A Tru Anbegi E Gro na ini Owstu-Europa
1 Den Kresten na ini a fosi yarihondro ben de fayafaya Kownukondre preikiman. Den ben e prisiri te den gemeente ’ben kon moro furu ibri dei’ (Tori. 16:5). A preikiwroko fu den di den ben du nanga deki-ati ben tyari a tru anbegi go na ini Asia, Afrika, nanga Europa, èn dati ben abi leki bakapisi taki den ben kisi furu bribiman di ben kon na ini.
2 Na ini a ten disi fu a kaba a tru anbegi e tan gro, spesrutu na ini den kondre fu Owstu-Europa. Na ini kondre pe lanti ben tapu a wroko fu wi te leki wan sani fu 1990-1994, wi e ondrofeni kefalek moi gro now. A Jaarboek 1999 e sori taki tu fu den kondre disi, Rosiakondre nanga Ukraini, ben abi moro leki 100.000 preikiman di ben abi wan prati na a publiki diniwroko. ¡Na ini 15 kontren fu a fositen Sovjet Unie, fu sensi 1991 moro leki 220.000 sma ben gi densrefi abra na Yehovah èn ben dopu! A gro disi di ben feni presi esi-esi ben meki a de fanowdu fu meki moro furu nyun Kownukondre zaal nanga Kongreshal èn so srefi fu meki wan tu bijkantoro gebow moro bigi.
3 Soleki fa wi ben meki bekènti na ini Wi Kownukondre Dienst fu maart 1997, wan pisi fu a Kownukondre zaal fonds fu a Genootschap e gebroiki now fu leni moni na den gemeente fu den kondre pe moro Kownukondre zaal de tranga fanowdu, ma pe den no abi furu moni bikasi fu kefalek bigi ekonomia problema. Fu maart 1996 te nanga oktober 1998, a Genootschap ben feni en bun fu leni moni na den bijkantoro di e hori ai tapu 11 kondre na ini Owstu-Europa, di ben aksi fu bow 359 Kownukondre zaal. Den e gebroiki a bijdrage fu bai pisi gron nanga materiaal fu bow nyun Kownukondre zaal èn fu yepi den gemeente fu meki den gebow di den abi kaba kon moro bun. Den fowtow di wi sori dyaso, e gi wi wan idea fa den bijdrage gi a Kownukondre zaal fonds fu a Genootschap na ini Amerkankondre èn tra kondre ben yepi den brada fu wi na ini Owstu-Europa.
4 Na ini 1998, Bulgaria ben abi wan gro fu 12 procent, èn den brada ben prisiri srefisrefi di a fosi Kownukondre zaal fu den ben gi abra na Yehovah na ini april fu a yari dati. Krowâsia ben abi wan gro fu 4 procent, èn nownowde den brada drape e bow moro Kownukondre zaal fu meki a tru anbegi go na fesi. Na ini Hongaria 144 gemeente e gebroiki so wan 80 Kownukondre zaal. Disi wani taki dati fu den 235 gemeente na ini a kondre dati, 61 procent fu den abi den eigi presi fu anbegi. Na ini Masedonia a Kownukondre zaal bow programa ben klari tu nyun zaal, èn moro e bow ete. Na ini a zomer fu a yari 1999, wan gebow di abi tu Kownukondre zaal ben kaba bow na ini na edefoto Skopje. A zaal disi man gebroiki gi siksi gemeente.
5 ¡A yari di pasa, na ini Rosiakondre gemiddeld 260 sma ben dopu ibri wiki! Akruderi na eksempre di tra kondre e gebroiki, a bijkantoro fu Rosiakondre orga 12 Regionaal Bow Komte now na ini a heri bigi kondre fu den, fu yepi bow den Kownukondre zaal di de fanowdu na ini a ten di e kon. Na ini a noordsei pisi fu St. Petersburg, den e bigin bow a fosi kongreshal fu a kondre dati, èn a sa abi presi gi 1600 sma. A presi sa abi so srefi feifi Kownukondre zaal pe 200 sma kan sidon na ini ibriwan fu den. Fu sorgu gi den nowtu na yeye fasi fu wi brada èn furu sma di abi belangstelling na ini Ukraini, dan 84 Kownukondre zaal ben bow kaba èn ete 80 e bow ete.
6 ¿A gro disi na ini Owstu-Europa no e meki wi ati prisiri? Awansi pe wi e libi, a gro di a tru anbegi e gro e memre wi taki Gado no e teki sma partèi èn taki a pasensi fu en sa wani taki frulusu gi „wan bigi ipi” sma (Openb. 7:9; 2 Petr. 3:9). ¡Wi abi wan bigi grani fu abi wan pikin prati na a gro di tra sma e gro na yeye fasi, èn srefi den wan di e libi na ini farawe kondre! Odo 28:27 e gi wi a dyaranti taki „a sma di e gi den wan di no abi furu, no sa mankeri noti”. A wani di wi wani fu yepi pai den bowkostu disi, abi leki bakapisi taki sani e „meki kon a srefi” na materia sei, èn e meki taki ala sma man ondrofeni a prisiri di a e gi te wi e gi sani èn a prisiri di a e gi te wi e si taki a tru anbegi e gro na heri grontapu.—2 Kor. 8:14, 15; Tori. 20:35.
[Prenki na tapu bladzijde 3]
Săcele, Rumeinia
[Prenki na tapu bladzijde 3]
Maardu, Estkondre
[Prenki na tapu bladzijde 3]
Sevnica, Slofeinia
[Prenki na tapu bladzijde 3]
Tiszavasvári, Hongaria
[Prenki na tapu bladzijde 4]
Jūrmala, Latfia
[Prenki na tapu bladzijde 4]
Tallinn, Estkondre
[Prenki na tapu bladzijde 4]
Taurage, Litonia
[Prenki na tapu bladzijde 5]
Belgrado, Yugoslafia
[Prenki na tapu bladzijde 5]
Prievidza, Slowâkia
[Prenki na tapu bladzijde 5]
Mátészalka, Hongaria
[Prenki na tapu bladzijde 6]
Vranov nad Topl’ou, Slowâkia
[Prenki na tapu bladzijde 6]
Ruma, Yugoslafia
[Prenki na tapu bladzijde 6]
Tornakalns, Latfia