„Meki Ala Sani Waka So, Taki Trawan Kan Feni Bun”
1 Te wi abi fu du nanga den brada fu wi, dan wi musu du bun sani fu kan gi den deki-ati. Dati wani taki dati wi musu broko wi ede fu kibri sani di abi fu du nanga afersi na yeye fasi. Efu wi e du wan grontapu wroko di abi fu du nanga reklame di sma e meki gi wan sani di den e seri, noso gi wan wroko di den e du gi sma, dan wi musu luku bun taki noti sa meki wi brada naki futu fadon.—2 Kor. 6:3; Fil. 1:9, 10.
2 Son brada go du difrenti sortu bisnis èn den e si kompekresten leki sma di kan bai wan sani fu den. Son bisnis organisâsi e gi den sma di e wroko gi den, deki-ati fu si ibriwan sma leki wan sma di kan bai wan sani fu den — so srefi den wan di de fu a srefi kerki leki den. Wan tu brada orga bigi konmakandra fu Kotoigi nanga a marki fu gi den deki-ati fu go du bisnis nanga den. Trawan ben meki reklame gi den bisnis fu den fu di den seni artikel, brochure, boskopu na tapu Internet, cassette noso video lolo gi kompe-bribiman sondro wan sma aksi den. A ben o de wan bun sani taki wan Kresten e gebroiki den brada di a sabi na ini a theokrasia organisâsi, fu kisi wini gi ensrefi? Nôno!—1 Kor. 10:23, 24, 31-33.
3 Den Brada Musu Luku Bun: Disi no wani taki dati wan Kresten no kan du bisnis nanga wan brada. Dati na en eigi tori. Ma son wan e bigin wan bisnis di e gi sma deki-ati fu abi gridifasi, èn den e gi kompe-bribiman deki-ati fu wroko makandra nanga den na ini wan bisnis noso fu poti den moni na ini wan bisnis. Furu fu den bisnis disi no e waka bun, ala di den sma di ben poti den moni na ini, e lasi bigi moni. Ala di den wan di ben horibaka gi a bisnis afersi, ben du disi fu di den ben wani meki moni esi-esi, toku a sma di orga a bisnis no musu firi taki a no fowtu efu a bisnis no e waka bun. A musu luku bun na fesi, san kan pasa nanga a yeyefasi èn nanga a gosontu fu den brada fu en te a bisnis no e go. Spesrutu den wan di abi frantwortu posisi na ini a theokrasia organisâsi, musu luku bun te den e du sani gi a grontapu wroko fu den. Den musu luku bun bika trawan abi lespeki gi den èn e frutrow na den tapu. A no ben o de wan bun sani efu den e gebroiki a frutrow di brada nanga sisa e frutrow den, gi den eigi wini. Efu trawan no e lespeki wan brada moro, dan a kan lasi den grani di a abi fu du santa diniwroko.
4 A musu de a marki fu wi fu „meki ala sani waka so, taki trawan kan feni bun” (1 Kor. 14:26). Wi no musu du no wan enkri sani fu bigin nanga bisnis afersi na ini a gemeente noso gi a gemeente deki-ati fu horibaka gi bisnis afersi. Den sortu sani dati no abi noti fu du nanga den reide di Bijbel e gi wi fu kon makandra.—Hebr. 10:24, 25.