Papa Nanga Mama—De wan Bun Eksempre gi Un Pikin
1 A Wortu fu Gado e taigi wi taki „sondro misi, a papa [nanga a mama] fu wan regtfardikiwan sa prisiri” (Odo 23:24, 25). ¡A de wan bigi blesi gi papa nanga mama di de wan bun eksempre gi den pikin fu den! Wan memre fu wan Bijkantoro Komte ben taki fu en papa nanga mama: „A waarheid ben de den heri libi, èn mi ben wani fu meki a de mi heri libi tu.” San den pikin musu si na ini den papa nanga mama fu den?
2 Bun Maniri Nanga Dipi Lespeki: A de a frantiwortu fu a papa nanga mama fu poti bun eigifasi na ini den pikin fu den. Bun maniri na sani di den musu leri, no wawan nanga mofo, ma fu di den e si dati èn e waka na baka den eksempre dati. Fu dati ede, sortu maniri yu e sori? ¿Yu pikin e yere yu e taki „pardon”, „grantangi”, èn „mi e taigi yu tangi”? ¿Yu e handri makandra nanga dipi lespeki na ini na osofamiri? ¿Yu e arki te trawan e taki? ¿Yu e arki te den pikin fu yu e taki nanga yu? ¿Yu e sori den bun eigifasi disi na a Kownukondre zaal èn na ini yu oso pe unu wawan de?
3 Wan Tranga Yeyefasi Nanga Fayafaya Aktiviteit: Wan brada di wroko moro leki 50 yari na ini a furuten diniwroko e memre: „Mi mama nanga papa ben de heri bun eksempre fu di den ben abi warderi gi den konmakandra èn den ben de fayafaya na ini a diniwroko.” Fa yu e sori den pikin fu yu taki yu e broko yu ede fu tan hori a yeyefasi fu den wan na ini yu osofamiri? ¿Yu e luku a deitekst nanga makandra? ¿Yu abi wan osofamiri studie doronomo? ¿Den pikin fu yu e si yu e leisi Bijbel èn den publikâsi fu a Genootschap? San den e yere te yu e begi gi na osofamiri? Yu abi yeye takimakandra di e tranga den pikin fu yu, fu di yu e taki fu positief sani fu a waarheid èn a gemeente? ¿Yu de fayafaya fu fisiti ala den konmakandra èn fu wroko nanga na osofamiri na ini a velddienst?
4 Papa nanga mama, prakseri bun fu na eksempre di unu e gi den pikin fu unu. Meki a de wan heri bun eksempre, èn den pikin sa warderi dati den heri libi langa. A wefi fu wan opziener di e reis èn di doro 70 yari kaba, ben taki: „Te now ete mi e nyan bun fu a bun eksempre fu mi lobi-ati Kresten papa nanga mama. Èn mi e begi fayafaya taki mi sa sori mi trutru warderi gi a gudu disi di mi kisi fu den, fu di mi sa gebroiki en bun na ini ala den ten di e kon.”