De nanga wan gosontu frustan fu di a kaba e kon krosibei
1 A Wortu fu Gado e taki ibri tron baka dati a dei fu Yehovah sa kon „leki wan fufuruman”. Disi wani taki dati a sa kon wantronso, wantewante, sondro wan sma fruwakti en (1 Tes. 5:2; Mat. 24:43; 2 Petr. 3:10; Openb. 3:3; 16:15). „Fu dati ede”, na so Yesus e taki, „sori taki unu de srekasreka, bika a Manpikin fu libisma e kon na wan yuru di unu no prakseri” (Mat. 24:44). Fa wi kan tan na ai na yeye fasi aladi a kaba e kon krosibei? Wan fasi di e wroko bun de fu feni na ini a frumane di skrifi nanga yepi fu santa yeye: „De nanga wan gosontu frustan.”—1 Petr. 4:7.
2 Fu de nanga wan gosontu frustan wani taki dati wi musu si sani leki fa Yehovah e si den (Ef. 5:17). A sa yepi wi fu si wisrefi leki „freimdesma èn leki sma di e libi dya fu wan syatu pisi ten nomo” na ini a disiten seti fu sani (1 Petr. 2:11). Te wi e si sani leki fa Yehovah e si den, dan dati sa meki wi abi a koni fu man si krin san prenspari trutru, san wi musu poti na a fosi presi, èn fa fu meki bun bosroiti.—Fil. 1:10.
3 Poti yeye marki: Poti yeye marki èn doro den marki disi tu. Disi sa yepi yu fu de nanga wan gosontu frustan. Yu abi yeye marki di yu e suku fu doro? Yu e meki muiti fu leisi Bijbel ala dei, fu go na ala den Kresten konmakandra, èn fu leisi ala den Waktitoren nanga Ontwaakt!? Noso, kande yu wani du moro na ini a diniwroko? Efu yu poti yoisti marki gi yusrefi, dan tan meki muiti fu doro den marki. Aksi Yehovah fu blesi den muiti di yu e meki èn yu sa fruwondru fu den bakapisi di yu sa kisi.
4 Wan owruman ben aksi wan yongu trowpaar sortu yeye marki den ben poti. Na aksi disi ben meki taki a trowpaar kon si taki efu den gebroiki den ten nanga den moni soso gi sani di de fanowdu trutru èn efu den pai den hebi paiman fu den, dan den sa man pionier. Den ben teki a bosroiti fu doro a marki disi. Den ben pai den paiman dorodoro èn den feni fasi fu no gi den ten nanga krakti moro na sani di no de fanowdu. Baka wán yari, den ben doro a marki fu den. San ben de a bakapisi? A masra e taki: „Efu wi no ben poti marki, dan wi no ben sa man doro den sani di wi e du now. Wi de nanga moro koloku. A libi fu wi moro bun. A libi fu wi kon tron wan trutru warti sani èn wi kisi wan marki na ini wi libi.”
5 Aladi wi e wakti a dei fu Yehovah meki wi tan na ai na yeye fasi fu di wi de nanga wan gosontu frustan, èn fu di wi e tan poti prakseri fu du Gado wani.—Tit. 2:11-13.