Kisi a Krakti fu Taki Dati Yu No Wani Du Ogri
„DI MI ben de wan tini ete èn mi ben wroko na wan wenkri,” na so Timothy e fruklari, „dan wan yonkuman fu mi wrokope ben kari mi fu kon na en oso. A ben taki dati en papa nanga mama no ben o de na oso, meisje ben o de drape, èn okasi ben o de fu abi seks.” Furu yongu sma na ini a ten disi no ben o wakti langa fu teki so wan kari. Ma san Timothy ben piki? „Mi ben taigi en wantewante taki mi no ben o kon èn taki fu mi Kresten konsensi ede, mi no ben wani abi seks nanga wan sma di mi no trow.”
Timothy no ben sabi taki, di a ben fruklari fu san ede a no ben wani, wan yongu uma fu en wrokope ben e arki tu. A krinfasi fa Timothy ben handri èn ben denki ben hari a prakseri fu na uma, èn syatu baka dati Timothy ben musu taigi en tu dati a no ben wani — èn Timothy ben musu du dati wan lo leisi, soleki fa wi sa si baka ten.
Ma a no soso na ini a ten fu wi sma kisi fu du nanga furu tesi. So wan 3000 yari pasa, Kownu Salomo ben skrifi: „Mi manpikin, efu sondari e pruberi fu kori yu, no arki den. . . . No poti yu futu na tapu a pasi fu den” (Odo 1:10, 15). Yehovah srefi ben gi a nâsi Israèl a komando: „Yu no musu waka baka a bigi ipi sma fu du ogri” (Exodus 23:2). Iya, son leisi wi musu taki dati wi no wani, èn kakafutu gi a tesi fu du wan ogri, srefi efu a de wan sani di furu sma no e du.
A De Tumusi Prenspari na ini a Ten Disi fu Taki Dati Yu No Wani
Noiti a ben makriki gi sma fu taki dati den no wani du ogri, èn na ini a ten disi a kan muilek srefisrefi, bika wi e libi na ini a ten di Bijbel e kari „den lasti dei” fu a seti fu sani disi. Soleki fa Bijbel profeititori e taki, dan heri ipi sma tron sma di lobi prisiri nanga ogri di e du nanga tranga, sondro taki den abi yeyefasi noso e hori densrefi na bun gwenti nanga wet (2 Timoteus 3:1-5). Wan presidenti fu wan Jesuit akademia ben taki: „Sma no de seiker moro fu wan sistema nanga markitiki di wi ben abi someni langa kaba, èn di den no ben feni bun moro baka ten noso den ben si en leki wan fositen sani. Now a gersi leki no wan marki na moreel sei no de moro kwetikweti”. Nanga a srefi sani na prakseri, wan krutuman fu Gran Krutu ben taki tu: „Sma no man si krin moro san bun noso san no bun. Ala sani kon trubu. . . . Moro mendri sma e si a difrenti na mindri bun nanga ogri. Sondu na te den e kisi wan sma, a no na ogri di a sma du.”
Na apostel Paulus ben skrifi fu sma di e tyari densrefi na a fasi dati: „Den de na dungru na frustan sei èn den drifi komoto fu a libi di de fu Gado, fu di den no abi sabi na ini den, fu di na ati fu den no abi firi. Fu di den lasi ala syen firi, den gi densrefi abra na wan lusu fasi fu tyari densrefi, fu libi ala sortu doti libi na wan gridi fasi” (Efeisesma 4:18, 19). Ma problema e wakti den. Yesaya ben fruklari: „¡Helu fu den sma di e taki dati bun na ogri èn ogri na bun, di e meki dungru de leti èn leti de dungru!” (Yesaya 5:20) A no de soso taki nownow den sma disi e firi den bakapisi fu den sani di den du, ma dyonsro den sa ondrofeni a moro bigi „helu” di sa kon na den tapu — a krutu fu Yehovah sa abi takru bakapisi gi den.—Galasiasma 6:7.
„Te den godelowsuwan e sproiti leki sani di e gro na gron èn ala den sma di e du ogri e gi bromki, dan dati na fu di den sa kisi pori fu têgo”, na so Psalm 92:7 e taki. Nanga tra wortu, ala a godelowsufasi disi no sa tan go doro fu ala ten, so taki a libi e tron wan bigi hebi gi ala sma. Fu taki en leti, Yesus ben taki dati a „geslakti” di e horibaka gi a godelowsufasi disi, sa de a srefi geslakti di Gado sa puru na pasi na ini wan „bigi banawtu” (Mateus 24:3, 21, 34). Dati meki efu wi wani pasa a bigi banawtu dati libilibi, dan wi musu sabi san bun èn san ogri, akruderi den markitiki fu Gado; èn a no de fu taki dati wi abi a moreel krakti fanowdu tu fu kan taki dati wi no wani du no wan ogri. Ala di a no makriki fu du disi, toku Yehovah gi wi wan tu eksempre fu Bijbel ten èn fu a ten disi, di kan gi wi deki-ati.
Leri fu wan Yonkuman Di Ben Taki Dati A No Ben Wani
A gersi wan tumusi muilek sani gi wan sma fu taki dati a no wani du hurudu nanga sutadu, srefi gi son sma na ini a Kresten gemeente. Timothy, di wi ben kari na ini a fosi paragraaf, ben prakseri na eksempre fu a yongu Yosef di kari na ini Bijbel na Genesis 39:1-12. Di a wefi fu na Egipti heiheiman Potifar ben aksi Yosef ibri leisi baka fu kon didon na en, dan Yosef ben sori moreel krakti. Yosef, na so a tori e taki, „ben weigri èn a ben taki . . . ’Fa mi ben kan du a bigi ogri disi èn trutru sondu na Gado?’”
Fa Yosef ben kisi a moreel krakti dati fu taigi a wefi fu Potifar taki a no ben wani ibri dei baka? Na a fosi presi, Yosef ben si a banti di a ben abi nanga Yehovah leki wan sani di ben warti moro leki a prisiri di a ben kan kisi fu wan syatu pisi ten. Boiti dati, ala di Yosef no ben de na ondro wan wet fu Gado (a Wet fu Moses ben musu kon ete), toku a ben frustan den moreel gronprakseri heri bun; a ben sabi taki efu a ben o du hurudu nanga Potifar wefi di ben lobi Yosef tranga, dan Yosef no ben o sondu wawan na a masra fu na uma, ma a ben o sondu tu na Gado.—Genesis 39:8, 9.
A de krin taki Yosef ben frustan o prenspari a ben de fu no wiki no wan pikinso lostu srefi, di ben kan meki Yosef kisi tranga sekslostu di a no ben man basi. Na wan koni sani te wan Kresten e teki na eksempre fu Yosef. De Wachttoren fu 15 september 1957 ben taki: „A musu erken taki a skin fu en swaki èn a no musu denki taki a kan wiki sekslostu te na a marki pe Bijbel taki dati a no kan èn dan a kan stop leti drape. Srefi efu a kan du disi wan pisi ten, toku a sa pasa a marki dati te fu kaba èn du sondu. Disi sa pasa seiker, fu di lostu di wan sma e wiki, pikinsopikinso e kon moro tranga èn den e grabu en hori moro nanga moro. Dan a moro muilek gi en fu no prakseri den lostu disi. A moro bun sani di a kan du na fu kakafutu gi den lostu na a bigin kaba.”
A sa moro makriki fu kakafutu gi lostu na a bigin kaba te wi e leri fu lobi san bun èn wi no wani si ogri na ai (Psalm 37:27). Ma wi musu tan du muiti gi dati, wi musu horidoro. Efu wi e du dati, dan Yehovah sa yepi wi fu kisi moro lobi gi sani di bun èn wi sa tegu fu sani di ogri. A no de fu taki, dati ini a pisi ten dati wi musu tan na ai soleki fa Yesus ben taki, èn begi doronomo taki tesi no sa miti wi èn taki a godelowsuwan no sa kisi wi.—Mateus 6:13; 1 Tesalonikasma 5:17.
No Gi Abra Na a Druk fu Speri
Wan tra sani di kan meki wan sma du ogri, na a druk fu speri. Wan yongusma ben taki: „Mi e libi tu sortu libi — wán na skoro èn wán na oso. Na skoro mi e bumui nanga pikin di e taki dotitaki pikinmoro ibri leisi te den e opo den mofo. Èn mi e tron neleki den. San mi musu du?” San de fanowdu, na a deki-ati fu de tra fasi, èn wán fasi fu kisi a deki-ati disi na te yu e leisi èn e prakseri dipi fu den tori na ini Bijbel di e fruteri wi fu den loyaal futuboi fu Gado, den wan leki Yosef. Tra moi eksempre na Danièl, Sadrak, Mesak nanga Abednego — fo yonkuman di ben abi a deki-ati fu de tra fasi leki den speri fu den.
Di den ben kisi leri makandra nanga tra yonkuman na ini na oso fu a kownu fu Babilon, dan den fo yongu Israèlman disi ben musu nyan „wan ala dei porsi . . . fu den switisani fu a kownu”. Fu di den ben wani hori densrefi na den markitiki di a Wet fu Moses ben poti ini a tori fu nyanyan, meki den no ben wani a nyanyan disi. Den ben abi krakti fanowdu fu kan du dati — spesrutu fu di den nyanyan sani, di ben de „den switisani fu a kownu”, ben de wan hebi tesi kande. ¡A de wan tumusi moi eksempre di den yonkuman disi poti gi Kresten na ini a ten disi di kan kisi tesi, èn kisi hebi druk srefi fu dringi furu sopi noso fu gebroiki drug nanga tabaka!—Danièl 1:3-17.
Sadrak, Mesak, nanga Abednego ben sori tu taki den sani di Yesus Krestes ben taki baka ten, tru: „A sma di de getrow ini a moro pikin sani, de getrow tu ini furu sani” (Lukas 16:10). A deki-ati fu den di ben abi fu du nanga san gersi wan pikin sani ini a tori fu nyanyan èn a moi bakapisi di Yehovah ben tyari kon, trutru ben gi den krakti gi wan tra tesi di ben o moro hebi (Danièl 1:18-20). A tesi disi ben kon di den ben kisi a komando fu teki prati na a anbegi fu kruktugado, noso den ben o dede na ini faya. Nanga deki-ati den dri yonkuman ben tan abi a fasti bosroiti fu anbegi Yehovah wawan, fu di den ben frutrow dorodoro na ini en awansi sortu bakapisi ben sa kon. Yehovah ben blesi den baka fu a bribi nanga a deki-ati di den ben abi — disi leisi fu di a ben du wan wondru fu kibri den meki a faya no bron den, di den ben trowe den na ini wan bun faya onfu.—Danièl 3:1-30.
A Wortu fu Gado abi furu tra eksempre fu sma di no ben wani du ogri. Moses no ben wani meki den „kari en a manpikin fu na umapikin fu Farao”, ala di disi ben o gi en furu okasi fu gi ensrefi abra na „a prisiri fu sondu [na Egipti] di ben de fu wan pisi ten nomo” (Hebrewsma 11:24-26). A profeiti Samuèl ben weigri fu gebroiki en makti fu teki tyuku (1 Samuèl 12:3, 4). Den apostel fu Yesus Krestes ben piki nanga deki-ati taki den no ben o tapu nanga a preikiwroko di sma ben gi den a komando fu tapu (Tori fu den Apostel 5:27-29). Di den srudati ben wani gi Yesus „win di ben abi mirre na ini”, dan en srefi ben sori na wan krakti fasi te na a lasti momenti fu en libi taki a no ben wani du no wan ogri. Efu a ben teki a win, dan dati ben sa kan meki a bosroiti fu en kon swaki na ini a muilek ten dati.—Markus 15:23; Mateus 4:1-10.
Fu Taki Dati Yu No Wani—A Bakapisi Kan de Libi Noso Dede
Yesus ben taki: „Pasa go na ini a smara doro; bika bradi èn bigi a pasi de di e tyari sma go na pori, èn furu sma de di e pasa go na ini; ma smara a doro de èn smara a pasi de di e tyari sma go na libi, èn pikinso sma de di e feni en.”—Mateus 7:13, 14.
Furu sma lobi a bradi pasi fu di a moro makriki fu waka na en tapu. Den sma di e waka na en tapu wani prisiri densrefi nomo, den e prakseri èn e du sani na skin fasi, èn den no wani de tra fasi ma den wani libi akruderi a grontapu fu Satan. Den feni taki den wet nanga den gronprakseri fu Gado e hendri den na moreel sei (Efeisesma 4:17-19). Ma Yesus ben taki spesrutu taki a bradi pasi e tyari „go na pori”.
Ma fu san ede Yesus ben taki dati wan tu sma nomo e teki a smara pasi? Moro furu fu di wan pikin grupu sma nomo wani meki den wet nanga gronprakseri fu Gado musu tiri a libi fu den èn yepi den fu kakafutu gi den furu firi nanga okasi di de na den lontu fu du ogri. Boiti dati, soso wan pikin grupu sma de srekasreka fu feti nanga takru lostu, a druk fu speri, nanga a frede di den frede taki sma kan lafu den fu a pasi ede di den teki.—1 Petrus 3:16; 4:4.
Den sma disi e frustan krin fa na apostel Paulus ben firi di a ben taki fu a feti di a ben musu feti nanga a firi fu du sondu. Neleki fa a de na ini a ten disi na grontapu, na so a grontapu fu Rome nanga a Griki grontapu na ini a ten fu Paulus ben gi sma furu okasi fu du ogri pasa marki. Paulus ben fruklari taki a frustan fu en, di ben sabi san ben bun, ben ’feti’ doronomo nanga en skin, di ben firi fu du ogri (Romesma 7:21-24). Iya, Paulus ben sabi taki en skin ben de wan bun futuboi, ma wan takru basi, dati meki a ben leri fu no arki en. „Mi e fon mi skin èn e tyari en leki wan srafu”, na so a ben skrifi (1 Korentesma 9:27). Fa a ben kan basi en skin? No nanga en eigi krakti, di no ben man kakafutu gi a tyalensi disi, ma nanga a yepi fu Gado en yeye.—Romesma 8:9-11.
A bakapisi ben de taki Paulus, ala di a no ben de volmaakti, ben hori en soifri retifasi na Yehovah te na a kaba. No langa bifo a dede, a ben kan skrifi: „Mi feti a heri bun feti, mi lon a streilon te na a kaba, mi hori a bribi. Sensi a ten dati a kownu-ati fu regtfardikifasi poti na wan sei gi mi.”—2 Timoteus 4:7, 8.
Te wi e feti nanga den onvolmaaktifasi fu wi, dan wi abi trutru moi eksempre di e gi wi deki-ati, no fu Paulus wawan ma so srefi fu den sma di ben de eksempre gi en — Yosef, Moses, Danièl, Sadrak, Mesak, Abednego, nanga furu trawan. Ala di den no ben de volmaakti sma, toku ibriwan fu den man disi di ben abi bribi no ben wani du ogri, no fu di den ben tranga-ede noso trangayesi, ma fu di den ben abi a moreel krakti nanga yepi fu a yeye fu Yehovah (Galasiasma 5:22, 23). Den ben de man di ben abi yeyefasi. Den ben angri fu yere ibri wortu di Yehovah ben taki (Deuteronomium 8:3). A wortu fu en ben wani taki libi gi den (Deuteronomium 32:47). Boiti dati, den ben lobi Yehovah èn den ben frede en, èn nanga a yepi fu en den ben leri nanga pasensi fu no wani si ogri na ai.—Psalm 97:10; Odo 1:7.
Meki wi de leki den. Iya, efu wi wani tan taki dati wi no wani du no wan ogri, dan wi abi a yeye fu Yehovah fanowdu neleki fa den ben abi en yeye fanowdu tu. Yehovah no gridi fu gi wi en yeye efu wi e aksi disi seryusu, e studeri en Wortu, èn e go na den Kresten konmakandra doronomo.—Psalm 119:105; Lukas 11:13; Hebrewsma 10:24, 25.
Timothy, di wi ben kari na a bigin, ben breiti taki a ben hori ai na tapu en yeye nowtu. A yongu uma fu en wrokope di ben yere san Timothy ben taigi a man fu en wrokope èn di ben lobi a krinfasi fa Timothy ben handri èn ben denki, baka ten ben aksi Timothy kibrikibri fu kon na en oso te en masra no ben o de. Timothy ben weigri. Fu di na uma no ben lasi-ati so esi, meki a ben gi Timothy a kari furu leisi, neleki san a wefi fu Potifar ben du. Ibri tron Timothy ben taki na wan krakti fasi, ma toku na wan switifasi, dati a no ben wani. A ben gebroiki a Wortu fu Gado fu gi na uma disi wan moi kotoigi srefi. Timothy di breiti trutru taki Yehovah gi en a moreel krakti fu taki dati a no ben wani, trow now nanga wan bun kompekresten èn a de koloku. Iya, Yehovah sa blesi ala sma èn gi den krakti efu den wani hori a Kresten soifri retifasi fu den, te den e taki dati den no wani du ogri.—Psalm 1:1-3.