetroe marki foe a libi èn fa foe gebroiki wi libi na wan fasi di kan gi wi moro foeroe wini. A e leri wi fa foe libi wan moro boen libi, na froestan sei, na moreel sei, èn na jejefasi. A e leri wi foe abi vrede nanga wi brada, wi famiri, nanga wi kompe. A e doe disi nanga en leriboekoe, bijbel, èn nanga jepi foe en organisâsi.
5 Den gemeente konmakandra foe wi de toemoesi prenspari ini a tori disi. Te wi e fisiti ala den feifi gemeente konmakandra doronomo èn abi wan prati na den, dan wi e kisi leri finifini leki bedinari foe a boen njoensoe èn wi leri boen fa foe libi leki kresten (2 Tim. 3:16, 17). Wi Bigi Leriman e gi wi theokrasia leri toe nanga jepi foe den kringkonmakandra nanga den kongres. A moesoe de a marki foe wi foe noiti no misi wan konmakandra noso wan programa efoe wi gosontoe èn a situwâsi pe wi de na ini e gi wi pasi foe fisiti den.
6 Meki wi tan waka Gado pasi foe libi, fajafaja na ini den dei di de na wi fesi, so taki Jehovah kan kisi prèise èn so taki wi kan kisi wini foe têgo!—Jes. 48:17.