Wan kenki kon na ini den joeroe di pionier moesoe doro
1 Wi alamala e warderi en taki wi abi gewoon pionier nanga jepipionier di e wroko tranga na ini a gemeente. Srefi na presi pe den no abi someni gebied noso pe den e wroko foeroetron na ini a gebied, den pionier gi wan boen eksempre nanga a Kownoekondre diniwroko di den e doe fajafaja. Den gi ala den preikiman deki-ati foe tan doe foeroe ini a wroko foe soekoe den wan di „abi a joisti jeje”.—Tori. 13:48.
2 A Genootschap si taki den pionier e kisi moro nanga moro problema, spesroetoe te den moesoe soekoe pisi ten grontapoewroko di kan gi den na okasi foe sorgoe boen gi den sani di densrefi abi fanowdoe, so taki den kan tan doe a foeroeten diniwroko. Na ekonomia situwâsi na foeroe kondre meki toe taki moro nanga moro a kon de wan moeilek sani gi trawan foe go doe a pionierwroko, ala di dati na wan sani di den wani troetroe. Den moen di pasa no so langa ete, a Genootschap loekoe den sani disi èn tra sani finifini toe.
3 Foe den sani ede di kari na tapoesei, meki a Genootschap saka den joeroe di gewoon pionier nanga jepipionier moesoe doro. Bigin nanga a jari 1999, den gewoon pionier moesoe doro 70 joeroe ibri moen, dati na ala nanga ala 840 joeroe wán jari. Den jepipionier moesoe doro 50 joeroe na ini wán moen. Den joeroe di spesroetoe pionier nanga zendeling moesoe doro tan a srefi, foe di a Genootschap seti sani di moesoe jepi den foe sorgoe gi den moro prenspari sani di den abi fanowdoe na materia sei. Na so fasi, den kan poti moro prakseri na tapoe a preikiwroko foe den èn na tapoe a wroko foe meki disipel.
4 Wi howpoe taki a kenki disi na ini den joeroe di pionier moesoe doro, sa jepi moro foe den foe tan doe a diniwroko disi di de wan bigi grani. A moesoe opo a pasi toe gi moro foeroe preikiman foe bigin nanga a gewoon pionierwroko noso a jepi-pionierwroko. Gi ala sma na ini a gemeente, disi sa sori foe de wan blesi troetroe.