Kari den foe kon
1 Wan kari di ben gi hondrohondro jari pasa kaba, de foe jere now na 233 kondre na heri grontapoe: „Kon, oen pipel, èn meki wi opo go na a bergi foe Jehovah, . . . èn a sa leri wi foe den pasi foe en, èn wi sa waka na tapoe den foetoepasi foe en” (Jes. 2:3). Foe tjari sma kon na a organisâsi foe Jehovah, na wan foe den moro boen fasi fa wi kan jepi den foe go na fesi na jeje fasi foe den kan kisi têgo libi.
2 Kande son preikiman e draidrai foe kari sma kon na a Kownoekondre zaal, te leki den sma sori taki den go na fesi moi kaba nanga na oso-bijbelstudie. Ma son leisi, sma sa bigin go na den gemeente konmakandra srefi bifo wi kan bigin wan bijbelstudie nanga den. Wi no moesoe wakti toemoesi langa foe gi sma wan switi kari èn foe gi den deki-ati foe kon na den konmakandra.
3 San foe doe: Gebroiki den strooibiljet boen so taki sma kan kon sabi moro foe den konmakandra foe wi. Taigi den taki den no abi foe pai gi konmakandra èn taki wi noiti no e kon teki moni. Tjari kon na krin fa den konmakandra e hori. Sori taki, te joe loekoe en boen, den konmakandra na presi pe wi e kisi bijbelstudie lès èn ala sma e kisi den tori foe leisi en makandra nanga a takiman. Poti a prakseri foe sma na tapoe den difrenti background foe den sma di e kon na den konmakandra, èn taki den abi ala sortoe posisi na ekonomia noso sociaal sei toe. Froeteri taki den na sma foe a birti èn taki pikin foe ala libimarki kan kon toe. Wi moesoe kari den sma di wi e studeri nanga den, èn wi moesoe taigi den taki wi wani jepi den na iniwan fasi di wi kan, so taki den kan kon.
4 Wán foe den lasti sani di skrifi na ini bijbel na wan switi kari di wi e kisi foe abi prati na den sani di Jehovah seti foe gi sma libi: „Èn a jeje nanga a trow-oema e tan taki: ’Kon!’ . . . Èn meki ibriwan sma di e drei watra, kon; meki ibriwan sma di wani so, teki a watra foe libi foe soso” (Openb. 22:17). No wan sani no de di kan teki a presi foe den kari di wi e gi trawan foe kon na den konmakandra foe wi.
5 A profeiti tori na ini Jesaja 60:8 e prenki hondro doesoendoesoen njoen prèiseman di e kon now na ini den gemeente foe a pipel foe Gado, leki doifi di „e frei kon neleki wan wolkoe, èn neleki doifi na den olo foe den doifikoi foe den”. Wi alamala kan kari njoen sma foe kon na den konmakandra foe wi èn meki taki den e firi boen. Na a fasi disi, wi sa wroko makandra nanga Jehovah, te a e meki a wroko foe tjari sma kon na wán, go moro esi.—Jes. 60:22.